1 Kô ranenh da ramènh baxon yiniq lui, aih la ngè dìq jaq hadròeh 2 Tanòe wì ma jêh kon ramènh đòeq broq ramènh bùh, hanoh jêh kon ramènh baxon yiniq lui ta-aih, khoe èh ùc mahim haq dudan crŏng prang tadreo. 3 Khoe ka aih dèch dìq dŏng bòq, tênh xam praiq. 4 baiq toq plì crŏng, bòq plì crŏng oe kênh cabŏng xam bòq clèm oe kênh baiq toq plì crŏng 5 Mangai pajàu hi baxù dŏng ta prang tadreo đòeq broq ramènh yŏc ùnh dèch ka Chuaq Jêhowa: Aih la mòeq ramènh baxon yiniq lui. 6 Rìm ngai calô taƀài mangai pajàu acaq jam aih tanòe hadròeh; aih raq ngè dìq jaq hadròeh. 7 Ramènh baxon lui ma khoe troq broq, tìah ka ramènh baxon yiniq lui, hadai mòeq ranenh tìah ka dabau; kon ramènh aih jah mangai pajàu ma khoe yòng broq ramènh baxon yiniq lui. 8 Mangai pajàu dèch ramènh bùh ka cabô, aih èh jah waq ka rađeh akia da kon ranènh aih. 9 Ramènh xep leq yac ka pai ta tanùh, yac ka adrênh tagŏc yac ka bùh tagiaq, aih dìq jah mangai pajàu ma khoe yòng dèch. 10 Dìq dŏng ƀài ramènh xep, yac ka khoe ùc dàu yac ka oe croh, dua ep waq ka axong taq atoq dŏng ka ƀài kon calô da Arôn

11 Kô ranenh da ramènh waiq kan catèm wì ma ep dèch ka Chuaq Jêhowa. 12 Tàng cabô enh dèch ramènh kô đòeq manè apôi, aih ep dèch pajùm ti ramènh kô ƀài ƀênh habàu ùh tah blo, ùc dàu ôliu, ƀênh ratang ùh tah blo ùc dàu xam ƀênh habàu broq enh dàc habuàt ùc dàu 13 èh ep waq ka i tam ƀênh khoe tah blo đòeq dèch ajùm ti ramènh waiq kan catèm. 14 Wì hi yŏc mòeq phàn ta rìm ramènh broq ramènh xep dèch atŏc ka Chuaq Jêhowa; ramènh aih jah mangai pajàu ma khoe pùc mahim da kon ramènh waiq kan catèm. 15 Jam da kon ramènh waiq kan catèm dèch đòeq manè apôi aih ep acaq waq ka dìq tahì aih, ùh khòh đòeq cleq oe srong trùh sroq atìq.

16 Tàng ramènh kô dèch taiq bàu waiq khàn tàng ùh meh taiq bùi manoh enh, jam kon ramènh aih ep acaq tahì aih raq, oe i rah aih đòeq acaq hì da-èh. 17 Mahaq phàn ma oe rah trùh hì piq aih èh ep bùh đac. 18 Tàng cabô acaq jam kon ramènh waiq kan catèm trùh tahì piq, ramènh aih èh ùh jah dì, ramènh aih ùh rèn ka haq hòm; aih la kan ùh hruah, mangai leq acaq jam aih ep pòq dèh yiniq lui cla. 19 Hanoh ùh jah kaq jam khoe troq taƀài ngè ùh hruah; ep bùh đac. Jam ma khòh acaq, cabô hruah men jah kaq. 20 Mangai khoe ùh hruah, mahaq acaq jam ramènh baxon yiniq lui da Chuaq Jêhowa, aih èh ep qnoh đac enh gùng ka ƀài mangai da haq.

21 Tàng cabô troq kan ùh hruah, yac ka da kon mangai yac ka da ngè aban ùh meh kan amùa, mahaq acaq jam ramènh waiq kan catèm da Chuaq Jêhowa, aih èh ep hnan qnoh đac enh gùng ka ƀài mangai da haq

22 Chuaq Jêhowa doe hòm ka Môise rameh: 23 Thê doe ka mangai Isorali qmang kô: ùh khòh acaq ƀài bòq da ƀo, da trìu, da bubi. 24 Bòq da ngè cachìt qnì yac ka cachìt taiq i cleq hit qnì jah đòeq waq rìm trong, mahaq pì ùh jah kaq. 25 Majah qmang aih cabô acaq bòq wì ma yŏc ùnh đòeq dèch ka Chuaq Jêhowa, aih èh ep qnoh đac enh gùng ka bài mangai da haq. 26 Rìm nòe pì oe ùh khòh acaq yac ka mahim da chìm yac ka ngè aban 27 Waq toq cabô acaq yac ka mahim cleq aih èh ep hnan qnoh khoe ka mangai da haq.

28 Chuaq Jêhowa oe doe tam ka Môise: 29 Thê doe ka mangai Isorali rameh: Cabô dèch ramènh waiq kan catèm ka Chuaq Jêhowa, cla mangai aih ep aràng ramènh ka Chuaq yŏc enh kon ramènh waiq kan catèm. 30 Tì kŏng cla haq ep aràng phàn ma ep yŏc ùnh đòeq tadreo dèch ka Chuaq Jêhowa; aih la bòq xam canòh, canòh aih broq ramènh tacwa lam tacwa hlài enh ngèa Chuaq Jêhowa; 31 khoe aih mangai pajàu hi bùh bòq aih taprang tadreo, canòh èh jah Arôn xam ƀài kon calô haq. 32 Pì hanoh ep am cataih qma ka mangai pajàu ma yòng dèch ramènh waiq kan catèm. 33 Kon calô da Arôn mangai leq ma yòng dèch mahim xam bòq da kon ramènh waiq kan catèm, aih èh haq jah waq cataih pah qma. 34 Majah qmang aih enh ƀài ramènh waiq kan catèm da mangai Isorali, au yŏc canòh wì ma dèch lam cwa lam hlài enh ngèa au, xam cataih wì dèch, đòeq am ka Arôn mangai pajàu xam ƀài kon calô haq, tiaq ranenh mòeq đòe mangai Isorali ma ep wèq tiaq. 35 Aih la phàn dahwèq yŏc ùnh dèch ka Chuaq Jêhowa, jah axong am ka Arôn xam ƀài kon calô haq oe tahì wì haq jah padèch atŏc broq mangai pajàu enh ngèa Chuaq Jêhowa; 36 Aih la bàu Chuaq Jêhowa khoe tanap thê mangai Isorali ep am ka wì haq patep pang hì wì haq chìuq ranenh xùt dàu. Aih la ranenh hloe hloe enh qnhòng kô trùh qnhòng tau. 37 Aih la ranenh trong ramènh bùh, ramènh xep, ramènh baxon yiniq lui, trùh ramènh baxon yiniq lui troq lò, trong ranenh padèch atŏc broq pajàu xam ramènh waiq kan catèm. 38 Aih ƀài ranenh Chuaq Jêhowa khoe am ka Môise tabui wang Sina-i, jò haq tanap thê mangai Isorali dèch deh ramènh ka Chuaq Jêhowa tađùng hawit Sina-i.