4 Môise broq wop qmang ka bàu Chuaq Jêhowa tanap thê, dìq ka mangai tagop dabau ajang trong qmang traiq taglàm. 5 Môise anoe ka wì: Kô ƀài trong Chuaq Jêhowa khoe tanap thê broq tiaq. 6 Khoe aih, Môise thê Arôn xam ƀài kon calô haq thia haten, khoe aih yŏc diac dahùm wì haq. 7 Haq caxùnh am eo đêq enh dalam ka Arôn, kàt dahaq xi qnam, sràp eo yôh, caxùnh êphot rai kàt caxi atanh êphot. 8 Hãy xem XuXh 28:30 Haq hadai bac am capiac bac rada rai pacap qmùt ta-aih urim xam thumim. 9 Pacui mù cajùh tagàu, enh ngèa i kàt chèang lèang wang, aih la cadoh hadròeh diac plình, wop qmang ka bàu Chuaq Jêhowa khoe tanap thê Môise.

10 Khoe ka aih, Môise yŏc dàu xùt, xùt ka hnim kùh waiq đò xam dahwèq ta-aih dôq ƀài ngè aih jah hadròeh. 11 Da arat dàu tapèh yàng ta prang tadreo rai xùt dàu ka prang tadreo xam ƀài dahwèq khop khip da prang tadreo, thùng xam jo haq, đòeq broq ka ƀài ngè aih jah hadròeh. 12 Haq hadai ùc dàu tagàu Arôn, xùt ka haq broq haq jah hadròeh. 13 Khoe aih, Môise thê bài kon calô Arôn thia haten, caxùnh eo đêq enh dalam, kàt atan caqnam, kui cadoh tagàu, wop qmang ka bàu Chuaq Jêhowa khoe thê Môise.

14 Haq thê aràng ƀo hadròng đòeq broq ramènh baxon yiniq lui trùh haten, Arôn xam ƀài kon calô haq roh dèh tì tagàu bo aih. 15 Môise pàc ƀo aih, yŏc mahim, khoe aih yŏc deh hadrang tì xùt mahim dudan ài aki da prang tadreo, broq ka prang tadreo aih jah hadròeh; khoe aih ùc mahim roc jo prang tadreo, qmang aih haq broq ka prang tadreo jah hadròeh, đòeq broq ramènh baxon yiniq lui ta-aih. 16 Haq yŏc dŏng bài bòq, praiq clèm, baiq toq plì crŏng xam bòq da plì crŏng, khoe aih aràng bùh ta crŏng prang tadreo 17 Mahaq chac ƀo aih xam akia, jam xam cliac, aih haq lam bùh enh gùng ka traiq lình, wop qmang ka bàu Chuaq Jêhowa khoe tanap thê Môise. 18 Haq hanoh thê aràng trìu calô đòeq broq ramènh bùh trùh ka haten, Arôn xam ƀài kon calô haq roh dèh tì tagàu trìu; 19 Khoe aih Môise jêh haq rai ùc mahim haq dudan crŏng prang tadreo, 20 khoe aih xah loh tang apech, aràng bùh ƀài gàu xam ƀài apech aih hloe xam bòq. 21 Haq yŏc diac qnheo pù cliac xam jo, khoe aih bùh trìu calô taprang tadreo; aih raq ramènh bùh i kan xua thùm, aih la ramènh yŏc ùnh đòeq dèch ka Chuaq Jêhowa, wop tìah ka bàu Chuaq Jêhowa khoe tanap thê Môise.

22 Haq hanoh thê aràng trìu calô ma atìq hòm, aih la trìu calô đòeq broq ramènh dèch atŏc broq pajàu; Arôn xam ƀài kon calô haq roh deh tì tagàu trìu calô aih. 23 Môise pàc trìu aih, yŏc mahim xùt da Arôn hla don pah qma, ta hadrang kan tì pah qma xam ta hadrang kan jènh pah qma. 24 Môise hanoh thê ƀài kon calô da Arôn thia haten, xùt mahim ta hla don ƀè qma da wì haq, ta hadrang kan tì qma xam hadrang kan jènh pah qma da wì haq; khoe aih, Môise pùc mahim dudan taprang tadreo. 25 Khoe aih, haq yŏc ramaq, tênh, xam ƀài bòq, praiq clèm, baiq toq plì crŏng xam bòq da baiq toq plì crŏng xam cataih qma; 26 Khoe aih enh talênh ƀênh ùh tah blo ma đòeq enh ngèa Chuaq Jêhowa, haq yŏc moeq toq ƀênh habàu ùh tah blo, moeq toq ƀênh habàu i dàu, xam moeq toq ƀênh ratang, đòeq bài ƀênh aih enh qnhèq ka bài bòq xam cataih qma, 27 Khoe aih tah dŏng ƀài ngè aih ta tì Arôn xam tì ƀài kon calô haq; wì hnhu lam hnhu hlài enh ngèa Chuaq Jêhowa. 28 Môise yŏc bài ngè aih enh tì wì haq, aràng bùh taprang ramènh bùh; aih la ramènh dèch atŏc broq pajàu i kan xua thùm, aih ra ramènh yŏc ùnh đòeq dèch ka Chuaq Jêhowa. 29 Môise hanoh yŏc canòh da trìu calô ma broq ramènh dèch atŏc broq pajàu hnhu lam hnhu hlài enh ngèa Chuaq Jêhowa, aih phàn jah Môise, wop qmang ka bàu Chuaq Jêhowa khoe tanap thê haq. 30 Khoe aih, Môise yŏc dàu xùt xam mahim enh prang tadreo da arat tachac Arôn xam eo cwàn haq, tachac ƀài kon calô haq hloe ta eo cwàn wì đòeq broq hadròeh Arôn xam ƀài kon calô haq hloe xam ƀài eo cwàn ramènh wì haq 31 Khoe aih, Môise doe ka Arôn xam ƀài kon da haq qmang kô: Pì awìh jam jang trong qmang traiq taglàm, rai acaq ta-aih xam ƀênh enh talênh da ramènh dèch atŏc broq pajàu. Wop qmang ka au khoe tanap: Arôn xam kon haq hi kaq jam aih. 32 Mahaq pì ep bùh đac jam xan ƀênh ma oe rah. 33 Ta tapèh hì pì ùh jah loh enh gùng ka qmang traiq taglàm trùh jò hì padèch atŏc pì khoe jah gêh, majah qmang aih bìac padèch atŏc pì ep dìq tapèh hì. 34 Rìm yiniq ma khoe broq hì kô aih dìq Chuaq Jêhowa khoe tanap thê, đòeq baxon yiniq lui ka pì. 35 Qmang aih, pì ep oe tapèh hì tapèh mang ta qmang traiq taglàm, wèq tiaq bàu Chuaq Jêhowa thê, đòeq pì ùh hìaq cachìt, majah qmang aih haq khoe tanap thê au qmang aih. 36 Arôn xam ƀài kon calô haq broq tiaq rìm trong wop qmang ka bàu Chuaq Jêhowa tanap thê.