1 Trùh hì rahem, Môise creo ka Arôn xam ƀài kon calô haq xam ƀài gucraq Isorali, 2 khoe aih haq doe ka Arôn: Rùp moeq toq ƀo calô đòeq broq ramènh baxon yiniq lui, moeq toq trìu calô broq ramènh bùh, dìq ùh ùh i ka xìt habau, dèch atŏc enh ngèa Chuaq Jêhowa. 3 Ìh anoe ka mangai Isorali qmang kô: pì rùp moeq toq bubi calô broq ramènh baxon yiniq lui, moeq toq ƀo kon xam moeq toq kon trìu ùh i ka xìt habau, khoe jah moeq hanam, đòeq broq ramènh bùh, 4 moeq toq ƀo kon, moeq toq trìu calô đòeq broq rmènh waiq kan catèm, đòeq dèch atŏc enh ngèa Chuaq Jêhowa, xam moeq ramènh xep i dàu; majah qmang aih hì kô Chuaq Jêhowa hi loh ti pì. 5 Qmang aih wì aràng trùh enh ngèa ka qmang traiq taglàm ƀài ngè Môise khoe thê, khoe aih dìq ka mangai Isorali trùh haten yòng enh ngèa Chuaq Jêhowa. 6 Môise doe: Kô ƀài bàu Chuaq Jêhowa tanap; aih drah broq beq aih èh kan ranhòm da Chuaq Jêhowa hiloh ka pì 7 Khoe aih Môise doe ka Arôn: Ìh thia ten ka prang tadreo dèch ramènh baxon yiniq lui xam ramènh bùh da ìh beq, đòeq baxon yiniq lui cla ìh xam dìq da wì, dèch ramènh am dìq ka mangai đòeq baxon dawì yiniq lui wop qmang ka Chuaq Jêhowa khoe thê.

8 Arôn hi lam haten ka prang tadreo, pàc ƀo calô ma đòeq broq ramènh baxon yiniq lui da cla. 9 Ƀài kon calô haq aràng mahim trùh; haq poh deh hadrang tì, xùt roc haki taprang tadreo, khoe aih ùc mahim nòe jènh prang tadreo. 10 Haq yŏc aràng bùh taprang tadreo bòq, baiq toq plì crŏng xam bòq ratang ajang clèm. 11 Èh wa jam wa akia aih, haq thê wì qnoh bùh enh gùng ka traiq lình

12 Khoe ka aih, haq pàc kon rmènh đòeq broq ramènh bùh. Ƀài kon calô Arôn aràng mahim trùh, haq pùc dudan enh crŏng prang tadreo. 13 Wì haq hanoh aràng ka Arôn jam ramènh bùh xah loh tang haqnech xam gàu, khoe aih haq bùh dŏng taprang tadreo. 14 Khoe aih haq qnheo pù cliac, xam ƀài jo, aràng bùh ramènh bùh taprang tadreo.

15 Khoe ka aih Arôn aràng kon ramènh đòeq dèch am dìq ka mangai, rùp bubi calô đòeq broq ramènh baxon yiniq lui ka wì, jêh haq tadreo dèch broq ramènh baxon yiniq lui tìah ka khoe broq ka bubi adroe. 16 Haq hadai dèch ramènh bùh wop qmang ranenh khoe thê. 17 Tìa aih, haq aràng ramènh xep, cadop yŏc bình moeq xŏng qnàng lam bùh taprang tadreo, enh gùng ka ramènh bùh disroq. 18 Haq hanoh pàc ƀo calô hadròng xam trìu calô đòeq broq ramènh waiq kan catèm am dìq ka Isorali. Ƀài kon calô Arôn aràng mahim trùh ka haq, èh haq pùc dudan taprang tadreo. 19 Wì hadai aràng ka haq bòq ƀo xam da trìu calô, tênh, bòq pù cliac, baiq toq plì crŏng, bòq ratang ajang clèm; 20 Đòeq bòq kô enh qnhèq ka canòh, khoe aih bùh taprang tadreo. 21 Khoe aih, Arôn yŏc canòh xam cataih jo pah qma nhu lam hnhu hlài enh ngèa Chuaq Jêhowa, wop qmang ka bàu Môise khoe thê. 22 Arôn dèch tì tangèa ta mangai Isorali waiq xôq ramot am ka wì; atìq ka dèch ramènh baxon yiniq lui, ramènh bùh xam ramènh waiq kan catèm, khoe aih haq hi cadiang loh khoe ka prang tadreo. 23 Môise xam Arôn mùt ta traiq taglàm, jò loh enh aih wa waiq xôq ramot hòm ka wì, kan ranhòm da Chuaq Jêhowa loh ti mangai Isorali: 24 moeq pla ùnh oe enh ngèa Chuaq Jêhowa blè qngah bùh cheo dŏng ramènh bùh xam bòq taprang tadreo. Dìq dŏng ka Isorali hnoq qmang aih rìm ngai dêh bàu lem bùi rai hacùn cràng taqneq.