1 Baiq toq kon calô da Arôn aih la Nađap xam Abihu, wa wê deh abôq, tah ùnh tah gahnàu ta-aih rai dèch moeq yiniq ùnh crài enh ngèa Chuaq Jêhowa; ùh tiaq ranenh haq thê. 2 Moeq pla ùnh enh ngèa Chuaq Jêhowa blè qngah bùh cheo wa haq èh wa hi cachìt enh ngèa Chuaq Jêhowa. 3 Môise hi doe ka Arôn: Aih raq trong Chuaq Jêhowa khoe paqnoh jò haq doe:

Arôn oe hatinh.

4 Môise creo ka Misa-ên xam Ênsaphan, baiq ngai kon da Uxi-ên, dùch da Arôn, haq doe: Thia ma haten tòng hanang wa oh daq da pì loh enh gùng khoe ka nòe hadròeh, qnoh khoe ka traiq lình. 5 Qmang aih, wì lam haten tòng hanang oe raq caxùnh eo đêq enh dalam loh enh gùng ka trai lình, tiaq bàu Môise khoe thê. 6 Khoe ka aih, Môise doe ka Arôn, Êlê-asa xam Ythama, baiq ngai kon calô haq rameh: Pì paq oe gàu dech hadai apaq hit deh eo, yùq èh loq ep cachìt majah qmang aih Chuaq Jêhowa loq loh nòeh dìq ka Isorali qmòh; mahaq oh daq pì, aih la dìq ka mangai Isorali khòh crò hmoe taiq ùnh bùh cheo da Chuaq Jêhowa khoe plôh loh. 7 Apaq loh khoe qmang traiq taglàm, èh pì loq ep cachìt qmòh; majah qmang aih dàu xùt da Chuaq Jêhowa oe ta pì. Wì hi broq tiaq bàu Môise. 8 Khoe ka aih, Chuaq Jêhowa doe ka Arôn: 9 Jò mùt ta traiq taglàm, ìh xam ƀài kon ìh ùh khòh ôq alac hloe xam ƀài yiniq ôq ma loq bù, ùh meh ìh loq cachìt- aih la ranenh moeq đòe, enh qnhòng kô trùh qnhòng tau, 10 đòeq pì loq hadro trong hadròeh xam trong ùh hadròeh, kan sròeh xam kan ùh sròeh, 11 rai hnài mangai isorali ƀài ramenh Chuaq Jêhowa khoe tanap thê ajang Môise. 12 Môise doe ka Arôn, Êlê-asa xam Ythama, aih la baiq ngai kon calô da Arôn ma oe i, haq doe: Yŏc ƀài ramènh xep ma oe i enh ramènh ma yŏc ùnh đòeq tadreo dèch am ka Chuaq Jêhowa, èh acaq beq paq tah blo, haten ka prang tadreo, majah qmang aih aih la moeq ramènh dìq jaq hadròeh. 13 Ep acaq ramènh kô tanòe hadròeh, majah qmang aih kô raq phàn da ìh xam ƀài kon calô ìh taƀài ramènh yŏc ùnh tadreo dèch ka Chuaq Jêhowa; Majah qmang aih khoe tanap ka au qmang aih. 14 Canòh ma dèch hnhu lam dèch hnhnu hlài, xam cataih hnhu dèch, ìh, ƀài kon calô, xam ƀài kon cadrì ih ep acaq tanòe hadròeh, majah qmang aih ƀài ngè aih khoe jah ìh xam ƀài kon calô ìh, yŏc enh ƀài ramènh waiq kan catèm da mangai Isorali. 15 Wì hi aràng cataih hnhu dèch xam canòh dèch hnhu lam hnhu hlài hloe xan ƀài bòq ma đòeq hubùh, dèch hnhu lam hnhu hlài enh ngèa Chuaq Jêhowa. Ƀài ngè aih dìq jah ìh xam ƀài kon calô ìh tiaq ranenh moeq đòe, wop qmang ka bàu Chuaq Jêhowa khoe tanap thê. 16 Môise ti chaq bubi calô ma palauq đòeq broq ramènh baxon yiniq lui, hnoq wì khoe bùh dŏng, haq nòeh ka Êlê-asa wa Ythama, aih baiq toq kon calô ma oe da Arôn, haq doe: 17 Hagleq chôp ùh kaq jam kon ramènh baxon yiniq lui tanòe hadròeh? Aih xài ngè dìq jaq hadròeh Chuaq Jêhowa khoe am ka chôp, đòeq pòq am yiniq lui da rìm ngai, đòeq broq ramènh baxon yiniq lui ka wì enh ngèa Chuaq Jêhowa. 18 Kô, mahim haq chôp ùh i qmùt tanòe hadròeh; matroq aih chôp ep kaq ramènh qmat tanòe hadròeh, troeq bàu au khoe tanap thê. 19 Mahaq Arôn padreo bàu: Hì kô wa haq khoe dèch ramènh baxon yiniq lui xam ramènh bùh da cla enh ngèa Chuaq Jêhowa, mahaq kan habo khoe loh ka au qmang kô, tàng joq hì kô au acaq tam ramènh baxon yiniq lui, aih lem ka manoh Boc Plình loq ùh? 20 Bàu aih, haq lem deh ka manoh Môise.