1 Chuaq Jêhowa doe ka wa Môise wa Arôn qmang kô: 2 Thê anoe ka mangai Isorali rameh: taƀài ngè ma rìh ta crong taneh, kô ƀài ngè pì ma khòh kaq: 3 Waq toq ngè cleq i cachop jo tawah, capiang jo talah baiq, loq tacai, aih lòh pì kaq. 4 Mahaq ùh khòh kaq ngè leq toq tacai dech, ùh meh ngè leq i toq cachop jo tawah: troeq lŏcđa, haq loq tacai, yàng haq ùh i cachop jo tawah; aih la ngè ùh sròeh ka pì. 5 Tiếng cội-rễ là “arnebeth,” một thứ loài vật chúng ta biết không quả quyết, nhưng giống tựa như thỏ rừng và hay nhơi, cani tagùng, haq tacai, mahaq ùh i ka cachop tawah, aih ep ngan haq aih ngè ùh sròeh; 6 tho tarôm wang; haq tacai mahaq ùh i ka cahop tawah; dài majah ngan haq ùh hruah 7 chùa, yac ka haq i cachop tawah, mahaq ùh tacai, aih ùh sròeh ka pì. 8 Pì ùh khòh acaq jam hanoh ùh khòh poh ta hanang ƀài ngè aih; ep ngan ƀài ngè aih ùh sròeh ka pì. 9 Ƀài ngè rìh tadiac pì ma khòh kaq, aih ƀài ngè leq, yac ka tadiac rasìq, yac ka oe tadiac, ma i hakìa i cachep. 10 Mahaq ngè leq yac ka tadiac rasìq, yac ka tadiac, aih la bài ngè xêh tadiac, mahaq ùh i ka hakìa ùh i ka cachep, aih ùh lòh pì kaq, ep ngan aih la ùh sròeh ka pì. 11 Ƀài ngè kô, pì ep ramòt, ùh lòh acaq jam haq, ep cadròt ka hanang haq. 12 Ƀài ngè tadiac ma ùh i ka hakìa ùh i ka cachep, pì ep ngan aih la kan ramòt ka pì. 13 Kô ƀài adrech chìm pì ma ep ngan haq amùa, ùh khòh kaq, aih la: cliang, cliang kèn xam cliang cliu. 14 Cliang gòh xam ƀài cliang gam, tiaq tang adrech da haq; 15 hloe xam ƀài adrech ac, 16 chìm đađiu, da-ôh, chìm diac raxìq, xam rìm adrech hatìah ka wì haq; 17 chìm da-ôh qyoh, cli koc, da-ôh kàn, 18 da-ôh taboc, da-ôh tađùng hawit, cliang diac raxìq, 19 cli koc, chìm yiac xam ƀài hadrech hatìah; chìm tèn panài xam racàt. 20 Ƀài ngè qyêq ma loq pan, lam pôn toq jènh, aih pì ep ngan haq amùa ramòt. 21 Mahaq ƀài ngè qyêq loq pan rai lam pôn toq jènh, pì jah acaq ƀài maleq i jènh aplôh ta taneh. 22 Aih la lìp tiaq deh adrech haq, hadro tiaq deh adrech haq, lìp tùc tiaq deh drech haq, canhenh tiaq deh adrech haq. 23 Ƀài ngè qyêq qnoeq loq pan i pôn toq jènh, aih pì ep ngan haq amùa ramòt. 24 Taiq ƀài adrech aih èh pì majah loh ka ùh hruah; cabô troq hanang ƀài adrech aih loh ka ùh hruah trùh dixèq clam. 25 Cabô wê hanang ƀài ngè aih ep rùh deh eo, èh loh ka ùh hruah trùh xèq clam. 26 Ƀài ngè leq ùh i ka cachop tapah, èh ùh tacai, aih dìq ùh hruah ka pì; cabô bèq aih èh loh ka ùh hruah. 27 Ƀài ngè ma lam pôn toq jo, waq toq maleq lam xi capiang jènh, ma aih èh ùh sròeh ka pì; cabô bèq hanang ngè aih loh ka ùh hruah trùh xèq clam, 28 Cabô wê hanang ngè aih ep rùh dèh eo yôh, èh amùa trùh xèq clam; ƀài ngè aih ùh hadròeh ka pì. 29 Ƀài ngè moq ta taneh, kô ƀài ngè ma ùh hruaq ka pì: chôn, cani, xam rìm adrech cadaq ma kàn. 30 Hùc hàc, tacot, cadaq, qmòq, xam bon. 31 Ƀài adrech ma qyoh qyêq, ƀài adrech aih ùh hruah ka pì; cabô bèq hanang haq aih èh loh ka ùh hruah trùh xèq clam 32 Ùh dèh yac ka ngè cleq, waq toq ƀài ngè kô cachìt clìh tùc enh qnhèq, aih èh dìq loh ka ùh hruah, yac ka ngè broq xi long, xi akia, eo yôh, cabàu, aih la ƀài dahwèq wì maloq xan waq dèh yôt; ep tàm ƀài ngè aih tadiac, loh ka ùh hruah trùh xèq clam, khoe aih èh men jah hruah hlài. 33 Tàng moeq taƀài yiniq aih taclìh troq cabi tùng, rìm dahwèq ma tah enh dalam dìq loh ka ùh hruah; cabi tùng aih ep tùq đac. 34 Yac ka dahwèq acaq xam ngè ôq leq, yac ka tah ta cabi tùng taneh leq mahaq diac enh cabi tùng aih troq catôh mùt, aih èh top kan ùh hruah. 35 Yac ka ngè cleq ùh dèh waq toq hanang ƀài yiniq aih hi taclìh troq, aih hi top kan ùh hruah; yac ka tanùh yac ka gŏc awìh dìq ep tùq ka padah; haq khoe ùh hruah; pì ep ngan haq ùh hruah.

36 Mahaq thòng diac qnì, ùh meh moeq toq bau i bàc diac, aih dua hruah; mahaq waq toq cabô ma hi troq hanang ƀài ngè cachìt aih èh hi top kan ùh hruah. 37 Tàng i cleq enh hanang cachìt aih clìh troq ta adrech wì ma rai, adrech aih èh dua hadròeh. 38 Mahaq tàng wì pùc diac ta adrech aih èh i cleq enh hanang taclìh troq, adrech aih èh loh ka pi hruah am ka pì. 39 Jò moeq toq ngè khòh broq dahwèq acaq mahaq loh ka cachìt, waq toq cabô troq hanang haq aih mangai aih loh ka ùh hruah trùh jò dixèq. 40 Cabô acaq hanang jam cachìt aih mangai aih ep rùh dèh eo yôh, èh top kan ùh hruah trùh xèq; cabô tòng hanang jam cachìt aih ep rùh dèh eo yôh, èh top kan ùh hruah trùh xèq clam. 41 Rìm yiniq leq ma moq ta taneh aih dìq dŏng ramòt am ka pì, ùh khòh kaq jam haq. 42 Qmang aih ùh khòh acaq jam ƀài ngè moq ta taneh, aih la ƀài ngè moq deh xi cliac, ngè lam xi pôn toq jo qnì lam xi bàc toq jo qnì, majah qmang aih ƀài aih la kan ramòt. 43 Pì apaq đòeq ka chac rađeh top kan amùa enh ƀài ngè kô. Apaq broq ka rađeh loh ka ùh hruah enh ƀài ngè kô ùh meh đòeq ka ƀài ngè kô broq ka rađeh loh ùh hruah. 44 Majah qmang aih au kô raq Jêhowa Boc Plình pì; au kô raq hadròeh, dài pì majah ep wìh wìa hadròeh. Pì apaq đòeq moeq toq ngè ma ti moq ta taneh broq amùa ka chac pì. 45 Majah qmang aih au kô raq Jêhowa, Mangai khoe qnoh pì loh khoe ka gùng Êdip đòeq broq Boc Plình pì; pì ep wìh wìa hadròeh, majah qmang aih au kô raq hadòeh. 46 Aih la ƀài ranenh trong ƀài ngè aban, ƀài chìm ta trŏc, ƀài ngè rìh tadiac xam ƀài ngè moq ta taneh. 47 đòeq hadro canau ngè ùh hadròeh xam ngè hadròeh, ngè leq khòh kaq xam ngè ùh khòh kaq.