1 Chuaq Jêhowa doe ka Môise qmang kô: 2 Anoe ka mangai Isorali qmang kô: Jò moeq ngai gucadrì hadràp èh ha-uang loh moeq toq kon calô, aih loh ka ùh hruah ta tapèh hì, qmang ka jò haq i khê. 3 Trùh hì rahem wì broq ramènh kat akia ka kon nga.

4 Khoe aih mangai cadrì ep gòm ta piq jàt hì jò mahim đeh jah basròeh, ùh khòh poh ta ngè hadròeh leq hadai ùh khòh lam trùh tanòe hadròeh trùh jò basròeh jah gêh.

5 Tàng haq ha-uang kon cadrì, aih èh ùh sròeh ta qne khê, qmang ka jò haq i khê; ep apàm ta tadràu jàt tadràu hì dôq mahim rađeh jah basròeh. 6 Jò basròeh rađeh yac ka ha-uang kon calô yac ka kon cadrì, mangai cadrì kô ep dèch ka pajàu ramènh ajang qmang traiq taglàm moeq toq trìu jah moeq hanam, đòeq broq ramènh bùh, moeq toq kon trù ùh meh moeq toq kon trù braih đòeq broq ramènh baxon yiniq lui. 7 Mangai pajàu ep dèch ƀài kon ramènh aih enh ngèa ka Chuaq Jêhowa, broq ramènh baxon yiniq lui ka haq; aih èh haq jah basròeh khoe ka bìac đeh ma da hrôq mahim. Aih la ranenh trong mangai gucadrì jò ha-uang yac ka kon cadrì qnì loq kon calô qnì. 8 Tàng haq ùh hlàt i ka rađeh moeq toq trìu kon, aih ep rùp baiq toq trùh braih, ùh meh baiq toq trù kon, moeq toq đòeq broq ramènh bùh, moeq toq đòeq broq ramènh baxon yiniq lui; mangai pajàu broq ramènh baxon yiniq lui ka haq, aih èh haq jah sròeh.