1 Chuaq Jehowa doe hòm ka wa Môise wa Arôn: 2 Jò cabô ta akia haq loh ka calan, plôh pa-êh patênh, ùh meh loh ka preo taboc, tìah gleq ka loq loh ka bacùn, aih èh wì ep qnàng haq trùh ajang pajàu Arôn, tàng meh trùh ajang ƀài kon calô haq aih la ƀài pajàu. 3 Mangai pajàu hi ngan ta chac haq; tàng joq hnoq xàc jang xìt aih loh ka taboc, tàng xìt aih kaq yeo jrùq ka akia ta chac, aih raq teo bacùn: mangai pajàu ngan èh khoe aih hi doe: mangai kô khoe ùh sròeh. 4 Tàng xìt taboc ta chac mangai aih, teo aih ùh hìaq yeo jrùq ka akia, èh xàc ùh hìaq loh ka taboc, aih pajàu ep padràng đòeq crài haq aih ta tapèh hì. 5 Trùh hì tapèh, mangai pajàu ngan hòm, tàng joq xìt oe pang aih raq, pi lênh tam ta akia, aih èh ep lah padràng đòeq haq tam haq moeq yàng, hadai tapèh hì hòm. 6 Trùh hì tapèh, mangai pajàu ngan lauq hòm; tàng joq xìt aih khoe bah, pi lênh ta akia, aih èh mangai pajàu hi doe mangai aih jah sròeh; aih la rahênh talêh. Mangai aih ep rùh dèh eo yôh, aih èh hi jah sròeh. 7 Mahaq tàng atìq ka jò haq khoe trùh enh ngèa pajàu đòeq jah doe đeh kô sròeh, yàng kan pa-êh haq oe plôh hlài ta akia, mangai aih èh ep trùh enh ngèa pajàu yàng atìq hòm. 8 Mangai pajàu ngan da haq, tàng joq talêh aih khoe lênh ta akia aih ep doe haq aih ùh sròeh; aih raq bacùn. 9 Jò i moeq teo bacùn tachac cabô, aih ep aràng mangai lam patô rađeh enh ngèa mangai pajàu. 10 Mangai pajàu hi ngan ka haq; tàng joq i calan taboc ta akia broq ka xàc loh ka mang, èh i moeq trong xech gòh nòe calan taboc aih, 11 aih raq kan bacùn khoe dùnh ta chac mangai aih, mangai pajàu hi doe mangai kô ùh sròeh, ùh dùh padràng wì haq hòm, majah qmang aih khoe ùh hruah. 12 Manhaq tàng hnoq xìt bacùn aih khoe xìa jàp tachac mangai ma i teo aih, enh gàu trùh jènh, jàp nòe leq mangai pajàu jah hnoq, 13 aih èh mangai pajàu ep ngan ka haq; tàng joq hnoq xìt bacùn aih khoe xìa tachac, aih èh jah doe haq aih khoe hruah; haq khoe loh ka mang dong tachac, dài majah khoe sròeh. 14 Mahaq jò leq plôh loh xech gòh, mangai aih èh ùh sròeh. 15 Jò mangai pajàu hnoq xech gòh aih ep doe mangai aih la ùh sròeh, xech gòh aih la ùh sròeh; aih raq kan bacùn. 16 Mahaq tàng joq xech gòh aih loh ka bah, loh hlài ka mang, mangai aih ep lam trùh ajang mangai pajàu. 17 mangai pajàu ngan da haq, èh tàng joq xìt aih khoe loh ka mang, aih èh ep doe mangai i xìt aih sròeh, majah qmang aih khoe jah sròeh. 18 Jò moeq ngai leq tachac haq i teo xìt pa-êh khoe brêh, 19 èh jang xìt pa-êh aih plôh ka calan taboc ùh meh gòh gòh, mangai aih ep lam patô rađeh enh ngèa mangai pajàu; 20 mangai pajàu ngan da haq; tàng joq teo aih kaq yeo jrùq ka akia èh xàc loh ka mang, aih èh mangai pajàu ep doe haq aih ùh sròeh; aih raq kan bacùn khoe kaq jang xìt patênh. 21 Tàng joq mangai pajàu ngan, ùh hnoq xàc taboc jang aih, ùh hìaq kaq yeo jrùq ka akia, èh hnoq khoe loh ka bah, aih èh ep padràng đòeq mangai aih ta tapèh hì. 22 Tàng joq teo aih lênh jàp ta akia, mangai pajàu ep doe haq aih khoe ùh sròeh; aih raq teo bacùn. 23 Tàng xìt aih oe moeq nòe ùh tablòq, ùh lênh tam, aih la xìt pa-êh; mangai pajàu hi doe mangai aih la hadròeh. 24 Jò cabô i xìt padŏc ùnh ta akia, èh nòe padŏc aih loh ka taboc gòh ùh meh loh ka bah bah, 25 Mangai pajàu ngan da haq, tàng joq xìt aih loh ka taboc, èh tàng nòe xìt aih loh ka yeo jrùq ka akia, aih la kan bacùn plôh nòe xìt padŏc. 26 Tàng mangai pajàu ngan ùh hnoq xàc taboc tanòe teo padŏc, ùh hìaq yeo jrùq ka akia, èh hnoq khoe bah bah, aih ep padràng đòeq haq crài ta tapèh hì 27 Trùh hì tapèh mangai pajàu ngan haq, hnoq teo aih lênh ta akia, aih ep doe haq aih khoe ùh sròeh; aih raq kan bacùn. 28 Mahaq tàng xìt aih ùh tablòq, ùh lênh ta akia èh khoe loh ka bah, aih la calan padŏc. Mangai pajàu ep doe haq aih sròeh, aih la xìt padŏc. 29 Tàng jò moeq ngai calô qnì loq cadrì qnì i habau tagàu, ùh meh nòe kiang, 30 aih èh mangai pajàu hi ngan habau aih. tàng habau aih kaq yeo jrùq ka akia, hon xàc qyêq broq ka drinh drinh, mangai pajàu ep doe haq aih khoe ùh sròeh; aih raq teo bacùn nòe gàu ùh nòe kiang. 31 Mahaq tàng jò mangai pajàu ngan xìt aih, hnoq xìt aih ùh i kaq yeo jrùq ka akia, èh hnoq nòe aih ùh i ka xàc gam, aih èh ep lah đòeq haq aih oe đeh crài ta tapèh hì. 32 Trùh hì apèh mangai pajàu ngan habau aih, tàng joq habau aih ùh hìaq lênh tam, ùh i ka xàc drinh drinh, èh ùh hìaq yeo jrùq ka akia, 33 qmang aih mangai aih ep got xàc got xàc mom, mahaq ùh jah got ajang habau, èh mangai pajàu hi lah đòeq haq aih oe đèh crài ta tapèh tam moeq yàng hòm. 34 Khoe aih trùh hì tapèh, mangai pajàu hi ngan, tàng habau ùh hìaq lênh tam ta akia, ùh yeo jrùq ka akia, aih èh mangai pajàu hi doe haq aih sròeh; mangai yinìq aih ep rùh dèh eo yôh, aih èh jah sròeh. 35 Mahaq atìq ka jò khoe jah doe haq sròeh, yàng èh habau aih oe raq lênh ta akia, aih èh mangai pajàu ep ngan hòm. 36 Tàng xìt habau khoe lênh ta akia, mangai pajàu pi ep chaq waq ka hnoq xàc drinh đrinh, mangai aih khoe ùh sròeh. 37 Mahaq tàng hnoq habau tìah ka oe pang aih raq, èh khoe plôh xàc gam, xìt aih khoe brêh: Haq aih khoe jah sròeh èh mangai pajàu ep doe mangai aih khoe jah sròeh. 38 Jò mangai calô qnì cadrì qnì ta akia i ƀài xìt taboc, 39 mangai pajàu hi ngan. Tàng ta akia i ƀài xìt taboc nget, aih la teo taboc loh ta akia: haq aih dua sròeh. 40 Jò moeq ngai taluih xàc, haq aih la mangai clŏc gàu: haq aih dua sròeh. 41 Tàng gàu haq taluih enh ngèa, aih la mangai clŏc ngòng: haq dua sròeh. 42 Mahaq tàng tanòe clŏc enh ngèa qnì clŏc enh rù i moeq teo taboc gòh, aih raq bacùn plôh loh jang teo clŏc enh ngèa ùh enh rù. 43 Mangai pajàu ep ngan da haq; tàng joq teo calan tanòe clŏc gàu enh ngèa ùh qnì ùh enh rù loh ka taboc gòh, qmang ka kan bacùn ta akia chac mangai, 44 aih mangai kô khoe bacùn, mangai pajàu ep doe haq la mangai ùh sròeh majah qmang aih khoe bacùn tagàu. 45 Qmang aih, yac ka cabô waq toq hi loh ka bacùn, dìq ep caxùnh eo cwàn hit ka hyah hyai, xàc gàu caqnaih tù ta hadrò rai cachech creo: Ùh sròeh! Ùh sròeh! 46 Waq toq haq oe raq i yinìq, aih haq oe raq ùh sròeh, ep oe đeh crài enh gùng ka traiq lình.

47 Jò eo cwàn loh ka camo qmang ka xìt bacùn, aih yac ka broq xi xàc trìu xi brai lan, 48 ùh meh yac ka yiniq cleq atênh xi xàc trìu, xi brai lan, xi akia ùh meh yac ka broq xi akia. 49 Tàng teo aih nget nget ùh meh gòh gòh, ta cwàn eo qnì ta akia qnì, ta ngè atênh ùh meh ta caxi brai ùh meh ngè ma broq xi akia, aih ep ngan aih la tìah ka bacùn, ep aràng patô ka mangai pajàu. 50 Mangai pajàu hi ngan, khoe aih lah đòeq crài ngè khoe camo aih ta tapèh hì. 51 Trùh hì tapèh, mangai pajàu ep ngan hlài; tàng joq baxìt camo aih hlàng ta eo cwàn, ngè atênh ùh ta caxi brai, ta akia ùh meh ngè broq xi akia, aih la kan baxìt camo ùh dìq ka kan đùc; dahwèq aih la ùh sròeh. 52 Haq ep bùh đac eo cwàn, xia ma atênh yac ka caxi brai xi xàc trìu yac ka caxi brai lan yac ka rìm dahwèq ma broq enh akia ma khoe i baxìt camo, aih la baxìt camo ùh catech ka kan đùc; ep bùh đac. 53 Tàng jò mangai pajàu ngan, ùh hnoq kan camo aih hlàng ta eo cwàn, ta xia atênh ta caxi brai, ùh meh ta dahwèq broq xi akia, 54 aih haq ep thê wì aràng rùh ngè ma i baxìt camo aih, khoe aih don đòeq crài ngè aih moeq yàng hòm ta tapèh hì. 55 Jò khoe rùh mangai pajàu ngan hòm, tàng kan camo aih ùh taclah ùh hlàng tam, ngè aih la ùh sròeh: ìh ep lam bùh đac, 56 Tàng jò khoe rùh, mangai pajàu hnoq nòe aih khoe taclah, aih ep doeh đac haq khoe ka cwàn eo, xia atênh khoe ka caxi brai 57 Tàng teo camo aih oe plôh hòm ta eo cwàn, tanòe xia atênh ta caxi brai, ùh meh ta ngè leq broq xi akia, aih ep ngan tìah teo bacùn, ep bùh đac.

58 Mahaq eo wàn, xia atênh ùh meh caxi brai, ùh meh dahwèq leq broq xi akia ìh ma khoe rùh, teo baxìt camo khoe hnhung, aih rùh tam moeq yàng hòm, aih èh hi sròeh. 59 Aih la ranenh trong baxìt camo tìah kan bacùn ta eo cwàn broq xi xàc trìu xi brai lan, ta xia atênh ùh ta caxi brai ùh meh ta ngè cleq broq xi akia, tiaq ranenh aih đòeq hu doe haq sròeh loq ùh sròeh.