1 Baxèm Boc plình broq plình crŏng taneh.

2 Jò aih taneh ùh i dua dang cleq rai dech do, kan clam oe enh qnhèq ka kòe jrùq; Yiang da Boc Plình pan axràng enh qnhèq ka diac. 3 Boc Plình doe: Ep i kan qngah; aih hi i kan qngah. 4 Boc Plình hnoq kan qngah joq lem geo, haq hi lah kan qngah loh khoe kan clam. 5 Boc plình yiniq am ka kan qngah aih la dahì; kan clam aih damang. Qmang aih i dixèq xam disroq; aih la hì baxèm.

6 Boc plình doe hòm: Ep i mòeq toq adreo dech oe qne diac đòeq lah diac khoe ka diac. 7 Haq broq loh adreo dech; lah diac enh qneq ka adreo dech aih khoe ka diac oe ta adreo dech, aih hi qmang aih. 8 Boc Plình yiniq am ka adreo dech aih trŏc. Qmang aih i dixèq xam disroq; aih la hì baiq.

9 Boc plình doe hòm: Diac oe enh qneq ka trŏc ep apùq hlài mòeq nòe, èh waq ka loh nòe croh srênh; aih hi i wop qmang aih. 10 Boc plình yiniq am ka nòe croh srênh aih taneh, èh nòe diac ma apùq aih diac raxìq. Boc plình hnoq qmang aih joq lem geo. 11 Boc plình doe hòm: Taneh ep hon loh long nhat, nhat loh pliang adrech, long caqmon loh plì, tiaq deh tang yiniq đòeq i deh clong adrech tachac ta taneh, aih hi i qmang aih. 12 Taneh hon long nhat: nhat loh clong tiaq deh tang adrech, long loh plì i clong tachac cla, tiaq tang adrech. Boc plình hnoq qmang aih joq lem geo. 13 Qmang aih i di xèq xam disroq; aih la hì piq.

14 Boc plình doe hòm: Ep i ƀài yiniq qngah oe ta adreo dech ta trŏc đòeq lah qnoh dahì xam damang rai broq teu hu hadro đòeq jò, hì xam hanam. 15 Èh đòeq broq ƀài yiniq qngah ta adreo dech ta trŏc đòeq sreo qnoh ta taneh; aih hi i qmang aih. 16 Boc plình broq baiq toq kan qngah kàn, ma yeo kàn đòeq wèq dahì, ma yeo qyoh đòeq wèq damang; Haq hadai broq loh ƀài halŏng. 17 Boc plình đòeq ƀài aih ta adreo dech ta trŏc, đòeq sreo qngah taneh. 18 đòeq wèq dahì xam damang, đòeq hulah qnoh kan qngah xam kan clam. Boc plình hnoq qmang aih joq lem geo. 19 Qmang aih i dixèq xam disroq, aih la hì pôn.

20 Boc plình doe hòm: Diac ep loh ƀài ngè rìh ka bàc, xam ƀài adrech chìm ep pan ta taneh, ta adreo dech ta trŏc. 21 Boc plình broq loh ƀài adrech ka kàn kaiq, xam ngè rìh loq tadroq canòm ka diac đòeq jah xêh ka bàc, tiaq deh tang adrech, xam ƀài adrech chìm ma loq pan tiaq deh tang adrech. Boc plình hnoq qmang aih joq lem geo. 22 Boc plình am xôq ramot ka ƀài adrech aih rai thê: Drah xêh tam ka bàc, broq ka bình bauq ta diac raxìq; da ƀài adrech chìm drah xêh ka bàc ta taneh. 23 Qmang aih i dixèq xam disroq; aih la hì padam.

24 Boc plình doe hòm: Taneh ep loh ƀài ngè rìh tiaq deh tang adrech, aih la ƀài ngè ma aban ta hnim, ngè ma loq pan loq moq ta taneh, xam ngè rìh tagùng tago, dìq tiaq deh tang adrech, aih hi i qmang aih.

25 Boc plình broq loh ngè rìh tarôm wang tiaq deh tang adrech, ngè ban ta hnim tiaq tang adrech xam ngè loq moq loq pan ta taneh tiaq tang adrech. Boc plình hnoq ƀài yiniq aih dìq lem geo.

26 Boc plình doe: Beq bèn broq loh kon mangai tìah ka qmù bèn tiaq dua bèn, đòeq wèq ƀài ka ta diac raxìq, ƀài chìm ta trŏc, ƀài ngè ban ta hnim xam ƀài ngè rìh tagùng go, hloe xam ƀài ngè rìh ma loq moq loq pan ta taneh jàp crŏng taneh. 27 Boc plình broq loh kon mangai tìah ka qmù Cla rađeh; Haq broq loh kon mangai tiaq dua Boc plình. Haq broq loh mangai calô xam mangai cadrì. 28 Boc plình am xôq ramot ka kon mangai rai doe: Drah ha-uang, tam ka bàc dôq bình bauq ta crŏng taneh; ep broq ka taneh iu tiaq; ep wèq ngan ƀài ka ta diac raxìq xam ƀài chìm ta trŏc xam dìq dŏng ƀài ngè rìh loq tadroq ta crŏng taneh.

29 Boc plình doe hòm: Kô Au am ka pì rìm adrech nhat loh pliang ma hon jàp ta taneh xam ƀài adrech long i plì ma i clong adrech. Aih èh đòeq broq dahwèq acaq am ka pì. 30 Da ƀài ngè ma rìh tagùng tago, ƀài chìm ta trŏc xam ƀài ngè rìh ma qnoeq ta crŏng taneh, waq toq adrech leq i kan rìh aih èh au am ka wì haq rìm adrech nhat hu broq dahwèq acaq; aih hi i wop qmang aih. 31 Boc plình hnoq rìm yiniq đeh khoe broq aih joq lem geo. Qmang aih, hi i dixèq xam disroq; aih la hì tadràu.