1 Qmang aih trŏc taneh xam rìm yiniq khoe jah broq gêh. 2 Hì tapèh Boc plình broq gêh ƀài yiniq đeh khoe broq, èh hì tapèh, haq padài khoe ka ƀài bìac haq ma broq. 3 Khoe aih Boc plình am xôq ramot ka hì tapèh rai broq hì aih wìa hì hadròeh; majah qmang aih, haq padài ka ƀài bìac khoe broq loh majah qmang aih dìq khoe jah gêh.

4 Aih xèm goe da trŏc xam taneh jò khoe jah gêh, oe ta hì Jêhowa Boc plình broq loh trŏc xam taneh.

5 Jò aih qnhòq i mòeq xèm long qyoh leq plôh tagùng, hadai qnhòq i mòeq goe nhat leq hon taruàng, majah qmang aih Jêhowa Boc plình qnhòq i am mè loh ta taneh, èh hadai qnhòq i cabô abèq ta taneh. 6 Mahaq i hòe diac plôh tŏc enh taneh pùc jàp jìa crŏng taneh. 7 Jêhowa Boc plình yŏc blo taneh mot loh chac mangai, hlui mùt hi hèm ta mùh; aih kon mangai hi wìa adrech rìh i mahua yiang.

8 Khoe aih, Jêhowa Boc plình broq mòeq toq wuàn ta Êđen, tangèa ƀè mat mahì loh, rai đòeq mangai haq maneo broq loh oe ta aih. 9 Jêhôwa Boc plình broq ka taneh hon loh ƀài adrech long lem ka mat hnoq, plì aih jìang ka kaq; taqne wuàng aih i long kan rìh xam long loq trong lem trong dù.

10 Mòeq cròng diac loh enh Êđen đòeq pùc ta wuàn; khoe èh enh aih haq talah broq pôn halah diac. 11 Yiniq halah diac ma baxèm aih Pisôn; halah aih hìu dudan gùng gùng Hawila, aih nòe i wang. 12 Wang gùng aih lem raya; ta aih hadai i gahnàu xam ngŏc nget. 13 Yiniq halah diac ma baiq aih Gihôn, hìu dudan gùng Cuso. 14 Hiniq halah diac ma piq aih Hiđêke, hìu ta ƀè mat mahì loh da gùng Asiri, halah diac ma pôn aih la Ôphorat.

15 Jêhowa Boc plình aràng mangai mùt ta wuàn Êđen hu abèq rai wèq wuàn. 16 “Jêhôwa Boc plình doe: Ìh jah acaq dìq dŏng ƀài plì long ta wuàn; 17 mahaq long loq trong lem trong dù ìh ùh jah kaq; majah qmang aih jò ìh kaq, ìh ep cachìt”.

18 Jêhowa Boc Plình doe: “Kon mangai oe moe ngai ùh lem. Kô èh Au broq mòeq ngai đòeq wiang, dôq ma hatroq qmòe ka haq.”

19 Jêhowa Boc plình yŏc taneh broq loh ƀài ngè rìh tagùng, ƀài chìm ta trŏc khoe aih ajèn aràng enh ngeà Ađam đòeq ngan haq yiniq am ka ƀài aih qmang leq cadèh; waq toq yiniq leq Ađam yiniq am aih hi wìa yiniq da ma aih. 20 Ađam yiniq am ka ƀài ngè rìh aban ta hnim, ka ƀài chìm ta trŏc xam ƀài ngè rìh tagùng go; mahaq da Ađam aih chaq ùh jah mòeq cabô ma hatìah ka rađeh đòeq hu wiang ti haq. 21 Boc plình broq ka Ađam kùi ùh hmàng, jò haq kùi pi hmàng Boc plình hi yŏc mòeq hadrang yimìa, khoe èh yŏc xech hi baxìa hlài. 22 Jêhowa Boc Plình yŏc caxènh yimìa ma khoe yŏc enh Ađam broq loh mòeq ngai cadrì, aràng trùh ajang Ađam. 23 Ađam doe:

24 Qmang aih, dài mangai calô majah ep talah dèh ka miq baq đòeq hu hatop dèh ti mai, aih èh wa hi wìa mòeq xech.

25 Ađam xam mai dìq baiq rahòng, mahaq ùh camaih.