4
Ca-in xam Abên.
1 Ađam acaq oe ti Êwa, aih mai dadeh; Êwa hadràp ha-uang loh Ca-in. haq doe: “Canòm ka Jêhowa wiang am, au men jah ha-uang loh mòeq ngai. 2 Atìq ka aih haq ha-uang loh oh da Ca-in aih la Aƀên; Aƀên broq mangai ban trìu, Ca-in aih mangai abèq ruàng.
3 Atìq ka aih ùh dùnh, Ca-in aràng dahwèq loh enh taneh broq ramènh dèch ka Jêhowa. 4 Aƀên hadai yŏc deh enh calùh trìu ma ramua xam bòq haq. Jêhowa ngan toq da Abên rai dì yŏc da haq, 5 mahaq ùh blèch ngan Ca-in èh hadai ùh dì yŏc ramènh da haq; dài aih Ca-in majah nòeh toq kùp hadrò. 6 Jêhowa bòch Ca-in: Gleq ìh majah nòeh, hagleq ìh ma toq kùp hadrò? 7 tàng joq ìh broq troq, ma ùh joq da ìh khoe jah dì qmòh? Mahaq tàng joq ìh broq ùh troq aih èh yiniq lui khoe rap đòeq ìh ajang trong qmang, haq enh ka ìh pi cajaq; mahaq ìh ep wèq haq.
8 Ca-in doe deh ka Aƀên aih oh cla haq. “Beq ba lam taruàng”. Jò wa haq oe taruàng, Ca-in clàm ta Aƀên aih oh haq, rai jêh đac. 9 Jêhowa bòch Ca-in: Aƀên oh ìh taleq? haq tèu: Au ùh qnì, au ma mangai ngan deh oh qmòh? 10 Jêhowa doe: Ìh khoe broq cleq qmang aih? Bàu mahim oh da ìh enh taneh creo dang khoe trùh ta au. 11 Manòeq kô èh, ìh ep pòq kan hamaiq enh taneh, aih la taneh ma khoe hah hacùng lonh mahim oh ìh majah qmang aih tì kŏng cla ìh khoe broq ta-ùc. 12 Jò ìh tamìt acaq, taneh pi loh dahwèq ka ìh hòm; ìh ep lam jac rai amot jàp jìa ta crŏng taneh. 13 Ca-in anoe ka Jêhowa: Kan baxa au trap hrìn ùh hlàt pòq. 14 Hì kô ìh khoe hnan qnoh au loh enh taneh kô, au wia ka mat ìh, ep lam palac amot ta taneh; èh i cabô chaq hnoq au, wì hi jêh đac. 15 Jêhowa padreo bàu “Ùh i qmang aih, tàng cabô jêh đac Ca-in, mangai aih ep chìuq kan patem chau tapèh yàng”. Jêhowa hi pateo hadro ta chac Ca-in, đòeq ùh hìaq i bô jêh đac jò wì hnoq haq. 16 Ca-in hi lùi khoe ka enh ngèa Jêhowa, lam oe tagùng Nôt, enh pah mat mahì loh da wuàn Êđen.
Xinoe da Ca-in.
17 Ca-in acaq oe deh ti mai, mai haq hadràp ha-uang loh Hênoc; Ca-in broq mòeq toq plài, haq hi creo deh Hênoc tiaq deh yiniq kon calô. 18 Hênoc baq da Yrat, Yrat baq da Mêhuđa-ên, Mêhuđa-ên baq da Mêtusa-ên, Mêtusa-ên baq da Lêmec.
19 Lêmec yŏc baiq toq mai, mòeq ngai yiniq haq Ađa, mòeq ngai yiniq haq Sila. 20 Ađa ha-uang loh Jaƀan, Jaƀan aih la kan cadraq da ƀài mangai rìh roc traiq rai aban ƀài ngè rìh tahnim. 21 Oh haq aih Jiuƀan, aih la kan cadraq da ƀài ngai rawêh broc, hlui taliaq. 22 Sila hanoh ha-uang loh Tuƀan Ca-in, aih la mangai atèm loh ƀài ranac hin xi đùng xi mem. Oh cadrì da Tuban Ca-in aih la Na-ama. 23 Lêmec doe deh ka wa mai:
“Ađa xam Sila, drah tamàng bàu au,
Cadrì da Lêmec, drah tàng bàu au,
Òq au khoe jêh đac moeq ngai, majah qmang aih haq khoe broq ka au habau,
Moeq ngai radam, taiq haq jêh au loh ka pràm,
24 Tàng joq Ca-in jah tapèh yàng patem chau,
Aih èh Lêmec jah tapèh jàt yàng patem chau”.
25 Ađam acaq oe deh ti mai; haq ha-uang loh mòeq ngai kon calô yiniq haq Sêt; majah qmang aih haq doe: “Boc Plình khoe am ònh ka au moeq ngai kon calô qnoeq đòeq hu thai ka Abên, Ca-in ma khoe jêh đac”. 26 Sêt hanoh i moeq toq kon calô, haq yiniq deh ka kon aih la Ênoc. Pang kô kon mangai ma hi creo dang yiniq Jêhowa.