1 Jêhowa doe ka Nô-ê: “Ìh xam dìq ka cadraq ìh mùt taboang beq, majah qmang aih taqnhòng kô, au hnoq ìh aih mangai taq atoq enh ngèa au. 2 Rìm ngè rìh ma hruah moeq adrech ìh wê tiaq ìh tapèh racop, xam calô xam cadrì; ngè rìh ma ùh hruah mòeq adrech moeq racop, xam calô xam cadrì, 3 ƀài chìm hadai moeq adrech ìh wê tapèh racop, xam hmùng xam cadrì đòeq hu wèq adrech jàp ta taneh. 4 Majah qmang aih oe tapèh hì hòm, au broq mè ùc qnoh ta taneh, ta pôn jàt hì xam pôn jàt mang; au hi palùch hreo ta taneh dìq dŏng rìm yiniq au ma khoe broq loh. 5 Khoe aih, Nô-ê broq tiaq rìm yiniq Jêhowa khoe thê đeh broq.

6 Jò diac kàn ma glua jàp ta taneh, aih Nô-ê khoe jah tadràu hrinh hanam. 7 Aih ìq Nô-ê hi mùt taboang deh ti mai, deh ti wì kon xam ƀài kon mai. 8 Ƀài ngè rìh ma hruah xam ma ùh hruah, ƀài chìm, ƀài ngè ma ti moq ta taneh, 9 Tang racop xam calô xam cadrì, xam hmùng xam kan, dìq trùh ta Nô-ê đòeq hu tŏc taboang wop tiaq bàu Boc plình ma khoe tanap thê haq. 10 Khoe ka tapèh hì, i diac kàn trùh ta taneh. 11 Hanam tadràu hrinh da Nô-ê, khê baiq, hì mòeq jàt tapèh, wop hì aih ƀài tamŏc diac enh kòe jrùq haq đoh padah, ƀài đàp enh trŏc hrôq loh; 12 Mè clìh ta taneh pôn jàt hì pôn jàt mang. 13 hadai hì aih raq Nô-ê xam mai haq hloe xam piq ngai kon calô: aih Sem, Cham, Japhèt xam ƀài kon mai haq dìq mùt taboang. 14 Wì haq xam ƀài ngè rìh tagùng tiaq deh tang adrech, ngè ban tahnim tiaq deh tang adrech, ngè ma loq ti moq ta taneh tiaq deh tang adrech, chìm tiaq deh tang adrech, xam dìq ka ƀài ngè ma i panan. 15 Dìq dŏng ƀài ngè ma i hi wa, moeq yiniq baiq toq dìq tiaq Nô-ê mùt taboang; 16 mòeq calô mòeq cadrì, mòeq hmùng mòeq kan, dìq trùh đòeq mùt taboang qmang ka bàu Boc Plình khoe tanap; khoe aih Boc plình hi clênh qmang boang.

17 Diac kàn làp ta taneh pôn jàt hì pôn jàt mang, diac qnìc tŏc tam dèch boang khoe ka taneh. 18 Ta taneh diac kàn tŏc rênh pi cajaq; boang đòng enh qnhèq ka diac. 19 Diac tŏc tam ùh hnau hòm, ƀài bui wang haqnhèq enh caqnàm plình làp dŏng dìq. 20 Diac tŏc yeo haqnhèq tam mòeq jàt padam hagat, ƀài bui wang dìq làp. 21 Dìq ka ƀài ngè rìh ma loq tadroq ta taneh dìq cachìt dŏng ka glàc; bua ka chìm, bua ka ƀài ngè ban tahnim, ngè rìh tarôm xam rìm ngai 22 Ƀài ngè ma i hihèm ta trom mùh ƀài ngè oe ta taneh dìq cachìt. 23 Rìm adrech oe ta taneh dìq cachìt lùch enh kon mangai trùh ƀài ngè rìh ma qnoeq trùh ƀài ngè loq ti moq xam ƀài chìm, toq Nô-ê xam ƀài ngè ma oe ti haq taboang raq ma oe rìh 24 Diac làp ta taneh wop mòeq hrinh padam jàt hì.