1 Mahaq Boc Plình hmàng hlài ka Nô-ê xam ƀài ngè ma oe ta boang ti haq enh ngè ma rìh tagùng brì xam ngè ma aban ta hnim, haq hi thê cayeo hlui ta taneh, aih diac hi talùi. 2 Ƀài tamŏc diac ta kòe jrùq xam ƀài đàp diac ta trŏc hi jah clenh hlài; mè pi clìh hòm ta taneh. 3 Diac talùi yen da adia ta taneh, rai xot rai talùi; ta mòeq hrinh padam jàt hì diac men racòch. 4 Trùh khê tapèh, hì mòeq jàt tapèh boang hi tài ta wang Ararac. 5 Diac xot ka adia trùh khê mòeq jàt; hì mòeq da khê aih, ƀài bui wang men hi hnoq.

6 Jah pôn jàt hì, Nô-ê pèh qmŏc gàu đeh ma broq ta boang, 7 caqnaih mòeq toq ac; ac gliang lam gliang hlài trùh jò diac xot croh ta taneh. 8 Haq hadai caqnaih mòeq toq trù, đòeq hu qnhro ngan diac khoe yeo xot qnhòq. 9 Mahaq trù chaq ùh jah qmòe ajang leq đòeq hu jràp, trù hi pan hlài ta boang ti haq, majah qmang aih diac oe raq jàp jìa ta crŏng taneh. Nô-ê hnhu tì rùp trù, qmùt hlài ta boang ti rađeh. 10 Khoe aih gòm tam tapèh hì, haq hi caqnaih trù loh enh gùng hòm; 11 trùh di xèq trù hlài ta haq, meh oq, ajang mung haq wê ahlài moeq hadrang hla ôliu rìh; Nô-ê loq diac khoe yeo xot ta taneh. 12 Gòm tam tapèh hì hòm, haq hi caqnaih trù; mahaq yàng kô trù pi wìh hlài ta haq hòm.

13 Wop hanam tadràu hrinh qnhòng da Nô-ê, hì mòeq khê mòeq diac khoe xot loh taneh srênh; Nô-ê pèh kùa po boang hu ngan, kô tanheh khoe gang. 14 Trùh khê baiq, hì baiq jàt tapèh, taneh khoe croh.

15 Boc Plình doe ka Nô-ê rameh: 16 Loh khoe ka boang beq, ìh, mai ìh, ƀài kon ìh xam ƀài mai wì haq. 17 Drah caqnaih qnoh dŏng ƀài ngè rìh i xech akia ma khoe oe ti ìh, enh ƀài chìm trùh ƀài ngè rìh ta rôm wang, ƀài ngè ma loq pan moq ta taneh, dôq wì haq hu xêh đòeq jah rai èh rai bàc tam ta taneh. 18 Qmang aih Nô-ê xam mai haq, ƀài kon calô haq xam ƀài kon mai haq loh khoe ka boang.

20 Nô-ê broq mòeq toq prang tadreo ka Jêhowa. Haq rùp ƀài ngè ban ma hadròeh, ƀài chìm ma hadròeh, padon ƀài ramènh bùh aih taprang tadreo đòeq dèch ka Jêhowa. 21 Jêhowa hìt yŏc kan xua thùm aih rai hèm ta manoh: “Au pi taiq kon mangai đòeq hu ra-òh hamaiq ka taneh hòm, majah qmang aih manoh da kon mangai dua qmòeq enh jò oe qyoh, au xôq pi baxa ƀài ngè rìh qmang ka ma khoe broq hòm. 22 Waq toq taneh oe i, aih èh oe i jò rai adrech xam jò gat, tanget xam tôq, jò pađang xam jò ralìm, dahì xam damang, ùh jò leq lùch.