1 Boc Plình am xôq ramot ka Nô-ê xam ƀài kon calô haq, doe ka wì rameh: “Drah hauang tam ma bàc haq, broq dôq haq bình bauq ta crŏng taneh. 2 Ƀài ngè ma rìh ta crŏng taneh ƀài adrech chìm ta trŏc, xam ƀài ngè moq ta taneh xam ƀaì ka diac raxìq, dìq yùq crè ka ìh, jah jao dìq ta tì kŏng ìh. 3 Dìq dŏng ka ƀài ngè rìh ma loq lam aih èh đòeq broq ka pì dahwèq acaq. Au am ka pì ƀài yiniq aih tìah ka au khoe am cachiq nhat. 4 Mahaq pì ùh khòh acaq jam ma oe i mahua rìh, aih la i mahim.

5 Joq qnàng au bòch hlài mahim da kan rìh pì, yac ka nòe ngè rôm, yac ka nòe tì kŏng kon mangai, yac ka ajang nòe tì kŏng cla oh daq pì 6 Waq toq cabô broq ta-ùc mahim mangai, aih èh i mangai qnoeq broq ta-ùc chau mahim haq aih; majah qmang aih Boc Plình broq kon mangai tiaq qmù dua cla haq. 7 Qmang aih, pì drah ha-uang tam ma bàc rai broq dôq haq bình bauq ta crŏng taneh”.

8 Boc Plình doe ka Nô-ê xam ƀài kon haq rameh: 9 “Manòeq kô au broq tajao ka pì hloe xam ƀài xinoe pì, 10 hloe xam ƀài ngè ma rìh oe ti ìh, enh ƀài chìm, ƀài ngè ma aban ta hnim xam ƀài ngè ma rìh tagùng go, aih la ƀài ngè ma loh enh boang, trùh hloe ƀài ngè oe ta taneh 11 Qmang aih, tajao da au ma broq ka pì, hloe xam ka rìm adrech xech akia: diac kàn pi hìaq palùng, hadai pi i ka diac kàn hu palùng taneh hòm”.

12 Boc plình doe hòm: “Kô teo đòeq patô tajao au ma broq ti pì, hloe xam ƀài ngè ma rìh ti pì, hloe hloe ta rìm qnhòng 13 Au paqnàng dèh hađong ta yùc, đòeq broq teo hu patô tajao da au ka taneh. 14 Waq toq jò leq au tagop aràng yùc ta taneh èh hađong plôh tŏc enh yùc, 15 aih èh au hi hmàng hlài dèh tajao au ma khoe broq tì pì xam rìm adrech xech akia i kan rìh. Pi jò leq diac ma wìa diac kàn đòeq hu palùng dŏng rìm adrech xech akia hòm. 16 Qmang aih hađong hi oe ta yùc, au ngan hnoq haq đòeq hu hmàng tajao mòeq đòe adreo Boc Plình xam ƀài adrech xech akia ma i kan rìh ta crŏng taneh” 17 Boc Plình doe hòm ka Nô-ê: “Aih raq teo patô kan tajao au ma khoe broq ta adreo au xam ƀài xech akia ta crŏng taneh”.

18 Ƀài kon da Nô-ê loh enh boang aih la Sem, Cham, Japhet (Cham aih baq da Cana-an) 19 Aih la piq ngai kon da Nô-ê, èh hadai enh wì aih ma hi jah i kon mangai oe jàp crŏng taneh.

20 Jò aih, Nô-ê patep abèq rai pìt nho. 21 Haq ôq alac bù, khoe aih rahòng dèh taqne traiq. 22 Cham aih baq da Cana-an hnoq kan rahòng dèh baq, aih hi loh enh gùng taqmon hlài dèh ka wa oh daq. 23 Yàng èh wa Sem wa Japhet yŏc eo yôh taqmac deh ta plêh, lam la alùi thia taqmàn chac deh baq, mat wa haq tangèa taqnoeq dài majah ùh lòm hnoq kan rahòng dèh baq. 24 Jò Nô-ê hrau enh bù, hìa bìac kon ma taqne khoe broq ka rađeh, 25 haq doe: Cana-an troq ka hamaiq! Haq jah broq dìc hapŏng dèh wa daq wa oh haq. 26 Haq doe tam: Joq khòh manè apôi Jêhôwa, aih Boc Plình da Sem qnàng, Cana-an ep broq hapŏng ka wì. 27 Waiq Boc Plình parùng taneh ka Japhet am haq jah oe tanòe traiq da Sem, èh Cana-an hòm ep broq dìc wì.

28 Atìq ka diac kàn, Nô-ê oe rìh tam piq hrinh padam jàt hanam. 29 Qmang aih Nô-ê halình jah hachìn hrinh padam jàt hanam, èh hi cachìt.