1 Isorali loh lam wê tiaq deh ƀài kùng hang. Trùh ta Bê-e sêba, haq padon dèh ƀài ramènh dèch ka Boc Plình da Ysac, baq haq. 2 Ta kan hnoq jò damang, Boc Plình i doe ka Jacôp: Jacôp Jacôp! Isorali padreo bàu: I au kô 3 Boc Plình doe: Au kô raq Boc Plình, Boc Plình da baq ìh. Drah loh ta Êdip, apaq yùq cleq, majaih qmang aih ta aih èh au broq ka ìh wìa moeq diac kàn. 4 Cla au kô èh hadai loh ta Êdip ti ìh, èh hadai cla au kô èh raq ma ahlài ìh, wop qmang aih raq. Jôsep èh ma hi apot da ìh mat.

5 Enh Bê-e sêba Jacôp loh lam; ƀài kon calô da Isorali dèch Jacôp, baq wì haq, xam ƀài cadrì kon wì haq tŏc ta xê da Phara-ôn ma khoe thê lam đìh yŏc ƀài wì aih. 6 Wì haq wê dŏng ƀài ngè ma aban xam kùng hang đeh ma khoe achap jah ta Cana-an, đòeq lam trùh ta Êdip. 7 Qmang aih Jacôp xam dìq ka hnim haq, ƀài kon calô, ƀài xau calô, ƀài kon cadrì, ƀài xau cadrì, dìq loh ta Êdip.

8 Hacô! yiniq ƀài kon calô da Isorali aih la Jacôp, ma loh ta Êdip: Kon ramua da Jacôp aih la Ruƀên. 9 Ƀài kon calô da Ruƀên aih Hênoc, Phalu, Hèt-rôn, xam Cacmi. 10 Ƀài kon calô da Simê-ôn aih la Jêmu-ên, Jamin, Ôhat, Jakin, Xôha xam Saulo, aih la kon da mai mangai gùng Cana-an. 11 Ƀài kon da Lêwi aih la Getsôn, Kêhat, xam Mêrari. 12 Ƀài kon da Juđa aih la Êro, Onan, Sêla, Phêrêt xam Xêrat. Mahaq Êro xam Onan khoe cachìt tagùng Cana-an; kon da Phêrêt aih la Hèt-rôn xam Hamun. 13 Ƀài kon calô da Ysaca aih la Thôla, Phuwa, Jop xam Simrôn. 14 Ƀài kon calô da Saƀu-lôn aih la Sêrêt, Êlon xam Jali-ên. 15 Ƀài kon calô xam mòeq toq kon cadrì yiniq haq la Đina, Lê-a ma khoe ha-uang ka Jacôp jò ma oe tagùng Phađan- Aram, xam ƀài xau aih dìq dŏng jah piq jàt piq ngai.

16 Ƀài kon calô da Gat aih la Xiphi-ôn, Hagi, Suni, Ecbôn, Êri, Arôđi xam Arêli. 17 Ƀài kon calô da Ase aih la Jimna, Jic xam Jicwi, Bêria, xam Sêrat, oh cadrì da wì aih. Kon da Bêria aih la Hêbe xam Manki-an. 18 Aih, ƀài kon da Sinƀa ma ha-uang ka Jacôp xam ƀài xau, dìq dŏng aih jah mòeq jàt tadràu ngai. Sinƀa aih la mangai hapŏng da Laƀan ma khoe am tiaq patìh dèh ka kon cadrì aih la Lê-a. 19 Ƀài kon da Rachên mai Jacôp aih la Jôsep xam Bênjamin, 20 Jôsep khoe i kon tagùng Êdip, aih la Manase, xam Epra-im, Anat kon cadrì da Phôti-phêra, mangai pajàu kàn tagùng Ôn, khoe ha-uang ka haq. 21 Ƀài kon calô da Ƀênjamin aih la Bêla, Bêke, Acbên, Jêra, Na-aman, Êhi, Rôso, Môpbim, Hôpbim xam Aret. 22 Qmang aih, ƀài kon calô da Rachên ha-uang ka Jôsep xam ƀài xau dìq dŏng jah mòeq jàt pôn ngai. 23 Kon calô da Đan aih la Husim. 24 Ƀài kon calô da Neptali aih la Jatsi-ên, Guni, Jicse xam Silem. 25 Ƀài kon calô da Bila ma ha-uang ka Jôsep xam ƀài xau aih dìq dŏng jah tapèh ngai. Ƀila aih la hapŏng Laƀan ma khoe am đòeq patìh ka kon cadrì haq la Rachên.

26 Wì aih lam tiaq Jacôp trùh ta Êdip, aih la ƀài mangai ha-uang loh enh Jacôp – tàng joq ùh rèn xam ƀài kon mai – dìq dŏng aih jah tadràu jàt tadràu ngai. 27 Xam kon da Jôsep ha-uang ta Êdip jah baiq ngai. Qmang aih ƀài mangai da hnim Jacôp lam trùh ta Êdip, rèn dìq dŏng jah tapèh jàt ngai.

28 Jacôp thê Juđa lam adroe đòeq hu bòch Jôsep aràng haq mùt tagùng Gôsen. 29 Jôsep tŏc xê axêh haq khoe padon đòeq lam tŏc ta Gôsen đìh Isorali, baq rađeh. Haq loh deh enh ngèa baq, haq cwat deh baq rai hmoe ka dùnh. 30 Isorali doe ka Jôsep: Manòeq kô yac ka au cachìt xôq ùh dèh. Majah qmang aih baq khoe hnoq hadrò kon, èh loq kon oe raq rìh.

31 Khoe aih Jôsep anoe dèh ka oh daq xam dìq ka mangai hnim baq haq rameh: Au chônh lam adroe hu anoe ka Phara-ôn loq: Oh daq xam dìq ka hnim baq au, enh gùng Cana-an khoe trùh ta au. 32 Wì haq mangai rìh ka aban trìu, ban ƀài calùh, i qnung dŏng deh calùh trìu, ƀo xam dèh ƀài kùng hang wì haq. 33 Èh jò Phara-ôn loq thê creo ka pì hu boch: Pì rìh ka abroq đeh cleq? 34 Aih pì doe rameh: Mangai hapŏng wì craq rìh dèh ka ngè aban enh qyoh trùh manòeq qmang ka baq nhèn khoe broq. Qmang aih dôq oh daq jah oe tagùng Gôsen, majah qmang aih mangai Êdip loq cadròt haraya ka mangai ban trìu.