1 Jò aih Jôsep pi àt dèh manoh qmang leq ma oe jah, enh ngèa ka ƀài mangai patìh dudan, haq capoch cadêh: Hnan qnoh wì qmat loh dŏng ma dìq haq!. Qmang aih ùh i cabô oe ti Jôsep jò haq ma anoe ka oh daq loq ka rađeh. 2 Èh haq hmoe qmòe cadêh, mangai Êdip xam hnim Phara-ôn hanoh tàng.

3 Jôsep anoe deh ka oh daq: Au kô Jôsep, Baq au oe rìh đeh ùh?. Mahaq wì oh daq tèu ùh jah, majaq qmang aih wì haq loh ka crè crep enh ngèa haq. 4 Atìq ka aih Jôsep doe ka wì oh daq: Thia haten ka au. Jò wì khoe broq tiaq, haq doe: Au kô Jôsep oh da pì daq, mangai pì daq ma khoe tech đòeq wì qnung lam tagùng Êdip. 5 Manòeq kô pi dùh mangò dèh, hadai ùh dùh nòeh ka rađeh ma khoe tech au đòeq wì qnung au lam gùng kô; majah qmang aih đòeq hu wèq kan rìh pì daq dài Boc Plình ma khoe thê au lam gùng kô adroe ka pì daq. Kô khoe baiq hanam tagùng glàm kan pangot hrah, èh oe padam hanam hòm ùh i abèq achap cleq jah, ùh i cleq đòeq hugat. 7 Boc Plình thê au trùh tacô adroe đòeq broq ka pì daq ùh hìaq lùch ka noe ta crŏng taneh, rai canòm hamong ka mòeq kan dèch claih kàn đòeq wèq kan rìh da oh daq. 8 Ùh! ùh xài pì daq thê au trùh tacô, aih la Boc Plình. Haq dèch au broq baq da Phara-ôn, au wèq hloe hnim haq, wèq dìq dŏng ka Êdip. 9 Pì daq drah rênh hlài ta baq au beq, rai doe ka haq rameh: Boc Plình khoe dèch au broq cla craq dìq dŏng tagùng Êdip, baq drah loh ti au; apaq patrò, 10 ìh, ƀài kon, ƀài xau ìh, ƀài trìu, ƀo hloe xam dìq dŏng kùng hang ìh kô èh jah oe ta gùng Gôsen haten ka au kô. 11 Ta aih èh i au ban ìh (majah qmang aih oe padam hanam pangot hòm) tàng ùh qmang aih èh, cla ìh xam hnim ìh xam ƀài kùng hang da ìh loh ka hamoq dŏng. 12 Hacô, ƀài daq xam Bênjamin oh au, khoe hnoq qmòe dèh xi mat rameh hacùng cla au kô khoe capoch tuàng dèh ka wì haq trong aih. 13 Qmang aih, drah anoe kan rahù ranhòm au tagùng Êdip xam rìm yiniq pì ma khoe hnoq am ka baq tàng, èh drah rênh qnoh baq loh tacô.

14 Atìq ka aih, haq cwat ranŏng Bênjamin, oh rađeh rai hmoe; Bênjamin hadai cwat ranŏng haq rai hmoe. 15 Haq hadai cwat dèh ƀài daq rai hmoe. Khoe aih èh wì oh daq capoch tuàng ka haq. 16 Jò bìac aih hìa trùh hnim Phara-ôn: Ƀài oh daq Jôsep khoe trùh, Phara-ôn xam ƀài cwan tàng qmang aih, joq troq ka manoh wì haq. 17 Phara-ôn doe ka Jôsep: Tanap ka wì oh daq ìh rameh: Drah dèch dahwèq qmat tŏc crŏng lùa, wìh hlài ta Cana-an, 18 đìh da pì baq xam dìq ka mangai hnim pì loh oe ti au. Au am ka pì nòe taneh ma yeo lem dŏng tagùng Êdip, aih èh pì jah waq taneh jìang. 19 Èh au tanap ka ìh anoe hlài ka wì qmang kô: Yŏc ƀài xê enh gùng Êdip ahlài ka kon qyoh xam cadrì wì haq, hu qnoh baq pì loh tacô, 20 Apaq adênh deh ka kùng hang, majah qmang aih ngè cleq ma yeo lem ta Êdip aih èh jah pì.

21 Ƀài kon calô da Isorali broq wop qmang ka bàu; Jôsep iu tiaq bàu Phara-ôn yŏc ƀài xê am deh ka wì daq xam ƀài dahwèq hu acaq jò lam trong. 22 Haq hadai yŏc ƀài eo yôh am ka tang ngai hu atùa, da Bênjamin hòm, haq am mòeq hrinh capiac ƀac xam padam racop eo yôh. 23 Haq hadai thê ahlài deh ka baq mòeq jàt toq lùa chò ƀài ngè ma yeo lem dŏng ta Êdip, mòeq jàt toq lùa cadrì chò qmau, ƀênh xam ƀài dahwèq đòeq acaq jò baq haq lam trong. 24 Qmang aih, Jôsep đùa deh ƀài daq lam trong. Rai tanap ka wì haq Joq au cali calo ka oh daq apaq talech jò lam trong.

25 Ƀài oh daq oe enh Êdip drông dang tŏc trùh dèh ta baq oe ta taneh Cana-an, 26 anoe hlài ƀài bàu kô rameh: Jôsep oe raq rìh; haq aih raq mangai cla craq qnang wèq dìq gùng Êdip. Mahaq gàu ngoc da Jacôp dua ùh blình, majah qmang aih haq ùh lùi bàu wì doe. 27 Oh daq anoe hlài ka haq tàng rìm nà bàu Jôsep khoe doe; Jacôp bu hnoq ƀài xê Jôsep ma thê ahlài hu đìh rađeh, aih manoh haq hi blình hlài, 28 haq doe: Hêq au khoe loq; Jôsep, kon calô au, oe raq rìh; kô èh au lam hmàih ka haq adroe ka đeh cachìt.