1 Jôsep thê mangai wèq hnim haq: Waq toq wì aih hlàt wê pang leq, aih pì tŏng ka wì haq qmau bình ta caƀau toq aih, khoe aih ƀac mangai leq tah hlài ta caƀau mangai aih. 2 Èh tah doe chrŏng ƀac da au ajang ngah caƀau hloe xam ƀac rot qmau da mangai ùch. Mangai wèq hnim broq tiaq wop qmang ka bàu Jôsep thê rađeh.

3 Sroq èh! trŏc bu qngah wì am ƀài aih xam ƀài lùa hlài. 4 Wì lam qnhòq hangai ka than phôq, Jôsep doe ka mangai wèq tahnim: Ìh drah yòng beq hnan tiaq ƀài wì aih; jò khoe tem, ìh doe rameh: Gleq pì majah yŏc kan qmèq đòeq caqnaih ka trong lem qmang qmat? 5 Kô ùh xài chrŏng craq nhèn ôq alac rai đòeq capoch pajàu qmòh? Pì khoe broq moeq bìac ùh lem. 6 Mangai wèq hnim tiaq tem, capoch hlài wop qmang ka bàu aih; 7 ƀài oh daq hi tèu: Gleq wì craq majah anoe qmang aih? Ùh jò leq mangai hapŏng ìh ma i manoh broq yiniq qmang kô!. 8 Hacô enh Cana-an nhèn i wê ƀac ma khoe jah ajang ngah caƀau qnoh hu padreo hlài ka ìh; aih wìa ka ma i manoh enh atùng ƀac qnì wang qnì tanòe hnim wì craq ìh qmòh?. 9 Tàng joq ìh chaq hnoq doe chrŏng aih ta caƀau da mangai hapŏng leq aih èh dôq haq aih cachìt hloe! Èh nhèn kô broq hapŏng dìc ka wì craq. 10 Mangai aih doe: Òq hêq! Broq qmang ka bàu pì doe raq au chaq hnoq chrŏng aih ajang cabô, mangai aih ep broq dìc ka au; mangai ma qnoeq aih ùh i đeh ka yiniq lui cleq 11 Tajòe qmòe, rìm ngai drah qnoh dèh caƀau ta haqneq rai pèh ngah haq. 12 Mangai aih chèh chaq enh caƀau da mangai daq ramua adroe èh trùh ta caƀau da mangai oh ùch. Doe chrŏng aih chaq hnoq ta caƀau da Bênjamin. 13 Rìm ngai hit dèh eo, dèch ƀau qmau tŏc crŏng lùa, wìh loh ta than phôq.

14 Cla Jôsep oe raq tahnim, jò Juđa xam ƀài oh daq trùh ta aih, wì bla op ta haqneq enh ngèa haq. 15 Jôsep bòch: Pì khoe broq cleq qmang kô? Ma ùh loq mangai troeq au kô rabiaq ka broq pajàu đòeq chaq hnoq rìm yiniq cleq ma khoe hnhung qmòh? 16 Juđa tèu: Nhèn oe qnì tèu wì craq qmang leq, oe hangah hlài qmang leq? oe cwaih rađeh qmang leq? Boc Plình khoe hnoq dŏng trong dù da hapŏng ìh. Kô èh nhèn xam mangai khoe jah rùp doe chrŏng ajang nòe tì kŏng haq, dìq broq hapŏng ka wì craq. 17 Mahaq Jôsep tèu bàu: Au ùh i hèm ka broq qmang aih! Mangai leq ma khoe jah rùp doe chrŏng ajang tì haq, mangai aih èh ma ep broq hapŏng au; èh ƀài pì dìq hlài dèh hnim baq pì ka catèm. 18 Juđa thia haten ka Jôsep rai doe: Wì craq! apaq dayo ka hapŏng ìh, am au capoch đeh moeq nà bàu ka wì craq tamàng. 19 Wì craq i bòch deh mangai hapŏng rameh: Pì oe i ka baq, oe i ka oh daq qnoeq loq ùh? 20 Nhèn i doe ka wì craq rameh: Nhèn oe i baq craq, xam moeq toq kon calô ha-uang ka haq jò khoe craq. Daq moeq cliac moeq clèm ka haq khoe cachìt, dài taqne ƀài kon da miq haq, oe moeq toq haq aih raq, èh baq loq waq dèh ka haq haraya. 21 Khoe aih ìh doe ka hapŏng ìh: Qnoh haq loh tacô ka au, dôq au jah hnoq qmòe xi cla. 22 Èh nhèn i anoe ka wì craq: Kon qyoh aih ùh jah talah ka baq, tàng joq talah aih èh baq cachìt. 23 Yàng wì craq aih doe: Tàng joq oh ùch ùh tiaq pì loh tacô, aih èh pì ùh hnoq hadrò au hòm. 24 Dài qmang aih jò nhèn hlài tahnim mangai hapŏng ìh, aih la baq au, nhèn i anoe hlài ka haq tàng bàu da wì craq. 25 khoe aih, baq thê hòm nhèn: Drah loh rot tam ka bèn toq biaq dahwèq acaq. 26 Nhèn doe ka haq: Ùh jah, mahaq tàng joq oh ùch tiaq nhèn, aih men jah loh, tàng ùh qmang aih nhèn ùh jah glàm haq aih. 27 Mangai hapŏng ìh aih la baq nhèn, tèu rameh: Pì loq mai au ha-uang ka au baiq toq kon calô; 28 mòeq ngai khoe cađac au lam hnhnung hloe; au ji khoe doe canau ngè rôm khoe hit đac haq, majah qmang aih trùh manòeq qnhòq hnoq wìh hlài. 29 Tàng joq pì oe qnung kon qyoh kô lam khoe ka au hòm, tàng beq loq i yiniq cleq haƀo trùh ka haq, aih xài pì broq ka mangai craq ko gàu kô catech cliac clèm loh ta hwin.

30 Baq loq waq dèh hrìn ka oh ùch au, mahua yiang wa ùh taclah ka dabau, tàng joq manòeq kô au wìh hlài hnim hapŏng ìh, aih la baq nhèn mahaq ùh i ka oh ùch aih, 31 qmang aih jò pi oe hnoq kon ùch hòm, aih èh haq cachìt. Qmang aih, xài ƀài hapŏng da wì craq kô broq dèh ka baq craq khoe ko gàu, haq aih hadai hapŏng wì craq raq, catech cliac clèm loh ta hwin. 32 Majah qmang aih hapŏng ìh kô khoe chìuq pagàu ka kon ùch aih rameh: Tàng joq au ùh ahlài oh ka baq, aih èh au pòq yiniq lui ka baq mòeq đòe. 33 Qmang aih manòeq kô, dôq ka hapŏng ìh jah oe dìc thai dèh ka mangai qyoh kô, đòeq haq jah hlài dèh tiaq ƀài daq. 34 Tàng joq kon qyoh ùh tiaq hlài, broq qmang leq au oe hùa hlài dèh ta baq? Wùih! broq qmang leq au ma manaq hnoq kan rànac kàn trùh dèh ka baq qmòh!