1 Manòeq! kan pangot hrah tagùng kàn raya. 2 Jò tahnim acaq khoe dìq ka ƀài dahwèq ma ahlài enh Êdip, baq ƀài aih doe: Pì wìh loh hòm ta chàm hu rot tam toq biaq qmau ka bèn hu acaq. 3 Juđa doe: Mangai aih khoe capoch nhang ka nhèn, tàng joq oh ùch pì ùh tiaq loh tacô, aih ùh jò leq pì hnoq hadrò au hòm. 4 Tàng joq baq am oh lam diq, aih èh nhèn men loh ta Êdip, hu rot dahwèq acaq ka ìh. 5 Tàng ùh meh nhèn ùh jah loh, majah qmang aih mangai aih khoe doe: Tàng joq oh ùch ùh tiaq loh ti pì, aih èh ùh jò leq pì hnoq hadrò au hòm. 6 Ysorali lech ka wì haq: Hagleq pì ma jah rabiaq ka ti haƀo ka au, anoe dèh ka mangai aih loq pì oe i oh ùch tahnim hòm. 7 Wì padreo bàu: Mangai aih bòch qmòe ka nhìn trùh nhèn, trùh hadròng nhèn rameh: Baq pì oe rìh đeh loq ùh? Oe i ka moeq ngai oh daq leq loq ùh?. nhèn i tèu ƀài bàu aih. Nhèn ma loq ka haq aih thê qnoh oh pì loh tacô qmòh?.

8 Juđa doe hòm ka Ysorali baq rađeh rameh: Am kon qyoh tiaq nhèn kon, aih nhèn hi padinh yòng lam, đòeq ka bèn, xam ƀài kon ìh, cla ìh, ƀài xau ìh dìq jah rìh, ùh hìaq ep cachìt. 9 I au pòq caxènh oh au qmat; baq taƀoe ajang au hu bòch oh au. Tàng joq kon ùh ahlài oh, ùh đòeq oh yòng enh ngeà ìh, kon kô èh pòq yiniq lui ka baq lùch deh ka qnhòng. 10 Tàng ùh hìaq i kan rahnhua, aih nhèn khoe lam khoe hlài jah baiq yàng. 11 Khoe aih Ysorali baq ƀài wì oh daq doe rameh: Tàng joq khoe qmang aih, pi ep broq qmang kô pì ep ràih yŏc ƀài cleq ma yeo lem dŏng, loh enh taneh da gùng bèn, toq biaq dàu thùm, diac xùt, ngè awìh xam jan xua thùm, clong plì caxa xam plì apriac, tah ta caƀau pì aràng dèch ka haq aih broq ramènh. 12 Drah wê tam ƀac jah baiq phàn yàng ma adroe, đòeq hu padreo hlài ƀac wì ma khoe đòeq hlài ajang ngah caƀau da pì; broq braiq wì troq tah lìq. 13 Pì yòng lam beq, qnung oh ùch pì tawìh loh ta mangai aih. 14 Waiq dang Boc Plình I cwìang Rìm trong broq ka pì jah kan tamèt enh ngèa haq aih, èh caqnaih mangai oh tau xam Bênjamin ka pì. Da baq kô hòm, tàng joq ep hnhung dèh ƀài kon aih baq chìuq đeh wò!”.

15 Qmang aih wì oh daq wê qnàng ƀài ramènh xam ƀac jah baiq phàn yàng adroe, qnung Bênjamin hadai lam đòeq loh glàm Jôsep. 16 Jò Jôsep bu hnoq Bênjamin loh tiaq wì, haq thê mangai ma wèq tahnim: Drah qmùt wì mùt tahnim, rùp cleq hu broq jam èh awìh padon qnoh majah qmang aih hì kô èh wì haq acaq pajùm ti au. 17 Mangai aih broq tiaq bàu Jôsep thê, haq qmùt wì tahnim Jôsep. 18 Wì oh daq hnoq wì qmùt rađeh tahnim Jôsep, aih crè pi cajaq wì hèm: Kô aih taiq ƀac ma khoe tah hlài da bèn ta caƀau yàng ma adroe dài wì majah qmùt bèn tacô, đòeq hu chaq nen jêh bèn, canàt rùp bèn broq dìc èh blah yŏc da bèn ƀài lùa. 19 Qmang aih wì haq thia haten ka mangai wèq tahnim Jôsep rai capoch tuàng ti haq ajang trong mùt tahnim. 20 Wì doe: Wì craq! nhèn cali calo đeh ka ìh, nhèn khoe loh tacô yàng ma adroe đòeq hu rot qmau. 21 Mahaq trùh tanòe nhèn padài hu kùi mang aih, nhèn pèh dèh ta caƀau aih cadoe maleq diq hnoq dèh ƀac oe ajang ngah caƀau, maneh trap toq leq aih oe wop toq aih. Kô nhèn i qnoh hlài ƀac aih, 22 èh nhèn hadai i wê tam ƀac đòeq hu rot dahwèq acaq. Ùh qnì cabô ma khoe tah hlài ƀac aih ta caƀau nhèn. 23 Haq aih doe: Rìm trong dìq catèm, aih Boc Plình pì, Boc Plình da baq pì, khoe am ka pì kùng hang canaq ta caƀau pì. Èh ƀac da pì aih pì khoe jao ka au. Khoe aih haq qnoh Simê-ôn loh dèh ti oh daq. 24 Khoe aih qmùt wì oh daq mùt tahnim Jôsep, qnoh diac ka wì qnheo jènh, hadai qmi ƀài lùa kaq nhat. 25 Ƀài oh daq padon đòeq ƀài ramènh wì ma khoe aràng trùh, gòm jò qne hì Jôsep hlài, majah qmang aih wì i hìa doe rađeh kô èh acaq tahnim kô. 26 Jò Jôsep hlài trùh tahnim, ƀài oh daq hi yŏc dèh ramènh đeh ma khoe wê, dèch ka Jôsep tahnim; wì haq hacùn cràng ta taneh enh ngèa haq. 27 Haq bòch wì i tadêh đeh qmang leq, èh bòch tam: Baq craq pì ma anoe ka au aih i tadêh đeh ùh? oe rìh ùh?. 28 Wì tèu: Hapŏng da ìh aih baq nhèn, xôq tadêh đeh èh xôq oe rìh. Khoe aih wì haq hacùn cràng rai bla op ta haqneq enh ngèa haq. 29 Jôsep ngan dudan hnoq Bênjamin oh mòeq cliac mòeq clèm, kon calô da miq haq, aih haq bòch: Qmat raq ùh xài oh ùch pì ma anoe ka au?. Èh haq anoe tam: Yôi yôiq ùch! Waiq Boc Plình am xôq ramot ka kon! 30 Pàng haq hnoq dèh oh dài ta manoh pi dràng àt, haq drah cadàu loh enh gùng chaq nòe hu hmoe. Haq mùt dèh tabluàng cla haq rai hmoe ta aih. 31 Khoe aih, qmùq mat, cadiang loh rai pacraq dèh manoh, haq thê: Qnoh acaq beq. 32 Wì padon ka haq acaq crài, rai am ƀài daq haq acaq crài. Mangai Êdip acaq pajùm ti haq hanoh haqngui crài, majaq qmang aih mangai Êdip cadròt ka mangai Hêbru, dài majah ùh acaq pajùm. 33 Qmang aih ƀài oh daq haqngui tangèa ka Jôsep, kàn qyoh tiaq deh ta hatìa, wì hi haglènh ngan dabau 34 Jôsep thê yŏc ƀài ngè acaq ajang qngèa rađeh am deh ka ƀài oh daq; mahaq da Bênjamin bàc loe padam yàng da ƀài mangai qnoeq. Dìq ka wì acaq ôq jìang lem bùi enh ngèa Jôsep.