1 Jacôp tàng doe ta Êdip i qmau tech, hi doe dèh ka bài kon calô: Hagleq pì ma ragòt toq ngan dabau qmang qmat? 2 Haq doe tam: Baq tàng doe gùng Êdip i qmau tech, pì drah loh ta aih hu rot qmau ka bèn, đòeq bèn hu rìh ùh hìaq cachìt qmòh. 3 Mòeq jàt ngai daq Jôsep hi loh ta Êdip hu rot qmau. 4 Mahaq Jacôp ùh am Bênjamin oh Jôsep lam ti wì daq; majah qmang aih haq hèm: Au ep wèq yùq loq i bìac ùh lem trùh ka haq. 5 Gùng Cana-an hadai pangot, aih ìq dài ƀài kon da Isorali majah hanoh loh ta Êdip hu rot qmau tìah ka wì qnoeq.

6 Manòeq! Jôsep wèq cwìang dìq ka diac, rai tech qmau am dìq ka mangai. Qmang aih wì daq Jôsep trùh hacùn cràng ta haqneq enh ngèa haq. 7 Jò Jôsep bu hnoq dèh ƀài daq, haq khoe canau ka wì; mahaq haq broq đeh ùh canau, haq capoch nhang ka wì: Pì trùh enh leq?. Wì tèu: Enh gùng Cana-an nhèn trùh hu rot qmau. 8 Yac ka Jôsep canau dèh ka ƀài daq mahaq wì ùh canau ka haq.

9 Jôsep hmàng hlài trong đeh ma apô hnoq dèh ƀài daq, haq cachech ka dêh: Pì kô ƀài mangai lam rinh, lam tacô hu ti achop ngan ƀài nòe ma ùh dràng ta gùng nhèn. 10 Wì tèu: Wì craq, ùh xài qmang aih, ƀài hapŏng wì craq trùh tacô hu rot đeh toq qmau. 11 Nhèn kô dìq kon pajùm mòeq baq, nhèn joq mangai abèq đeh joq qnàng, ùh xài mangai lam rinh. 12 Haq doe ka wì: Ùh xài! Pì kô trùh đòeq hu rinh ngan nòe leq ma ùh cajap tagùng kô. 13 Mahaq wì doe: Ƀài hapŏng ìh kô i mòeq jàt baiq ngai oh daq, kon da mòeq baq, nhèn rìh ta Cana-an, mòeq ngai khoe lam pi qnì qmòe taleq, mangai ùch manòeq kô oe ta hnim ti baq nhèn. 14 Jôsep doe: Aih! hiloq troeq au khoe doe, pì kô ƀài mangai lam rinh. 15 Kô trong au qnhro ngan pì, au patô chac Phara-ôn đòeq hu hapah ka pì, tàng joq oh ùch pì ùh loh tacô, aih èh ùh jò leq pì jah loh khoe enh kô. 16 Drah thê moeq ngai taqne ƀài pì hlài qnoh oh ùch pì loh; ƀài mangai qnoeq dìq clêh đòeq tacô. Bàu pì ep qnhro đòeq adroe, khoe aih èh au men loq bàu pì anoe aih i joq loq ùh. Tàng ùh joq, au patô chac Phara-ôn đòeq hu hapah: Pì kô joq qnàng mangai ti lam rinh 17 Khoe aih Jôsep thê clêh pajùm wì aih ta hnim cadrong piq hì.

18 Hì piq, Jôsep doe ka wì: Au iu yùq ka Boc Plình, drah broq qmang kô, aih èh jah rìh. 19 Tàng joq pì aih ƀài mangai abèq abroq đeh joq qnàng, aih đòeq mòeq ngai oe tù tacô, ƀài ma qnoeq ahlài dahwèq tahnim hu ban wì acaq ka pangot. 20 Mahaq pì ep qnoh oh ùch pì trùh ti au, aih èh bàu da pì aih joq qnàng, aih èh pì ùh hìaq cachìt. 21 Wì doe ka dabau: Joq bèn khoe pòq yiniq lui deh ka oh, majah qmang aih jò nèh bèn hnoq mahua yiang haq mangò dàng leq jò haq cali calo chaq đeh kan ha-och enh bèn, mahaq bèn ùh tamàng, dài manòeq kan ranàc kô majah trùh ka bèn. 22 Ruƀên tèu wì haq: Ùh xài daq khoe doe ka pì oh apaq broq yiniq lui ka kon mangai qyoh aih qmòh? Mahaq pì ùh waq tamàng, dài manòeq kô bèn ep pòq hlài mahim haq. 23 Wì haq ùh qnì Jôsep loq tàng wì haq, majah Jôsep xan yŏc mangai capoch hlài.

24 Jôsep wìh hadrò taqnoeq hu hmoe. Khoe aih tawìh hlài capoch ti wì; èh taqne wì oh daq haq thê rùp kàt Simê-ôn enh ngèa wì aih.

25 Jôsep thê dèh hapŏng tŏng qmau ùc bình ta caƀau èh yŏc ƀac da tang ngai tah hlài da wì haq, hanoh tah tam dahwèq kaq ka trong. Hapŏng broq tìah ka bàu aih. 26 Khoe aih ƀài oh daq dèch qmau tŏc crŏng lùa èh hi lam. 27 Trùh tanòe wì haq padài hu kùi mang aih, i mòeq ngai ta wì haq pèh dèh ƀau hu yŏc qmau am dèh ka lùa, aih cadoe haq hnoq dèh ƀac oe ajang ngah ƀau da haq. 28 Haq doe deh ka wì oh daq: Wì khoe padreo hlài da au ƀac! hacô haq oe ta bau qmau au kô. Ƀài daq crè pi cajaq cleq rai tarìt rai ta anoe, wì doe: Boc Plình khoe broq ka bèn cleq qmang kô ìq? 29 Jò ƀài daq hlài trùh ta Jacôp baq wì haq oe ta gùng Cana-an, wì anoe ka Jacôp dìq dŏng rìm bìac ma khoe loh, rameh: 30 Mangai ma qnang broq cla craq tagùng Êdip capoch nhang ka nhèn, doe nhèn kô ƀài mangai lam ti rinh. 31 Mahaq nhèn i anoe ka haq rameh: Nhèn kô mangai abèq đeh joq qnàng, joq ùh xài mangai ti lam rinh. 32 Nhèn i mòeq jàt baiq ngai oh daq, kon pajùm mòeq baq, mòeq ngai lam khoe hnhung hloe, oe mangai ma ùch manòeq kô oe tahnim ti baq oe gùng Cana-an. 33 Mangai broq cla craq gùng aih thê: Broq qmang kô au men loq pì joq mangai manoh lem. Taqne pì qmat đòeq hlài moeq ngai oe ti au, oe i toq leq ngai ahlài dahwèq hu ban wì tahnim pì acaq ka pangot, 34 khoe aih, qnoh oh ùch pì trù ta au. Qmang aih au men loq pì ùh xài mangai ti lam rinh, mahaq joq mangai broq lem; brì ka au padreo hlài da pì oh, èh pì jah padro acaq tagùng kô.

35 Èh, jò oh daq qnang ùc qmau loh enh caƀau, aih ka doe ta cabau i ƀac da rìm ngai; baq xam ƀài oh daq hnoq deh ƀài caxop ƀac, dìq crè pi cajaq cleq.

36 Jacôp baq wì haq doe: Pì khoe broq hnhung ƀài kon au, Jôsep khoe hnhung, Simê-ôn hadai khoe hnhung hloe; yàng manòeq kô, cadoe enh qnung hloe Bênjamin lam hòm qmòh? Ƀài kan haƀo kô ta-ùc dìq ta au. 37 Ruƀên doe dèh ka baq: Baq jao oh am ka au beq, i au ahlài haq. Tàng joq au ùh ahlài haq, aih baq jêh đac baiq toq kon calô au beq. 38 Mahaq Jacôp doe: Kon ùch au ùh loh tiaq pì taleq, majah qmang aih daq haq khoe cachìt, oe moeq toq haq qmat raq. Tàng joq loq i bìac cleq trùh ka haq roc trong pì lam, aih ajoq pì broq ka mangai ko gàu kô catech cliac clèm loh ta hwinh.