1 Baiq hanam atìq, Phara-ôn apô hnoq đeh yòng ta haqmai cròng diac Nin. 2 Kô aih, enh diac Nin tŏc tapèh toq ƀo bit lem, acaq nhat ta pràm. 3 Atìq aih, tapèh toq ƀo qnoeq hòm, qmèq ragìq ragôm, tŏc enh diac, lam yòng ajang ƀài ƀo ma adroe taƀò diac,. 4 Tapèh toq ƀo ma ragìq qmèq aih, lŏnh apom tapèh toq ƀo bit lem. Phara-ôn hi cadrat enh kùi. 5 Bùa kùi hlài, apô hnoq yàng ma atìq, hnoq tapèh hadròc qmau chac, lem hon pajùm ta moeq tacòng hri, 6 tìa aih hòm, i tapèh hadròc qmau qnoeq, cayeo enh pah mahì loh hlui loh dŏng ka croh manùh, plôh tiaq tapèh hadròc qmau tau. 7 Tapèh hadròc qmau manùh lŏnh dŏng tapèh hadròc qmau ma chac. Phara-ôn hi cadrat; aih hi loh kan apô.

8 Trùh sroq èh, gàu ngoc haq loh ka rawè, thê creo dŏng bài pajàu xan ƀài ƀŏcsì gùng Êdip trùh, anoe đeh ma apô ka wì aih tàng, mahaq ùh i cabô loq hatình trong apô aih ka bùa. 9 Cwan dèch alac hi doe ka bùa: Manòeq kô au hmàng hlài dèh yiniq lui. 10 Adroe nèh Phara-ôn i nòeh ka wì cwan, i clêh cwan dèch ƀênh xam au ta hnim cwan ma wèq hnim bùa. 11 Jò aih, i mang ma dìq i apô hnoq,, apô da maleq dìq i deh hra ranenh. 12 Ta aih, hanoh clêh pajùm ti ma, i mòeq ngai Hêbru oe raq radam, mangai patìh ta hnim cwan ma wèq hnim bùa; nhèn anoe hlài ka haq ƀài apô da nhèn, haq hatình hloh ka ma trong da ma apô. 13 Khoe aih, rìm yiniq trùh hi wop qmang ka bàu haq hatình, Bùa am au jah broq hlài cwan, rai atua cwan tau

14 Phara-ôn thê creo ka Jôsep trùh, wì tajòe qmòe caqnaih Jôsep loh enh hnim tù, got da haq hadrò, thê haq atùa eo yôh, khoe aih mùt tamàng Phara-ôn. 15 Phara-ôn doe ka Jôsep: Au i mòeq apô mahaq ùh i cabô loq hatình da au. Qmang aih au tàng doe jò ìh tàng mangai leq anoe hlài đeh apô cleq, aih ìh dìq jah tình. 16 Jôsep doe: Aih ùh xài au, mahaq aih la Boc Plình yŏc kan catèm tèu am ka bùa 17 Phara-ôn doe: Kô jò apô au qnang yòng ti haqmai cròng diac Nin. 18 Cadoe i tapèh toq ƀo bit lem tŏc enh diac acaq nhat ta pràm, 19 Khoe aih, i tapèh toq ƀo qnoeq qmèq ragìq ragôm tŏc tiaq atìq; joq au qnhòq lah hnoq jò leq tagùng Êdip i ƀo ma qmèq qmang aih. 20 Tapèh toq ƀo qmèq ragìq ragôm aih lŏnh apom tapèh toq ƀo lem bit ma adroe, 21 lŏnh qmùt ta cliac mahaq hnoq tìah ka ùh i lŏnh, majah qmang aih dua oe raq qmèq qmang ka enh adroe. 22 Au hi cadrat, èh hnoq hòm apô qnoeq, aih la tapèh hadròc qmau chac lem lình, hon pajùm ta moeq tacòng hri. 23 Tìa aih, tapèh hadròc qnoeq, croh lip, cayeo ƀè mat mahì tŏc, hlui wìa dŏng manùh, sròc tiaq tapèh hadròc qmau tau; 24 Tapèh hadròc qmau manùh aih lŏnh tapèh hadròc qmau ma chac. Au khoe anoe hlài ƀài apô aih ka ƀài pajàu; mahaq ùh i cabô loq hatình qmang leq.

25 Jôsep padreo bàu ka Phara-ôn: Baiq apô bùa ma hnoq aih mòeq trong raq, Boc Plình chônh doe ka bùa loq adroe bìac haq ma padon broq kô èh. 26 Tapèh toq ƀo bit lem aih la tapèh hanam, tapèh hadròc qmau chac aih hadai tapèh hanam. Aih dìq moeq apô raq. 27 Tapèh toq ƀo qmèq ragìq tŏc tiaq atìq ka tapèh toq ƀo tau, aih tapèh hanam; tapèh hadròc qmau lip ka cayeo enh ƀè mahì tŏc hlui aih la tapèh hanam pangot hrah. 28 Aih ƀài bàu au khoe anoe ka bùa, Boc Plình khoe am ìh hnoq ƀài bìac haq padon broq. 29 Kô èh, jàp gùng Êdip i tapèh hanam jah qmau ùh dìq ùh dài, 30 Mahaq tapèh hanam pangot hrah hi tiaq hloe ka aih; mangai tacô hi hèt dŏng kan tàu tìa aih, kan pangot raliang dìq ka gùng loh ka hamoq hamit. 31 Kan pangot hrah ùh catech kô kàn hrìn, dài phù cròng loh ka pi hmàng trùh kan ùh dìq ùh dài nèh hòm. 32 Tàng apô khoe trùh baiq yàng ka bùa, aih la Boc Plình khoe dì qmang aih raq, èh cla haq rênh broq ka gêh. 33 Manòeq bùa ep ràih yŏc moeq ngai rabiaq loq, dèch mangai aih broq gàu tagùng Êdip. 34 hadai paqnàng ƀài ƀình wiang patìh đòeq hu gop yŏc moeq phàn padam wì majah ta tapèh hanam jah qmau ùh dìq ùh dài aih. 35 Wì ep gop yŏc dŏng rìm mùa ta tapèh hanam jah qmau ùh dìq ùh dài ma trùh ta atìq kô èh, don đòeq ƀài dahwèq aih enh qneq ka cwìang da Phara-ôn, ƀài dahwèq aih don đòeq ta rìm than phôq wì haq ep wèq hu broq dahwèq acaq. 36 Ƀài dahwèq kô ep đòeq hanìuq ka tapèh hanam pangot ma padon trùh tagùng Êdip, đòeq gùng kô ùh hìaq cachìt ka hrah ta kan pangot aih.

37 Ƀài bàu kô lem ka manoh Phara-ôn xam ƀài cwan. 38 Phara-ôn doe deh ka ƀài cwan: Bèn hlàu cleq ka chaq jah mòeq ngai troeq haq kô, mangai enh dalam haq i yiang da Boc Plình. 39 Khoe aih Phara-ôn doe ka Jôsep: Pang jò Boc Plình khoe am ìh loq ƀài bìac kô, pi i cabô ma rabiaq loq qmang ka ìh hòm. 40 Qmang aih ìh tŏc wèq cwìang hnim au, dìq dŏng mangai da au ep iu tiaq bàu ìh. Au yeo haqnhèq ka ìh toq jang gèq bùa kô raq.

41 Phara-ôn anoe tam ka Jôsep: Ngan kô! Au dèch ìh wèq cwìang enh qnhèq dìq dŏng taneh diac Êdip. 42 Khoe aih, Phara-ôn doeh deh canhàn enh hadrang tì rađeh, asràng ka tì Jôsep, thê caxùnh am ka Jôsep eo bai lan ma habuàt, taqmac kìang wang ta ranŏng haq; 43 khoe thê tŏc haqngui xê atìq ka xê bùa, i mangai lam adroe cachech ka dêh: Drah hacùn cràng!. Jôsep jah dèch atŏc broq kàn ta Êdip qmang aih. 44 Phara-ôn doe hòm ka Jôsep: Au kô Phara-ôn, mahaq tàng ùh i ka ìh, dìq ka gùng Êdip pi oe i cabô hrŏc dèch tì dèch jènh. 45 Phara-ôn yiniq am ka Jôsep la Saphonat-Phanê-at, am Anac kon adrùh da Phôti-phêra pajàu kàn tagùng Ôn, broq mai haq. Haq xan lam dudan ka gùng Êdip. 46 Jôsep khoe, jah piq jàt hanam jò haq mùt glàm hu patìh ka Phara-ôn. Aih ìq, haq loh enh Phara-ôn hulam dan jàp ka gùng Êdip.

47 Ta tapèh hanam ma jah qmau ùh dìq ùh dài, taneh loh raya da hwèq. 48 Jôsep tigop dŏng dahwèq da tapèh hanam aih tagùng Êdip, don ƀài dahwèq kô jàp ta than phôq; yac ka than phôq leq xôq don đòeq dahwèq da ƀài ruàng oe dudan than phôq aih. 49 Qmang aih Jôsep tigop yŏc qmau haraya, tìah ka braih diac raxìq, jaq wì mech loh ka pi dìq rènh, majah qmang aih bàc hrình. 50 Adroe ka ƀài hanam pangot hrah trùh, Anac kon pajàu kàn tagùng Ôn, ha-uang ka Jôsep baiq toq kon calô. 51 Jôsep yiniq ka kon ramua la Manase, majaq qmang aih haq doe: Boc Plình khoe broq ka au hèt kan mangò, hloe xam dìq dŏng ka wì hnim baq au. 52 Haq yiniq ka kon ma atìq la Epra-im, majah qmang aih haq doe: Boc Plình broq ka au jah padrŏng tagùng au glàm nanxa. 53 Tapèh hanam jah qmau ùh dìq ùh dài ta Êdip hi dìq, aih tapèh hanam pangot hi baxèm trìh diq, wop qmang ka bàu Jôsep khoe doe adroe. Rìm ka gùng qnoeq dìq pangot, mahaq dìq dŏng ka gùng Êdip i ƀênh. 55 Khoe aih, dìq dŏng ka gùng Êdip hi pangot diq, mangai gùng aih trùh creo dang Phara-ôn, hu chaq dahwèq acaq. Phara-ôn doe ka mangai Êdip: Pì lam ta Jôsep, èh broq tiaq qmang ka bàu haq ma thê ka pì. 56 Jò jàp gùng loh ka pangot, aih Jôsep pèh ƀài hapom qmau tech ka mangai Êdip. 57 Kan pangot rai èh rai kàn; jò aih dìq ta crŏng taneh taleq xôq pangot hrìn, dài aih majah taleq xôq dahrôq loh dìq ta Êdip hu rot qmau Jôsep tech.