1 Khoe ka ƀài bìac aih, i cwan dèch alac xam cwan dèch ƀênh da bùa Êdip broq yiniq lui dèh ka cla craq. 2 Phara-ôn plôh nòeh dèh ka wa cwan, aih la cwan dèch alac xam cwan dèch ƀênh, 3 hi rùp clêh wa aih ta hnim cwan ma wèq hnim bùa, aih nòe wì qnang clêh Jôsep. 4 Cwan wèq hnim bùa thê Jôsep patìh ka wa aih. Atìq ka wa haq oe ta aih bu toq ƀiaq, 5 hanoh ta mòeq mang, cwan dèch alac xam cwan dèch ƀênh da bùa Êdip qnang oe tù, dìq i apô hnoq, mòeq ngai mòeq apô, apô leq dìq i dèh ranenh. 6 Sroq èh, Jôsep trùh ta wa, hnoq hadrò wa haq mangò, 7 hi bòch wa: Hì kô hagleq hadrò chôp majah mangò qmang qmat? 8 Wa tèu: Ma i mòeq apô mahaq ùh i cabô tình ƀiaq da ma. Jôsep doe: Bìac hatình trong apô hnoq aih ma ùh xài loh enh Boc Plình qmòh? Aleq anoe hlài ka au chôp cwan apô cleq au hutàng đeh diq. 9 Cwan dèch alac taqmon hlài dèh apô ka Jôsep: Ta apô au hnoq enh ngèa au i mòeq xèm nho, 10 xèm nho aih i piq hamenh. Hnoq hamenh plôh ramot, loh riang tìah gleq i plì dùm. 11 Tì au qnang wê doe mŏng da Phara-ôn; au git plì nho aih, padit yŏc diac plì nho, khoe aih dèch alac ka tì kŏng Phara-ôn. 12 Jôsep doe: Apô aih qmang kô: Piq hamenh plì nho aih la piq hì, 13 Oe piq hì hòm, Phara-ôn hi caqnaih ìh loh enh hnim clêh kô, am ìh broq hlài cwan, ìh hi dèch hlài doe mŏng da Phara-ôn ka tì kŏng haq, tìah ka enh nèh qmang ka jò ìh oe raq broq cwan dèch alac. 14 Mahaq jò rìm yiniq khoe jah lem ka ìh, hmàng trùh au, anoe ka Phara-ôn loq bìac da au, rai qnoh au loh khoe ka ajang kô.

15 Majah qmang aih wì rùp đac au qnoh au loh khoe ka taneh da mangai Hêbru, èh tacô au hanoh ùh i broq loh đeh yiniq lui cleq ma tajì ka clêh đac au tanòe clam cluiq kô.

16 Cwan dèch ƀênh hnoq Jôsep anoe trong apô rabiaq qmang aih, hi anoe diq: Da au apô qmang kô, au kui piq cađap ƀênh taboc tagàu: 17 ta cađap ma enh qnhèq dìq dŏng, i tôm taih ƀài dahwèq da mangai broq ƀênh ka Phara-ôn; chìm jràp ta cađap tagàu au kaq dŏng ƀài dahwèq aih”. 18 Jôsep doe: Apô aih qmang kô piq cađap aih la piq hì. 19 Ta piq hì hòm, Phara-ôn hi pot ranŏng ìh, thê wì atua goe long dôq ƀài chìm jrêh acaq jam ìh”.

20 Trùh hì piq, aih hì ha-uang da Phara-ôn, haq padon yiniang yinàng dèh ka ƀài cwan acaq ôq, haq qnoh wa cwan dèch alac xam cwan dèch ƀênh loh enh hnim clêh. 21 Phara-ôn am cwan dèch alac broq hlài cwan qmang ka dùnh, cwan kô dèch alac ka tì kŏng rađeh; 22 mahaq thê wì dèch atua cwan dèch ƀênh; wop qmang ka bàu Jôsep khoe doe.

23 Èh, cwan dèch alac pi hmàng trùh Jôsep hòm, hèt hloe ka haq ma hapinh.