1 Jò aih, Jôsep wì qnoh haq ta Êdip, aih Phôti-pha mangai broq gàu lình wèq hnim Phara-ôn rot haq enh tì mangai Ich ma-ên aràng trùh. 2 Jôsep oe ta hnim wì craq haq aih la mangai Êdip, jah Chuaq Jêhowa wiang ti haq, dài haq broq cleq dìq jah imo. 3 Cla wì craq hnoq Chuaq Jêhowa oe ti haq broq ka rìm trong tì kŏng haq broq dìq jah himo. 4 Qmang aih Jôsep jah lem manoh enh ngèa wì craq; cla craq him aih taqmroq haq patìh, dèch haq broq mangai wèq tahnim rai jao dŏng dèh kùng hang ka haq. 5 Pang jò haq dèch Jôsep broq mangai wèq dŏng bìac ta hnim xam dìq dŏng deh kùng hang, aih Chuaq Jêhowa taiq Jôsep majah am xôq ramot ka hnim haq; xôq ramot da Jêhowa jàp dŏng rìm yiniq cleq haq ma broq gàu, yac ka tahnim, yac ka tagùng. 6 Haq jao dŏng dèh kùng hang ka Jôsep wèq ngan, pi oe ep hèm trùh bìac cleq hòm, enh gùng toq ka dawèq rađeh ma acaq. Jò aih, Jôsep chac mac lem dang, hadrò pàt lem alàng.

7 Khoe ka aih, mai cla wì craq xan cachìac mat ngan Jôsep rai doe: Lam jang kô kùi ti au. 8 Jôsep ùh waq qmòe blinh, haq doe: Cla wì craq khoe jao dìq ka tì kŏng au kùng hang haq, cla haq pi ep hèm trùh qmòe cleq tahnim kô, 9 tahnim kô pi i cabô ma yeo kàn ùh hnau ka au, cla wì craq hanoh ùh lòm ùh lòh qmòe au trong leq, enh gùng ka mòeq ngai ìh; aih la mai cla craq au. Wìa ka au ma hùa broq trong dù kàn qmang aih, đòeq hu loh yiniq lui ka Boc Plình qmòh?. 10 Yac ka rìm hì haq padô qmang aih, mahaq dua Jôsep ùh tùi bàu padô đoèq kùi hu oe ti haq yac ka toq xit hnha.

11 I mòeq hì aih, Jôsep mùt tahnim hu abroq; meh oq! jò aih ùh i qmòe ka mòeq ngai hapŏng qnoeq tahnim, 12 aih haq dùng eo Jôsep rai doe: Kùi ti au ùih. Mahaq Jôsep hlôch cađac dèh eo ta tì haq hu cadàu loh enh gùng ka hnim. 13 Jò haq hnoq eo oe ta tì dađeh, èh cla Jôsep khoe cadàu loh enh gùng, 14 haq creo dèh ka ƀài hapŏng tahnim: Pì ngan kô, haq doe ka ƀài hapŏng ta hnim: Wì joq rabiaq ka aràng ka bèn mòeq toq cleq Hêbru đòeq hu enh racaih ka bèn, haq thia haten đòeq àu rùp au kùi ti au, mahaq au cajiah cadêh. 15 Jò bu tàng au cajiah, haq drah lêh đac dèh eo jang au, cadàu loh enh gùng. 16 Haq đòeq eo Jôsep oe ti dađeh trùh jò wì craq hlài tahnim. 17 Khoe aih, haq anoe hlài dèh ka wì craq qmang ka bàu enh adroe: Cleq hapŏng mangai Hêbru, ìh ma khoe ahlài ka bèn trùh ti au hu enh racaih ka au. 18 yàng jò au dèch bàu cajiah haq, haq hlôch dèh eo ka au, khoe aih cla haq cadàu loh enh gùng.

19 Jò cla craq da Jôsep bu tàng bàu dèh mai doe aih: Aih cleq hapŏng ìh broq qmang aih. Aih haq hi plôh nòeh, 20 hirùp Jôsep tah ta hnim tù, aih la nòe clêh ƀài mangai broq yiniq ka bùa. Mahaq jò wì clêh Jôsep oe ta aih. 21 Chuaq Jêhowa wiang ti Jôsep rai patô qnoh dèh kan loq waq ka haq, broq ka haq jah màiq enh ngèa mangai wèq hnim tù. 22 Mangai wèq hnim tù jao dŏng ƀài mangai tù ka Jôsep ngan, rìm yiniq dìq haq ranenh am ka wì. 23 Cla mangai wèq hnim tù pi oe ep ngan qmòeq cleq enh tì kŏng Jôsep, majah qmang aih i Chuaq Jêhowa wiang ti haq, broq ka rìm yiniq haq broq dìq jah himo.