1 Jò aih Juđa talah dèh kan ƀài oh daq loh oe ti mangai Ađulam, yiniq haq aih Hira. 2 Ta aih Juđa hnoq kon cadrì da mòeq ngai Cana-an, yiniq haq Su-a, hi yŏc boq mai, èh acaq oe ti mangai aih. 3 Mangai cadrì aih oe jiang, ha-uang loh mòeq ngai kon calô, yiniq dèh kon la Êro. 4 Haq oe jiang hòm, ha-uang kon calô, yiniq dèh kon la Ônan; 5 ha-uang tam kon calô, yiniq deh kon la Sêla. Jò mai haq ha-uang, aih cla Juđa oe ta Kêsip.

6 Juđa ban ka Êro kon ramua haq moeq ngai mai yiniq haqTama. 7 Mahaq Êro xòc raya enh ngèa ka Chuaq Jêhowa, dài aih haq jêh đac Êro. 8 Juđa thê Ônan: Kon trùh ti mai daq kon, tađôi ka haq qmang ka oh ŏng, đòeq hu qmot xinoe ka daq. 9 Ônan loq xinoe kô ùh i jah rađeh, dài aih jò qnang trùh ti gucadrì aih, haq broq taclìh đac ta taneh, đòeq apaq ha-uang loh xinoe ka daq dađeh. 10 Yàng biàc haq broq qmang aih ùh lem ka manoh Chuaq Jêhowa, dài aih haq dua jêh hloe Ônan. 11 Khoe aih, Juđa thê Tama, kon mai haq: Kon hlài oe hadrô pah him baq kon, gòm trùh jò Sêla kon calô da baq yòng kàn. Majah qmag aih haq hèm dèh ta manoh: Bèn ep ngan ja cajoq, yùq tabeq haq loq cachìt qmang ka wa daq. Tama hlài oe dèh hnim baq.

12 Atìq ka aih dùnh, kon cadrì da Su-a mai Juđa cachìt. Jò khoe yeo ka mangò, aih Juđa lam ti Hira mangai Ađulam, bua haq, tŏc tanòe ƀài thòq got xàc trìu haq ta Thimna. 13 I wì doe ka Tama loq bìac aih, rameh: Kô! baq ŏng ìh lam ta Thimna đòeq got xàc trìu”. 14 Haq hi lêh đac dèh eo hadrô yŏc mù prình dèh hadrò, taqmàn rađeh, khoe aih haqngui gòm ajang trong mùt ta Êna-im, apah trong hlài ta Thimna; majah qmang aih haq hnoq yac ka Sêla khoe kàn mahaq dua wì ùh am haq aih broq ŏng rađeh. 15 Juđa hnoq haq, hèm mangai kô broq mangai tech chac rađeh, majah qmang aih haq khoe prình deh hadrò. 16 Juđa thia haten rai doe: Dôq au kùi ti ìh. Majah qmang aih haq ùh qnì aih raq kon mai cla haq. Mangai cadrì aih tèu: Ìh am ka au cleq hu kùi ti au?. 17 Padreo bàu: Au am ka ìh mòeq toq bubi kon oe ta calùh da au. Mangai cadrì bòch: Ìh am ka au cleq hu broq nen, trùh jò leq ìh men aràng ka au bubi aih 18 Juđa doe: Au am ka ìh cleq kô đòeq hu broq nen hadro?. Mangai cadrì doe: Ngè đòeq pateo, aih la hadrang caxi, xam long dùi qnang wê ta tì ìh qmat. Juđa hi am, èh kùi ti gucadrì aih; haq aih hi hadràp enh Juđa. Khoe aih mangai cadrì aih hi yòng lam. 19 Lêh đac bai prình hadrò, hi caxùnh hlài dèh eo hadrô.

20 Juđa canòm ka mangai Êđulam, bua dađeh qnàng bubi kon đòeq hu baxon yŏc hlài ƀài ngè ma broq nen hadro ajang nòe gucadrì aih; Mahaq chaq ùh hnoq 21 Bua haq bòch ƀài mangai tanòe gucadrì aih ma oe: Mangai gucadrì ma tech dađeh, adroe kô nèh haq oe ti trong mùt ta Êna-im, manòeq kô taleq? Wì tèu bàu doe: Tacô ùh i ka moeq ngai gucadrì leq ma tech dađeh. 22 Bua haq wìh hlài ta Juđa rai doe: Au ti chaq haq aih ùh hnoq; wì ta aih doe tacô ùh i moeq ngai gucadrì leq tech rađeh. 23 Juđa doe: Kô oq, au khoe gòe aràng bubi kon, mahaq ìh chaq ùh hnoq haq aih; qmang aih đòeq haq wèq ƀài ngè panhìn aih, ùh dùh broq loh yiniq cleq ùh lem ka bèn.

24 Qnah ta piq khê atìq, i wì lam doe ka Juđa: Tama! kon mai ìh broq mangai tech rađeh, taiq kan hèm ùh trùh aih manòeq kô haq khoe oe jiang hwang. Juđa tèu: Qnoh haq loh bùh đac ka cachìt. 25 Jò wì qnang rùp qnoh haq, aih haq thê wì lam doe dèh ka baq ŏng haq: Ìh ngan hlài dèh ngè đòeq pateo kô, hadrang caxi xam long dùi kô, aih ngè da cabô, au wê cliac enh nòe mangai ma i ƀài yiniq kô”. 26 Juđa ngan canau ka ƀài ngè aih, hi doe: Haq yi troq ùh hnau ka au, pàng au khoe ùh am Sêla broq ŏng haq. Pang aih Juđa pi acaq oe ti haq hòm.

27 trùh jò ha-uang, hacô ta cliac haq kon camia. 28 Jò ha-uang, ta baiq ngai aih mòeq ngai qnoh tì loh adroe, ƀamùq rùp tì haq kàt mòeq hadrang caxi gòh rai doe: Macô loh adroe. 29 Yàng aih cadoe haq qmùt hlài dèh tì, aih daq haq hi loh, ƀamùq doe: Gè hit hyah qmang kô!. Wì yiniq ka haq Phêrêt. 30 Atìq ka aih, oh haq loh diq, aih la mangai ma i caxi brai gòh, wì yiniq ka haq Sêrat.