1 Jacôp oe tagùng baq haq ma khoe oe, aih gùng Cana-an.

2 Kô bìac da ƀài xinoe Jacôp. Jôsep mòeq jàt tapèh hanam, ban trìu dèh ti wì daq; haq pagôq pajùm ti kon da Ƀêla xam kon da Xinƀa, aih wa mai baq haq. Jôsep anoe hlài dèh ka baq ƀài trong qmèq da wì haq. 3 Jò aih, Isorali yeo loq waq ka Jôsep ùh hnau ka ƀài kon calô qnoeq, majah qmang aih haq aih ha-uang jò rađeh ma khoe craq, aih ìq haq hi jìp ka Jôsep mòeq blah eo yôh achìh bràu brình. 4 Wì daq hnoq baq yeo loq waq ka Jôsep ùh hnau ka ƀài rađeh, dài aih majah hi loh manoh tagit, pi oe jah yŏc mòeq nà bàu ma alàng lem hu capoch ka Jôsep.

5 Jôsep i apô, taqmon anoe hlài ka wì daq tàng, kiang wì haq git ùh hnau hòm, 6 Haq doe: Au i apô, pì daq tamàng au anoe hlài ka pì: 7 Bèn qnang oe ta đùng hu achauq qmau, achauq qmau da au paqnàng yòng, yàng da pì aih cro rađeh ta haqneq dudan enh ngèa ka achauq qmau au, 8 Bài daq hi tèu: Qmang aih èh gè broq cla craq nhèn qmòh? Gè wèq cwìang enh qnhèq ka nhèn qmòh?. Kiang wì git ka haq ùh hnau hòm, taiq apô da haq hloe xam bàu haq ma capoch.

9 Jôsep apô hòm, doe ka wì daq rameh: Au i apô hòm: Ngan kô, mat mahì, mat khê xam mòeq jàt mòeq toq halŏng dìq caqnìh rađeh enh ngèa au. 10 Haq anoe apô aih deh ka baq xam ƀài wì daq đeh tàng; yàng baq haq ùh mòeq nà cwò bòch haq: Apô da gè aih apô cleq? Ajoq xam au xam miq gè xam ƀài daq gè dìq ep lam bla op rađeh ta taneh enh ngèa gè ùh xài? 11 Ƀài daq haq tajìq ka haq, yàng da baq haq hmàng đòeq ƀài yiniq aih ta tamanoh

12 Ƀài daq haq lam ban trìu baq wì haq ta Sichem. 13 Isorali doe ka Jôsep: Wì daq kon i ban trìu ta Sichem loq ùh? Lam acô baq hu thê kon lam ta wì aih. Jôsep tèu bàu: Kô au kô 14 Isorali doe: Kon lam beq, ngan ƀài daq kon xam ƀài calùh trìu qmang leq, khoe aih ahlài bàu ka baq loq. Qmang aih, enh dahông Hêprôn, haq thê Jôsep lam ta Sichem. 15 I mòeq ngai hnoq haq lam lac tađùng, mangai aih bòch: Ìh chaq cleq 16 Haq doe: Au chaq deh wì daq, ìh doe ƀiaq ka au loq wì daq au tiaq trìu acaq taleq? 17 Mangai aih doe: Ƀài daq ìh oe tacô khoe lam, majah qmang aih au tàng wì haq doe: Beq bèn lam ta Đôta-in. Qmang aih Jôsep lam chaq èh hnoq deh wì daq ta Đôta-in.

18 Ƀài daq hnoq haq enh hangai, qnhòq trùh haten, aih khoe tình ti dabau hu chaq trong jêh đac haq. 19 Wì doe ka dabau: Tau cleq apô khoe trùh. 20 Manòeq kô beq bèn jêh đac haq, khwênh caqnìh haq ta ƀài ralùng diac leq aih, khoe aih bèn doe ƀài ngè tarôm khoe hit kaq haq, hu ngan apô da haq qmang leq cadèh? 21 Ruƀên tàng ƀài bàu aih, enh paclaih haq khoe ka tì kŏng wì daq, haq doe: Bèn paq jêh đac haq; 22 haq doe tam: Bèn ùh dùh broq ta-ùc mahim haq; caqnìh haq ta ƀài ralùng diac tađùng hawit tau, apaq poh ta chac haq. Haq anoe qmang aih, majah qmang aih haq enh dŏng Jôsep khoe ka tì kŏng wì daq, đòeq hu caqnaih haq hlài dèh ta baq. 23 Jò Jôsep bu trùh dèh ajang wì daq, wì lêh da haq eo yôh, aih la eo habràu habrình haq qnang caxùnh ta chac; 24 khoe èh rùp haq lam caqnìh ta ralùng diac. Jò meh ralùng khoe croh ùh hìaq i diac.

25 Khoe aih wì haqngui acaq ti dabau. Blèch ngan cadoe hnoq mòeq calùh mangai Ich ma-ên enh Gala-at trùh, enh crŏng lŏcđa bình bauq dahwèq awìh acaq, diac jreo, xam jan xua thùm, aràng lam padro ta Êdip. 26 Juđa doe deh ka wì oh daq: Jêh oh bèn qmat cadoc mahim haq aih èh jah ka bèn cleq? 27 Beq bèn tech haq ka mangai Ich ma-ên, èh bèn apaq poh tì ta chac haq majah qmang aih haq qmat oh bèn, xech bèn, mahim bèn. Wì oh daq dìq tiaq bàu haq doe. 28 Jò mangai padro Mađi-an lam pagat trong aih, ƀài wì daq dèch atŏc Jôsep khoe ka ralùng diac, èh tech haq ka ƀài mangai Mađi-an jah baiq jàt cachêh bac, wì aih qnàng haq lam ta Êdip.

29 Ruƀên wìh hlài ta ralùng diac; wùih Jôsep taleq kô ìq! haq hit dèh eo. 30 wìh hlài dèh ta oh daq haq doe: wùih! kon mangai qyoh aih khoe hnhung taleq! Ha au kô èh lam taleq? 31 Ƀài wì daq jêh mòeq toq bubi calô, khoe aih yŏc eo Jôsep tàm ta mahim; 32 khoe aih gòe ahlài eo habràu aih dèh ka baq, rai tanap: Kô ngè nhèn chaq hnoq, qmang aih baq ngan beq ajoq eo kon calô ìh loq ùh?. 33 Jacôp ngan eo haq doe: Kô raq eo kon calô da au, mòeq toq ngè rôm ma xòc khoe cajao hit haq! Joq qnàng chac Jôsep khoe dahit loh tang haqnech!. 34 Haq hit deh cwàn eo, atàc bau briang rai crò hmoe dèh ka kon dùnh hì. 35 Dìq dŏng ka ƀài kon calô cadrì tagop dabau alòng haq, mahaq haq ùh waq haq doe: Au crò hmoe trùh hloe loh ta hwinh ti kon au. Aih Jacôp crò hmoe dèh ka kon qmang aih.

36 Ƀài mangai padro Mađi-an aràng Jôsep trùh ta diac Êdip, tech ka Phôtipha, cwan broq gàu ƀài lình wèq hnim Phara-ôn.