1 Jò ƀài bìac aih khoe gêh, i mangai lam doe ka Jôsep: Hacô baq ìh ùh hrŏc. Jôsep hi aràng Manase xam Epra-im, baiq ngai kon calô haq, hadai lam. 2 Wì bahìa ka Jacôp rai doe: Kô Jôsep, kon calô ìh, trùh hmàih ka ìh. Isorali àu haqngui ta juàng.

3 Jacôp anoe ka Jôsep: Boc Plình I cwìang Rìm trong, khoe mahnu loh, am xôq ramot ka baq ta Luxo gùng Cana-an. 4 doe rameh; Kô èh au broq ka ìh ha-uang ka bàc rai chèch lòe tam, broq ka mangai da ìh jah cràm; au am ka xinoe ìh gùng kô đòeq broq kùng hang mòeq đòe. 5 Manòeq kô, wa kon calô ma khoe ha-uang ka kon tagùng Êdip, adroe ka baq trùh, aih la Epra-im wa Mana-se, aih hanoh da baq tìah ka Ruƀên xam Simê-ôn diq. 6 Ƀài qyoh kon ma ha-uang tìa aih, ƀài aih èh da cla kon; trong taneh diac wì haq jah hadai tìah dèh ka wì oh daq. 7 Jò baq enh Phađan wìh hlài Cana-an, aih Rachên cachìt roc trong i mat baq, ten ka Ephorat; baq catùh haq oe ti trong hlài ta Ephorat aih (la Betlehem).

8 Jò Isora-li hnoq wa kon da Jôsep, haq bòch: Qmat ƀài cabô 9 Jôsep doe: Wa haq qmat kon Boc Plình ma khoe am ka au tagùng kô. Isora-li doe: Aràng wa trùh ta au, đòeq au waiq xôq ramot ka wa.

10 Jò aih, mat Isora-li khoe pùa majah qmang aih haq khoe craq pi oe hnoq cleq hòm, dài majah thê wa haq thia haten hu caqmuq hìp. 11 Isora-li doe ka Jôsep: Adroe kô nèh baq xoh đeh pi hnoq hadrò kon, yàng manòeq kô Boc Plình broq ka baq jah hnoq trùh nang noe da kon.

12 Atìq ka aih Jôsep doeh deh wa kon loh khoe ka cràng Isorali, khoe aih kùn cràng ta haqneq. 13 khoe èh, haq aràng wa qyoh trùh dèh ajang baq; tì pah qma haq dùi Epra-im cwa pah qngeo dèh baq, tì pah qngeo haq dùi Mana-se cwa pah qma. 14 Isorali hnhu kŏng pah qma, đòeq tagàu Epra-im, aih la mangai ma qyoh, tì pah qngeo đòeq tagàu Manase. Haq to i deh manoh đòeq tì qmang aih raq, majah qmang aih Manase aih mangai ma daq. 15 Khoe aih haq waiq xôq ramot ka Jôsep: Waiq Boc Plình da kan cadraq au aih la Apraham xam Ysac ma kùh waiq, aih la Boc Plình ma khoe wèq ban au enh jò baxèm clìh enh cliac trùh manòeq, 16 ƀình plình ma khoe dŏng au claih enh kan ranàc, am xôq ramot ka wa kon qyoh kô; qmot yiniq au xam kan cadraq au la Apra-ham xam Ysac, broq ka wa rai èh rai bàc ta crŏng taneh!

17 Mahaq Jôsep hnoq deh baq yŏc tì pah qma đòeq tagàu Epra-im, ta manoh ùh chìuq haq drah rùp tì dèh baq ma khoe đòeq tagàu Epra-im hu qnhac tŏc tagàu Manase, 18 khoe èh haq doe: Ùh xài qmang qmat baq. Mangai kô ma ramua tì pah qma da ìh đòeq tagàu haq ma troq. 19 Mahaq baq haq ùh waq rai rahen: Baq loq, baq loq kon. Haq kô èh hadai wìa mòeq diac, haq hadai jah kàn, mahaq yac ka qmang leq, oh haq dua yeo kàn èh xinoe haq jah wìa loh bàc diac. 20 Hì aih haq waiq xôq ramot ka wa kon calô kô rai doe: Enh dalam ka yiniq chôp kô èh mangai Isorali jah waiq xôq ramot am ka dabau: Waiq Boc Plình broq ka ìh jah tìah troeq wa Epra-im wa Manase. Qmang aih Jacôp dèch Epra-im oe adroe ka Manase.

21 Isora-li doe ka Jôsep: Baq èh cachìt, mahaq kô èh Boc Plình oe ti kon rai ahlài pì kon tagùng wì kan cadraq 22 èh baq am ka kon taneh yeo bàc ka ƀài oh daq, aih la taneh da mangai Amô-rit baq ma khoe blah yŏc xi panenh xi chang.