49
Jacôp waiq am xôq ramot dèh ka bài kon...
1 Jacôp creo dèh ka ƀài kon calô trùh ti rađeh rai doe: Tagop dudan ajang kô, baq hu anoe ƀài bìac ep trùh ka pì kon ta hì atìq kô èh.
2 Ƀài kon calô da Jacôp, drah thia tagop ajang kô hu tàng;
Tamàng bàu Isorali, baq da pì kon.
3 Ruƀên! aih la kon ramua da baq,
Kan dêh baq, teo padren baxèm da baq,
Rìh acaq lem yi loe dŏng, trong qnì loq haq yeo loq dìq dŏng.
4 Kon rachùi tìah ka diac tro, dài ma ùh diang đeh cabô.
Majah qmang aih kon khoe tŏc ta aniang baq
Kon tŏc juàng baq, broq kan padrùh ta aih.
5 Simê-ôn xam Lêwi wa aih oh daq mòeq cliac clèm.
Pla chang da wa aih joq ranac da kan ngang dù.
6 Waiq dôq mahua yiang da baq ùh pajùm ti wa,
Kan ranhòm da baq ùh alùh pajùm tanòe tagop da wa haq.
Majah qmang aih wì haq khoe jêh đac mangai ta kan panòeh.
Kat đac qnhàng ƀo qnìq tiaq deh manoh cla enh.
7 Kan nòeh da wì haq joq troq ka ra-òh hamaiq, majah qmang aih joq xòc joq qnàng.
Joq troq ka ra-òh hamaiq kan nòeh da wì haq, majah qmang aih ngang joq qnàng.
Au lah đac wì haq tahnim Jacôp,
Palac wì haq taqne mangai Isorali.
8 Juađa! kô èh oh daq hi manè apôi kon,
Tì kŏng kon jah padit ranŏng ƀài ƀình ma tagit ka kon.
Ƀài kon calô da baq kô èh jah hacùn cràng enh ngèa kon.
9 Juđa aih la sutùh caqmàng;
A kon! kon rùp jah hanùm khoe aih hua ahlài.
Haq canùng kùi i crài cleq ka sutùh calô.
Tìah ka sutùh kan; cabô hùa tŏc haqngui enh crŏng haq?
10 Long dùi da bùa, ùh talìc ka Juđa.
Mangai qnoh ranenh ùh catech khoe ka jènh haq.
Trùh jò Mangai Silô ma hi trùh.
Rìm diac dìq iu tiaq Mangai aih.
11 Haq kàt deh lùa ajang xèm nho,
Kàt dèh kon lùa qyoh ajang hamenh nho ma yeo lem dŏng.
Haq rùh dèh eo cwàn ta alac nho,
Yŏc mahim nho rùh dèh eo yôh.
12 Mat haq gam yeo hnau ka alac.
Hanenh haq taboc yeo hnau ka diac tôh.
13 Sabulôn oe ti nòe kênh diac raxìq.
Aih la nòe i boang kàn oe.
Acang taneh diac haq bòt qnah ta Siđôn.
14 Ysa-ca aih la lùa dêh padren,
Kùi padài taqne cadrong.
15 Jò hnoq dèh nòe kùi padài aih joq alàng.
Taneh aih joq lem qnàng,
Aih èh haq bet plêh xùi kan trap.
Ep iu tiaq trong broq xàu.
16 Đan jah hadrah deh mangai da haq.
Qmang ka xinoe da Isora-li.
17 Đan èh tìah qmang ka bìh oe ti kênh trong
Mòeq toq bìh plŏng roc trong,
Kap cachop axêh.
Broq ka mangai kòe axêh tacro dalùi,
18 Wôi Jêhowa! au tangèh gòm kan dèch claih da Ìh.
19 Gat èh i mòeq calùh lình clàm jêh haq.
Yàng èh haq tùh jêh chau rai qnat tiaq,
20 Enh nòe Ase i dahwèq ramaq jìang,
Haq palàng ngè jìang acaq ka ƀài bùa.
21 Nepta-li aih joe cadrì caqnaih enh cadrong.
Xêh loh ƀài kon joe lem lình.
22 Jôsep aih xèm nho, plì da haq top haraya,
Hon ten ka thòng diac,
Hamenh haq heo enh qnhèq ka canàng.
23 Mangai wê panenh khoe leoq haq,
Pênh rang rai canàt jêh haq.
24 Canòm ka tì kŏng Mangai I cwìang Rìm trong da Jacôp,
Dài panenh da haq dua cajap
Canòm ka Mangai Ban trìu, aih la Hmo da Isorali
Dài baiq toq kŏng haq rai dêh tam.
25 Boc Plình da Baq jah wiang ti kon;
Mangai I cwìang Rìm trong jah am xôq ramot ka kon,
Aih la xôq ramot loh enh plình,
Xam xôq ramot tŏc enh nòe kòe jrùq.
Xôq ramot enh tôh xam da cliac miq.
26 Xôq ramot baq waiq am ka kon glŏng ka haqnhèq.
Qnhèq ùh hnau ka xôq ramot wì kan cadraq da baq,
Haqnhèq ùh hnau ka ƀài bui wang qnhòng calah nèh.
Waiq ƀài xôq ramot kô oe tagàu Jôsep
Ajang ngòng mangai broq cla craq ƀài oh daq haq.
27 Ƀênja-min aih la koq yiang hrah ka acaq,
Disroq haq chriang rùp hanùm
Dixèq haq lah axong hanùm đeh khoe axan jah.
28 Ƀài wì aih dìq gàu rangàu da mòeq jàt baiq xinoe Isorali; aih la bàu baq wì haq doe jò qnang waiq xôq ramot am ka wì, waiq xôq ramot crài am ka tang ngai.
Jacôp cachìt.
29 Khoe aih haq thê dèh ƀài kon calô rameh: Baq kô èh hlài ti wì kan cadraq, pì kon catùh baq pajùm ti wì kan cadraq, ta kòp hmu nòe đùng ruàng Eprôn, mangai Hêtit, 30 aih la kòp hmo tađùng Macbêla haten ka Mamrê, gùng Cana-an, aih la nòe Apraham khe rot hu broq nòe đòeq cađac hanang hloe xam đùng ruàng da Eprôn. 31 Ta aih wì khoe catùh Apraham xam Sara mai haq; Ysac xam Rêbêca mai haq; hadai ta aih raq baq khoe catùh Lê-a, 32 Đùng ruàng aih xam kòp hmo khoe rot hlài enh xinoe mangai Hèch.
33 Jò tanap deh ka wì kon ƀài bàu aih hi khoe, Jacôp dèch hlài dèh jènh tŏc ta juàng, khoe aih hi pat, jah hlài dèh ti wì kan cadraq.