1 Jôsep kùp gàu enh ngèa dèh baq, hìp haq rai hmoe. 2 Khoe aih thê ƀài thài broq jreo ma xan patìh dèh ka rađeh, yŏc jreo xua thùm ha-ùng ka hanang dèh baq; wì aih hi ha-ùng ka Isorali. 3 Pôn jàt hì ha-ùng jreo hi khoe, aih la maneh ma pajaq đòeq ha-ùng jreo; mangai Êdip crò hmoe ka haq ta tapèh jàt hì.

4 Trùh hì hêq ka crò hmoe, Jôsep doe ka ƀài cwan da Pharaôn rameh: Tàng joq au jah đeh màiq enh ngèa pì, pì taqmon ƀiaq ka Phara-ôn bàu kô dôq haq tàng 5 Baq au i thê au hapah rameh: Kô èh baq cachìt, catùh baq ta ralùng baq ma khoe rot đòeq tagùng Cana-an. Qmang aih manòeq kô, au ep tŏc ta-aih catùh dèh baq, khoe èh hi tawìh loh tacô. 6 Phara-ôn doe ka haq: Tŏc beq catùh baq ìh, wop troeq bàu haq ma thê ìh hapah aih.

7 Jôsep hi tŏc hu catùh dèh baq, dìq dŏng ka ƀài cwan da Phara-ôn aih la ƀài cwan kàn xam ƀài gucraq ta diac Êdip dìq lam tiaq haq. 8 dìq dŏng ka hnim Jôsep, ƀài oh daq xam dìq ka hnim baq haq dìq tŏc lam tiaq cađac hanang ti haq; ta Gôsen oe toq wì kon qyoh, ƀài trìu xam ƀo da wì haq. 9 Xê xam axêh hanoh lam tŏc ti haq; mangai lam tiaq cađac hanang joq cràm joq qnàng! 10 Jò trùh ta haneh da Atat, pah tau ka cròng diac Jôđan, wì crò hmoe ra-ua, ta aih Jôsep broq ramènh cađac hanang dèh ka baq ta tapèh hì. 11 Mangai Cana-an aih la mangai rìh tagùng aih hnoq kan crò hmoe ta hamlang haneh da Atat, wì doe: Mangai Êdip broq ramènh cađac hanang joq ranhòm qnàng. Aih ìq wì majah creo ka nòe haten ka cròng diac Jôđan kô la Aƀên-mitra-im.

12 Qmang aih ƀài kon calô da Jacôp broq tiaq deh bàu baq ma tanap đòeq. 13 Ahlài hanang deh baq tŏc ta Cana-an, catùh ta kòp hmo tađùng Macbêla ten ka Mamrê, aih la nòe Apraham khoe rot hloe xam đùng ruàng Eprôn, mangai Hêtit đòeq broq nòe cađac hanang.

14 Catùh dèh baq hi khoe, Jôsep xam ƀài oh daq hloe xam ƀài mangai khoe lam tiaq cađac hanang deh baq, dìq loh ta Êdip.

15 Wì oh daq hnoq dèh baq khoe cachìt, aih wì ta anoe ka dabau: Broq braiq kô èh Jôsep loq git ka bèn èh patem chau trong dù bèn ma khoe broq ka haq. 16 Wì daq thê mangai lam anoe ka Jôsep rameh: Adroe ka cachìt baq tanap qmang kô 17 Pì anoe ka Jôsep rameh: Baq cali calo kon cađac kan dù, xam yiniq lui da wì daq kon, jò wì haq tabroq ka kon pi i ka ƀè ƀàn cleq; manòeq kô baq cali calo ka kon cađac ƀài yiniq lui ka ƀài hapŏng Boc Plình da baq. Tàng ƀài bàu kô Jôsep hi hmoe.

18 Khoe aih cla ƀài daq trùh bla op enh ngèa Jôsep rai doe: Nhèn daq kô hapŏng oh. 19 Jôsep tèu: Pì daq apaq yùq cleq, majah qmang aih wìa ka au jah thai Boc Plình qmòh?. 20 Pì daq khoe qnac trong hu broq haƀo đac ka au, mahaq Boc Plình enh broq gêh trong lem ka au, aih la đòeq hu wèq kan rìh da bàc ngai, qmang ka pì daq khoe hnoq hì kô. 21 Qmang aih ùh dùh yùq dèh, i au am tôm tàu ka pì daq xam wì kon da pì daq. Khoe aih haq alòng ƀài daq, yŏc bàu habuàt capoch tuàng ti wì.

22 Jôsep xam hnim baq haq rìh oe ta Êdip; haq halình jah mòeq hrinh mòeq jàt hanam. 23 Haq jah hnoq kon xau da Epraim trùh piq qnhòng, hadai jah hnoq ƀài xau da Maki, aih la kon calô da Manase. 24 Khoe ka aih, Jôsep anoe dèh ka wì daq: Au kô ten cachìt, mahaq kô èh joq Boc Plình trùh hmàih ka oh daq, yŏc ahlài pì oh daq tagùng haq ma khoe hapah đòeq tèu am ka Apraham, Ysac xam Jacôp. 25 Jôsep thê ƀài kon calô da Isorali hapah rameh: Joq qnàng kô èh Boc Plình trùh hmàih hu wiang ti oh daq, aih èh pì ep qnhac caxènh au loh khoe ka gùng kô.

26 Qmang aih Jôsep cachìt, rìh jah mòeq hrinh mòeq jàt hanam. Wì ha-ùng jreo xua thùm ka hanang haq, lòm hanang haq ta mòeq toq hom tagùng Êdip.