1 Kô yiniq ƀài kon calô da Isorali, rìm ngai qnung dèh mangai tahnim rađeh lam tiaq Jacôp loh oe ta Êdip: 2 Ruƀên, Simê-ôn, Lêwi, xam Juđa; 3 Ysaca, Saƀulôn, xam Ƀêjamin, 4 Đan, Neptali, Gat xam Ase. 5 Ƀài mangai ha-uang loh enh Jacôp dìq dŏng jah tapèh jàt ngai; Jôsep khoe oe ta Êdip.

6 Jò kô, Jôsep xam ƀài oh daq haq, xam dìq ka ngai qnhòng aih dìq cachìt dŏng. 7 Mangai Isorali chèch lòe tam rai èh rai bàc haraya, loh ka rai èh rai padrŏng dêh; jàp jìa ka gùng. 8 Atìq ka aih, ta diac Êdip i mòeq ngai neo tŏc broq bùa, ùh qnì ka Jôsep. 9 Bùa doe dèh ka mangai tadiac da haq: Ngan kô, mangai Isorali bàc rai yi dêh hnau ka bèn. 10 Beq bèn yŏc kan rabiaq hu tabroq ka wì haq, ùh meh èh wì loq bàc tam, tàng beq loq i kan tajêh tablah, wì haq loq taqmùt ka ƀài lình wì hu jêh hlài bèn khoe èh cadàu loh enh gùng bèn qmòh. 11 Qmang aih wì dèch ƀài mangai broq gàu ƀài hapŏng đòeq hu panan mangai Isorali ep abroq xalep, wì xài than phôq Phithom xam Ramse đòeq broq kho ka Phara-ôn. 12 Mahaq kiang mangai Êdip panan wì haq abroq xalep dàng leq aih kiang mangai Isorali bàc tam dàng aih. Mangai Êdip loh ka tagit ka mangai Isorali. 13 Panan wì haq broq nhang dìq jaq. 14 Broq ka mangai qnhòng aih rìh ta kan hamoq, majah qmang aih ep jôiq taneh, broq gech hloe xam rìm yiniq abroq qnoeq tagùng. Ƀài bìac aih mangai Êdip panan mangai isorali broq joq nhang dìq jaq.

15 Bùa Êdip doe ka ƀài ƀamùq da mangai Hêbru, mòeq ngai yiniq Sipra, mòeq ngai yiniq haq Phu-a, 16 rameh: Jò pì lam ngan mangai Hêbru ha-uang, waq toq hnoq kon calô aih broq đac dôq haq cachìt, tàng hnoq kon cadrì aih đòeq rìh. 17 Mahaq ƀài ƀamùq iu yùq ka Boc Plình, ùh broq tiaq bàu da bùa Êdip tanap, rong ƀài kon calô rìh dŏng. 18 Bùa Êdip creo ka ƀài ƀamùq rai bòch: Hagleq pì ma broq qmang aih, đòeq ka ƀài kon calô rìh dŏng? 19 Ƀài bamùq padreo bàu: Aih pàng ƀài mangai gucadrì Hêbru ùh xài qmang ka mangai Êdip; majah qmang aih wì haq yeo dêh, khoe ha-uang adroe ka jò nhèn trùh. 20 Boc Plình am xôq ramot ka ƀài ƀamùq, mangai Isorali chèch lòe tam loh ka raya rayùc. 21 Qmang aih pàng ƀài ƀamùq iu yùq ka Boc Plình, dài haq majah broq ka hnim wì aih jah padrŏng.

22 Phara-ôn qnoh ranenh kô am ka dìq dŏng mangai da haq: Waq toq kon calô da mangai Hêbru maneo ha-uang, khwênh qnìh dŏng tadiac; yàng ƀài kon cadrì aih rong rìh.