1 Manòeq kô, i mòeq ngai ta xinoe Lêwi lam yŏc mòeq ngai kon adrùh Lêwi broq mai, 2 haq hadràp, ha-uang loh mòeq ngai kon calô; hnoq dèh kon lem la alàng, haq lam cadoc ta piq khê. 3 Mahaq enh cadoc tam yeo dùnh hòm pi jah, haq hi yŏc mòeq toq talênh clìt jan chai xam jan haqnùh, khoe èh tah kon qyoh ta aih, lam caqnaih ta đam triang niaq ti kênh diac. 4 Mangai daq cadrì yòng ngan enh hangai đòeq loq haq qmang leq cadèh. 5 Khoe aih, kon adrùh da Phara-ôn loh ta diac Nin đòeq hùm, ƀài mangai hapŏng cadrì aih lam dauq ti kênh diac; kon adrùh bùa hnoq talênh ri aih taqne đam triang niaq, hi thê deh hapŏng cadrì loh dèch. 6 Kon adrùh bùa pèh ngan ta talênh, hnoq kon qyoh, aih la kon calô qyoh qnang hmoe, haq ha-och loh ka tadèch qmòe nòeh rai doe: Kô kon da mangai Hêbru. 7 Daq cadrì da kon qyoh aih doe ka kon adrùh bùa: Au lam chaq mòeq ngai Hêbru đòeq ta-ùq kon qyoh kô ka ìh oq? 8 Kon adrùh bùa doe: Òq lam beq. Mangai cadrì qyoh aih lam creo ka miq cla kon qyoh. 9 Kon adrùh bùa doe: Ahlài kon nga kô ta-ùq ka au, i au caqnaih ka ìh ƀac baha. Mangai gucadrì caqmìn ahlài kon qyoh aih hu ta-ùq. 10 Trùh jò khoe yòng kàn, haq ajèn qnàng kon qyoh aih qmùt ka kon adrùh bùa, haq aih yŏc kon qyoh kô broq deh kon, yiniq am ka haq la Môise, majah qmang aih haq doe au khoe dèch haq tŏc enh diac.

11 I mòeq hì jò Môise khoe kàn, haq lam trùh dèh ti ƀài oh daq, ngan hnoq kan abroq xalep da wì haq; èh hadai hnoq mòeq ngai Êdip jêh mòeq ngai Hêbru oe ta ƀài oh daq rađeh; 12 Ti ngan dudan ùh hnoq i cabô, haq hi jêh đac mangai Êdip, khoe aih catùh ta braih. 13 Trùh hì atìq, Môise lam hòm hnoq baiq ngai Hêbru jêh dabau, haq doe ka mangai broq yiniq rameh: Hagleq ìh ma jêh dèh bua? 14 Yàng mangai aih doe: Cabô dèch ìh broq bùa, broq cwan hadrah nhèn? Ahìaq ìh enh jêh đac au qmang ka khoe jêh đac mangai Êdip tau ùh xài? Môise crè pi cajaq hèm ta manoh: Joq qnàng yiniq au broq kô wì khoe loq dŏng! 15 Phara-ôn hìa bìac aih, hi ti chaq jêh đac Môise, mahaq haq khoe cadàu mot ka Phara-ôn, haq yòng padài tagùng Mađi-an, haqngui ten ka adràm diac.

16 Jò kô, mangai pajàu gùng Mađi-an i tapèh toq kon cadrì; ƀài wì aih lam qmùc diac ta adràm ùc ta atong đòeq am ka ƀài trìu baq wì haq ôq. 17 Mahaq ƀài mangai ban trìu trùh hnan đac wì haq; Môise padinh yòng wiang ti ƀài kon cadrì aih khoe èh am ƀài trìu ôq diac. 18 Jò ƀài kon cadrì aih hlài tahnim Rê-u-ên aih baq wì haq, aih haq hi bòch: Hì kô gleq pì kon majah hlài sroeh? 19 Wì doe: I moeq ngai Êdip wiang dŏng nhèn khoe ka tì kŏng ƀài mangai ban trìu, hadai khoe wiang qmùc diac pi cajaq am ka trìu ôq diq. 20 Baq bòch hòm: Mangai aih manòeq kô taleq, hageq pì lam ma cađac đac haq, xài drah akhen ka haq trùh tacô đòeq i cleq hu acaq. 21 Môise enh oe ti mangai kô, haq aih am deh kon la Sêphôra broq mai Môise. 22 Haq ha-uang mòeq toq kon calô, Môise yiniq deh kon la Getsôn, majah qmang aih haq doe: Au oe đeh nòe diac wì.

23 Atìq ka aih toq ƀiaq, bùa diac Êdip cachìt. Mangai Isorali toq hràng rai creo dang ka Boc Plình majah qmang aih wì haq broq dìc ep patì xalep; bàu creo dang aih tŏc trùh ta Boc Plình. 24 Boc Plình tàng bàu wì haq creo dang, hmàng hlài deh tajao đeh ma broq ti Apraham, Ysac xam Jacôp. 25 Boc Plình tamèt ka mangai Isorali, canau loq kan nanxa da wì haq.