1 Manòeq kô Môise ban trìu ka Jêtrô, baq mai haq, aih la pajàu da gùng Mađi-an, tiaq calùh trìu tŏc pah tau ka đùng hawit, trùh tawang da Boc Plình aih la wang Hôrep. 2 Ƀình plình da Jêhowa mahnu loh ti haq ta pla ùnh taqne xèm yila tau. Haq ngan hnoq dìq ka xèm yila qnang cheo, mahaq ùh lòm pat. 3 Môise hèm: Au cadiang lam ngan kan halac kô hagleq xèm yila cheo mahaq ùh dùh qmòe ka pat.

4 Jò Chuaq Jêhowa hnoq Môise cadiang trùh ngan, Boc Plình oe taqne xèm yila creo: Môise! Môise! Haq padreo bàu: Hacô au kô. 5 Boc Plình doe: Paq thia haten jang kô! Drah lêh da ìh jai qmat majah qmang aih nòe ìh qnang yòng qmat raq taneh hadròeh. 6 Èh haq doe tam: Au kô Boc Plình da kan cadraq ìh, Boc Plình da Apraham, Boc Plình da Ysac, Boc Plình da Jacôp. Môise hi bàng dèh mat majah qmang aih haq yùq loq ngan hmoq Boc Plình.

7 Chuaq Jêhowa doe: Joq au khoe hnoq kan nanxa da mangai da au oe tagùng Êdip. Au khoe tàng bàu wì haq crò hmoe taiq mangai broq gàu ƀài hapŏng ta wì haq, joq au loq kan xa ep da wì haq. 8 Qmang aih, au khoe loh đòeq hu dèch wì haq loh khoe ka tì kŏng mangai Êdip, qnung ajèn enh aih tŏc tagùng tau aih la gùng lem alàng rai anòh anài, clàng qmòe sùa xam diac xùt, aih la gùng da mangai Cana-an, mangai Hêtit, mangai Amôrit, mangai Phêrêsit, mangai Hêwit, xam mangai Jêbusit. 9 Kô, bàu crò hmoe da mangai Isorali khoe tŏc trùh ta au, èh au khoe hnoq mangai Êdip taqbroq ka wì haq qmang leq cadèh; 10 Qmang aih manòeq kô lam ajang kô. Au hu thê ìh lam trùh ta Phara-ôn đòeq qnoh Isorali mangai da au loh khoe ka Êdip.

11 Mahaq Môise doe: Au kô ìq cabô ma hùa trùh glàm Phara-ôn, đòeq hu qnoh mangai Isorali loh khoe ka gùng Êdip? 12 Boc Plình doe: kô èh Au oe ti ìh, kô yiniq đòeq broq teo hadro am ka ìh loq au khoe thê ìh lam. Jò ìh khoe qnung mangai Isorali loh khoe ka gùng Êdip, aih èh pì hi patìh ka Boc Plình tabui wang kô. 13 Môise padreo bàu ka Boc Plình: Kô èh au lam trùh ta mangai Isorali, anoe ka wì rameh: Boc Plình da kan cadraq pì thê au trùh tapì; mahaq tàng wì bòch: Yiniq haq aih cleq? aih èh au tèu wì qmang leq? 14 Boc Plình doe: “Au kô raq Au kô”. Kô bàu đòeq ìh anoe ka mangai Isorali: cla “Au kô raq” ma khoe thê au trùh tapì.

15 Boc Plình doe hòm ka Môise: Ìh anoe ka mangai Isorali qmang kô: Jêhowa Boc Plình da kan cadraq pì, Boc Plình da Apraham, Boc Plình da Ysac, Boc Plình da Jacôp, thê au lam trùh tapì. Aih raq yiniq mòeq đòe da au, enh qnhòng kô trùh qnhòng tau.

16 Lam beq, tagop ƀài gucraq Isorali anoe ka wì haq rameh: Jêhowa Boc plình da an cadraq pì, Boc Plình da Apraham, Boc Plình da Ysac, Boc Plình da Jacôp khoe loh ti au rai doe rameh: Joq qnàng au khoe trùh hmàih ka pì, hnoq kan wì tabroq ka pì tagùng Êdip, 17 dài au ma khoe jah doe: Au doeh pì loh enh kan xalep tagùng Êdip, đòeq aràng pì tŏc gùng da mangai Cana-an, mangai Hêtit, mangai Amôrit, mangai Phêrêsit, mangai Hêwit xam mangai Jêbusit, aih la gùng clàng sùa xam diac xùt. 18 Ƀài gucraq da mangai Isorali wì haq tiaq bàu ìh, aih èh ìh xam ƀài gucraq Isorali drah lam glàm bùa da Êdip doe ka haq rameh: Chuaq Jêhowa, Boc Plình da mangai Isorali, khoe mahnu loh ti nhèn. Qmang aih manòeq kô dôq nhèn lam trùh tađùng hawit, adreo kô piq hì ka trong đòeq hi dèch ramènh ka Jêhowa Boc Plình nhèn. 19 Mahaq au loq bùa da Êdip ùh jò leq caqnaih pì lam tàng joq ùh yŏc tì kŏng i cwìang rìm trong hu panan haq. 20 Mahaq au qnoh dèh tì kŏng hu tabroq ka gùng Êdip xi ƀài kan halac da au taqne gùng aih, khoe aih wì haq hi caqnaih pì lam. 21 Èh au broq ka mangai Êdip lem manoh tamèt ka mangai Isorali, aih èh jò loh lam pì ùh lam tì dech. 22 Rìm ngai gucadrì ep bòch ƀài gucadrì ta aih, hloe xam ƀài mangai ma oe canòm đeh hnim pì ƀài ngè ma broq xi wang, xi ƀac xam eo cwàn, hu caxùnh am dèh ka kon calô cadrì da pì. Ƀài pì lôq mangai Êdip hreo hrua qmang aih èh.