1 Môise doe: Mahaq mangai Isorali ùh lùi, èh ùh tiaq bàu au, majah qmang aih wì doe: Chuaq Jêhowa ùh i mahnu rađeh ka ìh jò leq. 2 Chuaq Jêhowa doe: Ìh wê cleq ta tì ìh qmat Haq padreo bàu: Mòeq toq long dùi. 3 Chuaq Jêhowa Boc Plình doe: Drah tèm caqnìh ta taneh beq. Haq tèm caqnìh ta taneh, long dùi wìh wìa mòeq toq bìh; Môise cadàu ka bìh. 4 Chuaq Jêhowa doe: Yŏc tì cadop tênh haq. Haq dèch tì cadop, aih haq hi wìa hlài long dùi ta tì haq. 5 Chuaq Jêhowa doe: Aih đòeq ka wì lùi Jêhowa Boc Plình da kan cadraq wì haq, aih la Boc Plình da Apraham, Boc Plình da Ysac, Boc Plình da Jacôp khoe loh ti ìh.

6 Chuaq Jêhowa doe hòm ka Môise: Qmùt tì ìh enh dalam ka eo. Môise qmùt dèh tì ta eo yàng jò haq hi doeh qnoh. Hacô akia haq loh ka bacùn, mang taboc tìah ka preo. 7 Khoe aih, haq doe hòm: Manòeq qmùt hlài tì ìh ta eo. Môise qmùt khoe aih doeh qnoh. Meh tì haq hi lem hlài tìah ka xech akia dèh dùnh. 8 Khoe aih Chuaq Jêhowa doe: Tàng wì aih ùh lùi ìh èh hadai ùh iu tiaq bàu teo ma adroe, aih èh wì haq lùi tiaq bàu teo ma atìq. 9 Mahaq tàng joq wì ùh lùi dŏng baiq teo kô rai ùh iu bàu ìh, aih èh ìh qmùc yŏc diac Nin, èh pùc diac aih ta taneh croh, diac ìh ma qmùc enh diac Nin aih hi wìh wìa mahim ta taneh.

10 Môise doe ka Chuaq Jêhowa: Ìh apaq manaq dayo dèh ka hapŏng ìh, yac ka enh hì nèh hì mòe, yac ka enh jò baxèm ìh ma anoe, au dua ùh xài mangai rabiaq hacùng bàu, majah qmang aih au kô mangai capoch raqmàp 11 Chuaq Jêhowa doe: Cabô broq loh hacùng kon mangai? cabô khoe broq ka làu, broq ka clìc, broq ka ùh xau? Ma ùh xài Au, Chuaq Jêhowa? 12 Manòeq kô lam beq, èh i au oe ti hacùng ìh rai hnài ka ìh bàu ma ep capoch. 13 Môise doe: Chuaq Jêhowa Ìh apaq taqmrua ka hapŏng ìh, ìh enh thê deh cabô hi thê. 14 Chuaq Jêhowa loh ka nòeh ka Môise, haq doe: Arôn mangai Lêwi ajoq daq ìh? Au loq mangai aih rabiaq ka capoch, hatau haq qnang lam ƀoe ìh, èh haq aih lem bùi raya jò hnoq ìh. 15 Qmang aih ìh drah anoe ka haq rai taqmroq đòeq bàu ta hacùng haq. Jò chôp capoch, i au oe ti hacùng ìh xam hacùng daq ìh, hnài chôp rìm yiniq cleq ma ep broq. 16 Haq aih èh ma anoe tuàng ti wì thai ka ìh, đòeq broq hacùng ka ìh, da ìh hòm hi tìah taiq ka Boc Plình ka haq. 17 Ìh drah wê long dùi kô đòeq hu broq ƀài kan halac.

18 Khoe aih Môise hlài dèh ta Jêtrô, baq mai rađeh, haq doe: Am au wìh hlài dèh ta wì oh daq au oe ta Êdip, đòeq hu hmàih ngan wì haq oe i đeh bô ma oe rìh loq ùh. Jêtrô doe ka Môise: Kon lam ka catèm oq.

19 Jò aih Chuaq Jêhowa doe ka Môise ta Mađi-an: Drah hlài ta Êdip, majah qmang aih ƀài mangai ma chaq jêh đac ìh cachìt khoe dìq. 20 Môise hi dèch deh mai xam kon tŏc crŏng lùa, hlài ta Êdip. Haq hadai wê long dùi da Boc Plình ta tì. 21 Chuaq Jêhowa doe ka Môise: Jò ìh hlài tagùng Êdip, ep rabiaq ka ƀài trong halac au ma khoe jao ka tì kŏng ìh broq enh ngèa Phara-ôn; mahaq au broq ka haq cadoq manoh đòeq ùh caqnaih mangai Isorali loh lam. 22 Qmang aih ìh ep anoe ka Phara-ôn rameh: Chuaq Jêhowa i doe qmang kô: Isorali aih kon au, aih la kon calô ramua au, 23 dài au majah thê ìh: Caqnaih kon au lam, đòeq haq patìh ka au, mahaq ìh khoe ùh waq. Kô èh au jêh đac kon calô ìh, aih kon ramua da ìh.

24 Jò qnang lam ti trong, Boc Plình loh tàt ngèa Môise tanòe hnim padài đò, hu jêh đac haq. 25 Sêphôra yŏc mòeq toq chang xi hmo kat akia deh kon khoe aih khwênh troq jènh Môise rai doe: Joq qnàng ìh kô mangai ŏng mahim au. 26 Boc Plình pi jêh ŏng haq hòm; haq majah doe: Mangai ŏng mahim aih taiq ramènh kat akia.

27 Chuaq Jêhowa doe ka Arôn: Lam tađùng hawit hu đìh Môise. Arôn hi lam, glàm Môise tawang da Boc Plình, rai hìp haq. 28 Môise taƀoe hlài ka Arôn rìm nà bàu da Chuaq Jêhowa ma khoe thê đeh anoe hloe xam ƀài kan halac Haq khoe hnài đeh broq. 29 Qmang aih Môise lam ti Arôn, tagop ƀài gucraq ta mangai Isorali. 30 Arôn hi taqmon hlài dìq dŏng bàu da Chuaq Jêhowa ma khoe doe ka Môise rai broq ƀài kan halac enh ngèa wì haq. 31 Wì hi lùi, loq joq Chuaq Jêhowa khoe trùh hmàih ka mangai Isorali, rai hnoq kan nanxa da wì haq; wì hi hacùn cràng kùh waiq.