1 Atìq ka aih, wa Môise wa Arôn lam doe ka Phara-ôn: Jêhowa Boc Plình da mangai Isorali i doe qmang kô: Caqnaih mangai da auh loh lam, đòeq wì haq hu wèq mòeq ramènh ka au tađùng hawit. 2 Mahaq Phara-ôn tèu: Jêhowa aih ìq cabô au ma ep iu tiaq dèh bàu haq, caqnaih ka mangai Isorali loh lam? Au ùh qnì ka Jêhowa leq; au hadai ùh caqnaih mangai Isorali loh lam. 3 Môise xam Arôn doe: Boc Plình da mangai Hêbru khoe loh ta nhèn. Manòeq kô caqnaih nhèn mùt tađùng hawit, qnah ta piq hì lam ka trong, đòeq hu dèch ramènh ka Chuaq Jêhowa Boc Plình nhèn, tàng ùh meh haq yŏc kan dài qnì chang jaoq qnì hu tabroq ka nhèn. 4 Bùa Êdip doe: Wùih Môise xam Arôn! Hagleq chôp majah basrùq wì cađac yiniq broq qmang aih? Hlài broq da chôp bìac beq. 5 Phara-ôn doe hòm: Ngan tau, mangai hi maxìa maxep qmang tau aih ka chôp khech tàt wì haq abroq. 6 Hì aih raq Phara-ôn thê ƀài mangai pariaq xam ƀài mangai ngan abroq rameh: 7 Pì pi dùh am ka wì hri đòeq broq gech qmang ka adroe nèh hòm; cla wì ha ep lam chaq deh. 8 Mahaq pì pajaq ka wì haq sôq gech waq ka troq qmang ka jaq dùnh, ùh dùh xùch broq cleq; majaq qmang aih wì haq qmat aroh, chaq nen wiang doe: Beq! lam dèch ramènh ka Boc Plình bèn! 9 Taqmòq yiniq broq ma trap ka wì haq đòeq wì haq jiang ka abroq aih èh pi hìaq tangèh trong bàu qnùt talìq hòm.

10 Ƀài mangai pariaq xam ƀài mangai ma ti ngan abroq anoe ka mangai Isorali rameh: Phara-ôn doe qmang kô: Au pi am hri ka pì hòm. 11 Cla pì loq chaq taleq chaq; mahaq ùh xùch yiniq broq ka pì yac ka toq biaq hnha. 12 Manòeq kô, mangai Isorali hi lam jàp jìa ka gùng Êdip toch xèm hri qmau thai ka hri. 13 Ƀài mangai broq gàu ƀài hapŏng toq bahuiq: Broq beq waq ka gêh ƀìac da pì, wop troq qmang ka maneh ma khoe pajaq ka pì, hì leq waq ka gêh meh, tìah ka jò ma oe am hri ka pì. 14 Ƀài mangai Phara-ôn dèch wì haq broq mangai pariaq, jêh rai lech ka ƀài mangai Isorali wì haq ma khoe thê broq mangai ti ngan abroq rameh: Hagleq enh hì nèh trùh hì kô pì ma ùh gêh dèh ka yiniq broq gech qmang ka enh adroe nèh?

15 Ƀài mangai ngan abroq ta mangai Isorali trùh doe ka Phara-ôn rameh: Gleq bùa ma tabroq dèh ka ƀài hapŏng qmang kô? 16 Wì ùh am ka nhèn hri, aih ka xan thê nhèn qmang kô: Broq gech beq! Ngan kô ƀài hapŏng da ìh jah jìq đeh; yiniq lui kô oe ajang bùa. 17 Mahaq bùa tèu: Pì qmat chŏc ƀài aroh, ƀài aroh! Dài aih pì majah chaq nen doe ka dabau: Beq bèn lam dech ramènh ka Chuaq Jêhowa! 18 Manòeq kô chaq lam broq beq! Mahaq ùh i cabô am ka pì hri taleq, mahaq gech aih waq ka tôm taih.

19 Qmang aih ƀài mangai ngan abroq da mangai Isorali loh ka rawè, majaq qmang aih wì i doe ka wì haq: Pì ùh jah baxùch sôq gech ma khoe pajaq ka wì, hì leq waq ka gêh dèh hì aih. 20 Jò khoe loh enh Phara-ôn aih wì haq hnoq Môise xam Arôn khoe gòm ta-aih. 21 aih wì haq hi doe: Chôp khoe broq ka nhèn wìa kan xua om enh ngèa ka Phara-ôn xam ƀài cwan, khoe qnèp chang ta tì wì haq đòeq hujêh đac nhèn. Waiq dang Jêhowa hadrah ngan chôp qmat. 22 Môise wìh hlài ta Chuaq Jêhowa rai anoe: Waiq Chuaq! hagleq ìh ma khoe haƀo ka mangai Isorali? Chuaq thê au trùh broq cleq? 23 Pang jò au ma lam glàm Phara-ôn, yŏc yiniq ìh hu anoe ka haq, aih kiang haq dalam ka wì kô, yàng Chuaq aih yi ùh i dèch baclaih dèh mangai da ìh.