1 Chuaq Jêhowa doe ka Môise rameh: Manòeq kô ìh ngan trong au ma hu baxa Phara-ôn; yŏc tì kŏng i cwìang rìm trong đòeq panan bùa aih hu caqnaih rai hnan mangai Isorali loh khoe dèh ka gùng haq. 2 Boc Plình doe tam ka Môise: Au kô raq Jêhowa. 3 Au khoe loh ti Apraham, ti Ysac, xam Jacôp, mahnu rađeh kô raq Boc Plình i cwìang rìm trong; mahaq yiniq da au la Jêhowa aih au qnhòq lah mahnu ka wì haq loq. 4 Au hadai i broq tajao ti wì haq, đòeq hu am taneh Cana-an, aih la gùng wì haq khoe oe đeh tìah taiq ka mangai diac qnoeq. 5 Au hadai khoe tàng bàu creo dang da mangai Isorali majah qmang aih mangai Êdip khoe rùp wì haq broq hapŏng dìc, aih au hmàng trùh dèh tajao. 6 Qmang aih, ìh anoe ka Isorali rameh: Au kô raq Jêhowa, kô èh au jah lêh caqnaih pì khoe ka long ech da mangai Êdip ma khoe taqmòq ka pì; hadai doeh pì khoe ka broq hapŏng dìc; au bahnhuh dèh kŏng, yŏc kan hadrah kàn đòeq baxon yŏc hlài pì. 7 Kô èh au yŏc pì broq mangai da au, èh au broq Boc Plình pì, aih èh pì jah loq Au kô raq Jêhowa Boc Plình pì, khoe caqnaih pì khoe ka kan trap da mangai Êdip. 8 èh au qnung pì mùt tagùng au ma khoe hapah đòeq tèu am ka Apraham, ka Ysac, ka Jacôp, hu am ka pì broq kùng hang: Au kô raq Jêhowa. 9 Môise anoe hlài wop qmang aih ka mangai Isorali, mahaq taiq kan mangò kàn èh taiq kan trap da mangai broq đeh hapŏng dài wì haq majah ùh ùh lòm tamàng bàu Môise. 10 Chuaq Jêhowa doe ka Môise rameh: 11 Lam beq! anoe ka Phara-ôn bùa Êdip, ep caqnaih mangai Isorali loh khoe ka gùng haq. 12 Mahaq Môise anoe ka Jêhowa rameh: Ngan, au kô ùh xài mangai rabiaq hacùng bàu, mangai Isorali ùh waq tàng bàu au, loq ka Phara-ôn ma waq tamàng au qmòh?. 13 Chuaq Jêhowa doe hòm ka Môise xam Arôn, thê wa ep lam trùh ti mangai Isorali xam Phara-ôn bùa Êdip, đòeq hu qnoh mangai Isorali loh khoe ka gùng Êdip.

14 Kô gàu da ƀài hadròng hadrech da mangai Isorali. Ƀài kon calô da Ruƀên, aih la kon calô ramua da Isorali: Hênoc, Phalu, Hêtrôn, Katmi. Aih la ƀài hadrech da Ruƀên.

15 Ƀài kon calô da Simê-ôn aih la: Jêmu-ên, Jamin, Ôhat, Jakin, Xôha, xam Saulo aih la kon da mai mangai gùng Cana-an. Aih ƀài hadròng hadrech da Simê-ôn.

16 Kô yiniq da ƀài kon calô da Lêwi, tiaq tang hadròng da wì haq: Getsôn, Kêhat, Mêrari. Lêwi halình jah moeq hrinh piq jàt tapèh hanam. 17 Ƀài kon calô da Getsôn tiaq deh tang hadròng: Lipni, Simê-i. 18 Ƀài kon calô da Kêhat: Amram, Jitsêƀa, Hêprôn xam Uxi-ên. Kêhat rìh jah mòeq hrinh piq jàt piq hanam. 19 Ƀài kon calô da Mêrari aih la: Macli xam Musi. Aih la ƀài hadròng hadrech da Lêwi tiaq tang hadròng hadrech da wì haq.

20 Amram yŏc Jôkebêt aih dùch haq, broq mai; mangai aih ha-uang ka haq Arôn xam Môise. Amram halình jah mòeq hrinh piq jàt tapèh hanam. 21 Ƀai kon calô da Jitsêha aih la: Kôrê, Nêphêt, xam Xiacri. 22 Ƀài kon calô da Uxi-ên aih la: Misa-ên, Ênsaphan xam Sicri. 23 Arôn yŏc Êliseƀa, kon cadrì da Aminađap, oh Nahasôn; mangai cadrì aih ha-uang ka haq Nađap, Abihu, Êlê-asa xam Ythama. 24 Ƀài kon clô da Kôrê aih la: Êncana xam Abi-asap. Aih la ƀài adrech da mangai Kôrê.

25 Êlê-asa kon calô da Arôn yŏc kon cadrì da Phuti-ên broq mai; mangai cadrì aih ha-uang loh Phinê-a ka haq. Aih la ƀài gàu gùc ta cadraq mangai Lêwi, tiaq dèh tang hadròng.

26 Aih! Arôn xam Môise, aih la mangai Chuaq Jêhowa ma khoe thê: Drah qnoh mangai Isorali, tiaq tang ƀình lình hu loh khoe ka gùng Êdip. 27 Wa aih raq mangai ma doe ka Phara-ôn, bùa Êdip, đòeq qnung mangai loh khoe ka gùng aih. Aih Môise xam Arôn kô raq.

28 Qmang aih, ta hì Jêhowa ma anoe ka Môise tagùng Êdip, 29 aih Haq i doe rameh: Au kô raq Jêhowa, ìh ep doe hlài ka Phara-ôn, bùa Êdip dìq dŏng rìm nà bàu au ma padon anoe ka ìh. 30 Môise padreo bàu: Au kô mangai capoch hi raqmàp, wìa ka Phara-ôn ma waq tamàng au qmòh