1 Chuaq Jêhowa thê hòm Môise rameh: Ngan beq! Au dèch ìh tìah qmòe ka mat mahì ka Phara-ôn, èh Arôn daq da ìh aih èh broq mangai pajàu da ìh. 2 Ep anoe hlài ma dìq bàu au ma padon anoe ka ìh, khoe aih Arôn daq ìh, hi anoe hlài ka Phara-ôn, đòeq haq caqnaih mangai Isorali loh khoe dèh ka gùng. 3 Au kô èh broq ka Phara-ôn cadoq manoh, rai tam bàc kan halac da au tagùng Êdip. 4 Mahaq dua Phara-ôn ùh lòm tamàng pì; tì kŏng au poh ta taneh Êdip, yŏc ƀài kan tah hadrah trap, đòeq doeh ƀình lình da au, aih la mangai Isorali 5 Jò au poh tì kŏng ta taneh Êdip đòeq qnoh mangai Isorali loh khoe taqne mangai Êdip, aih èh wì hi loq Au kô raq Jêhowa. 6 Wa Môise wa Arôn broq tiaq wop qmang ka bàu Chuaq Jêhowa khoe tanap thê. 7 jò wa haq lam anoe ka Phara-ôn, aih Môise khoe jah rahem jàt hanam èh Arôn khoe jah rahem jàt piq hanam.

8 Chuaq Jêhowa doe ka Môise xam Arôn, 9 Jò Phara-ôn doe ka chôp: Broq kan halac beq, aih èh ìh hi doe ka Arôn qmang kô: Drah yŏc long dùi daq qmat khwênh caqnìh enh ngèa Phara-ôn xam ƀài cwan haq, aih long dùi hi wìa moeq toq bìh, 11 Phara-ôn creo dèh ka ƀài ƀŏc sìh xam pajàu, aih la ƀài mangai loq ti blàih blŏng hu broq tìah qmang aih. 12 Mangai leq mangai meh khwênh qnìh dèh long dùi, aih hadai wìa loh bìh, mahaq long dùi da Arôn lonh dŏng long dùi da wì aih. 13 Mahaq manoh Phara-ôn dua ma cadoq, ùh dùh ka tamàng wa Môise wa Arôn, tìah qmang ka bàu Chuaq Jêhowa khoe doe.

14 Chuaq Jêhowa doe ka Môise: Phara-ôn khoe cadoq manoh, ùh waq caqnaih mangai da au lam. 15 Sroq eh, jò Phara-ôn loh ta cròng diac, ìh loh enh ngèa haq rai wê long dùi ma khoe wìa bìh aih. 16 Ìh anoe ka haq: Jêhowa aih la Boc Plình da mangai Hêbru, thê au trùh ten ka ìh đòeq anoe rameh: Caqnaih mangai da au loh lam, đòeq wì haq hu patìh ka au tađùng hawit mahaq trùh manòeq dua ìh ùh dùh ka waq tàng bàu au. 17 Chuaq Jêhowa i doe qmang kô: Kô èh ìh hu loq ka au kô raq Jêhowa: Ngan kô au yŏc long dùi blai ta diac cròng, aih èh diac hi wìa dŏng mahim. 18 Ka ta diac cachìt dìq, diac hi loh ka xua om; mangai Êdip ôq diac loh ka ramòt.

19 Khoe aih, Chuaq Jêhowa doe ka Môise: Doe ka Arôn rameh: Wê da ìh long dùi, hnhè tì ìh enh qnhèq ka diac Êdip, roc diac kon, diac cròng, roc hlŏng diac xam dìq dŏng gùng kô taleq ma i diac, đòeq diac wìa mahim, jàp gùng Êdip ta abôq diac broq xi hmo xi long dìq i mahim. 20 Qmang aih Môise xam Arôn broq tiaq qmang ka bàu Chuaq Jêhowa khoe tanap thê rađeh. Enh ngèa Phara-ôn xam ƀài cwan, Arôn dèch long dùi blai tadiac, dìq dŏng cròng diac wìa dŏng mahim. 21 Ka tadiac cachìt, diac loh ka xua om, mangai Êdip ôq diac pi jah, qmang aih mahim clàng jàp gùng Êdip. 22 Mahaq ƀài pajàu yŏc dèh canàih broq diq qmang aih hadai jah qmang aih, manoh Phara-ôn cadoq cadang ùh dùh lòm tamàng Môise xam Arôn toq ƀiaq hnha, wop qmang ka Chuaq Jêhowa khoe doe. 23 Phara-ôn wìh hlài dèh tahnim manoh haq ùh lòm hèm trùh ƀài yiniq aih yac ka bu toq biaq. 24 Èh dìq dŏng ka mangai Êdip ôq diac ùh jah dài majah ti koch diac mŏng dudan ka diac Nin hu yŏc diac ôq, majah qmang aih ôq diac cròng ùh jah. 25 Atìq ka Jêhowq blai diac jah tapèh hì.