1 Khoe aih, Chuaq Jêhowa doe ka Môise: Drah loh glàm Phara-ôn, èh doe a haq: Chuaq Jêhowa doe rameh: Caqnaih mangai da au loh lam, đòeq wì haq patìh ka au. 2 Tàng joq ìh ùh caqnaih, kô èh au caqnìh kan ranàc prai loh kìt jàp tagùng ìh. 3 tadiac xêh loh kìt, moq tŏc tahnim bùa, tabluàng, tŏc tajuàng ìh, mùt tahnim hapŏng xam mangai da ìh, ta tanùh xam nòe pêh dàc broq ƀênh da ìh. 4 Kìt moq tŏc chac ìh, ta mangai da ìh, xam ƀài hapŏng ìh.

5 Qmang aih, Chuaq Jêhowa anoe ka Môise: Thê Arôn daq ìh rameh: Hnhu tì ìh xam long, dùi hnhu roc diac cròng, tadiac muàng xam roc hlŏng diac, đòeq broq kìt prai jàp ka gùng Êdip. 6 Arôn dèch dèh tì roc diac cròng, diac kon gùng Êdip, ƀài kìt tŏc lam jàp jìa gùng aih. 7 ƀài pajàu blàih blŏng yŏc dèh canàih broq tiaq qmang aih, wì hadai broq dôq kìt tŏc tam jàp gùng Êdip.

8 Phara-ôn hi creo ka Môise xam Arôn rai doe: Drah waiq khàn ka Chuaq Jêhowa, đòeq Haq broq ƀài kìt wia hangai ka au xam mangai da au; aih èh au hi caqnaih mangai Hêbru loh lam dèch ramènh ka Chuaq Jêhowa. 9 Môise doe ka Phara-ôn: Ìh pajaq qmòe trùh jò leq au ep waiq khàn Chuaq Jêhowa am ka ìh, xam ka hapŏng hloe xam ka mangai da ìh, đòeq broq ka ƀài kìt wia khoe ka bùa xam hnim bùa, đòeq oe i toq tadiac. 10 Bùa tèu bàu: Trùh qngah sroq èh. Môise doe: Kô èh au broq tiaq bàu, đòeq bùa loq ùh i ka cabô tìah ka Jêhowa aih la Boc Plình nhèn. 11 aih èh ƀài kìt hi wia hangai ka bùa xam hnim bùa, hapŏng bùa xam mangai da bùa; oe i toq roc diac raq. 12 Môise xam Arôn loh khoe ka Phara-ôn; Môise creo dang Chuaq Jêhowa bìac ƀài kìt, Haq ma khoe broq trùh ka Phara-ôn. 13 Chuaq Jêhowa broq tiaq qmang ka bàu Môise creo dang. Ƀài kìt tahnim, ta hamlang, đùng ruàng cachìt dìq. 14 Wì hacom đòeq tang haqngùc, dìq dŏng gùng aih loh ka xua om. 15 Mahaq Phara-ôn hnoq đeh khoe claih kan ranàc, hi loh ka cadoq manoh, pi dùh ka tamàng Môise xam Arôn yac ka toq ƀiaq hnha, wop qmang ka bàu Chuaq Jêhowa ma doe.

16 Chuaq Jêhowa doe ka Môise rameh: Thê doe ka Arôn, dèch deh long dùi qmat, blai ta blo taneh, blo hi wìh wìa hamech jàp tagùng Êdip. 17 Wa broq wop qmang aih. Arôn dèch dèh long dùi blai blo ta taneh, blo hi wìa hamech canhŏng, prònh mangai xam ngè ma aban; blo wìa dŏng hamech nòe gùng Êdip. 18 Ƀài pajàu blàih blŏng enh yŏc deh canàih broq qmang aih đòeq broq loh hamech, mahaq broq ùh jah. Qmang aih hamech prònh mangai xam ngè ma ban. 19 Ƀài pajàu hi anoe ka Phara-ôn: Qmat raq hadrang tì Boc Plình; mahaq dua Phara-ôn cadoq manoh, ùh do tamàng bàu Môise xam Arôn yac ka toq biaq hnha, wop troeq bàu Chuaq Jêhowa doe khoe.

20 Khoe aih, Chuaq Jêhowa doe ka Môise: Kô èh Phara-ôn loh ta kênh diac, ìh rìu sroeh, loh glàm haq đòeq doe ka haq qmang kô: Drah caqnaih mangai da au loh lam đòeq wì haq patìh ka au 21 Tàng joq ìh ùh caqnaih, ngan kô au thê ƀài roe apùq ajang ìh, ƀài cwan da ìh, mangai da ìh xam hnim ìh; hnim da mangai Êdip dìq i roe apùq xìa xep, xam jàp ta taneh. 22 Mahaq hì aih èh, au acang taneh Gôsen, aih nòe mangai da au rìh oe, ùh i ka roe, đòeq ìh loq Au raq Jêhowa, i oe taqne gùng aih. 23 Au lah đòeq mangai da au khoe ka mangai da ìh. Trùh sroq èh kan halac kô hi loh. 24 Chuaq Jêhowa broq qmang ka bàu. Qmang aih hnim Phara-ôn, hnim ƀài cwan da haq hloe dìq ka gùng Êdip dìq i roe pi cajaq, roe broq ka taneh loh ka pi wìa cleq.

25 Phara-ôn creo ka Môise xam Arôn, haq doe: Drah lam dèch ramènh ka Boc Plình pì tagùng kô raq. 26 Mahaq Môise doe: Broq qmang aih ùh troq, majah qmang aih ramènh nhèn dèch ka Chuaq Jêhowa Boc Plình nhèn, aih la kan ramòt ka mangai Êdip. Tàng joq nhèn dèch ramènh cadròt aih enh ngeà mangai Êdip, aih wì haq ma ùh yŏc hmo đàp nhèn qmòh? 27 Kô èh ep nhèn mùt tađùng hawit, qnah ta piq hì lam ka trong, dèch ramènh ka Jêhowa Boc Plình nhèn, wop qmang ka bàu haq thê. 28 Phara-ôn doe: Au caqnaih pì lam dèch ramènh ka Jêhowa Boc Plình pì, tanòe đùng hawit mahaq apaq lam yeo hangai. Hadai waiq khàn ka au diq! 29 Môise doe: Ngan kô au loh khoe ka bùa, hu waiq khàn ka Jêhowa; hì da èh roe hi wia hangai ka Phara-ôn, ƀài cwan xam mangai da ìh. Mahaq Phara-ôn pi dùh qnùt nhèn, ùh caqnaih mangai Isorali lam dèch ramènh ka Chuaq Jêhowa. 30 Môise hi wia khoe ka Phara-ôn rai waiq khàn ka Chuaq Jêhowa; 31 Chuaq Jêhowa broq qmang ka bàu Môise creo dang, ƀài roe hi wia hangai ka Phara-ôn xam ƀài cwan, xam ƀài mangai da haq, pi oe i yac ka moeq pliang.