1 Chuaq Jêhowa doe ka Môise: Drah lam glàm Phara-ôn anoe ka haq rameh: Jêhowa aih la Boc Plình da mangai Hêbru, i doe qmang kô: Caqnaih mangai da au lam, đòeq wì haq patìh ka au 2 majah qmang aih tàng joq ìh ùh caqnaih wì lam, oe raq tàt hòm, 3 kô èh tì kŏng da Jêhowa hi poh ta ƀài ngè da ìh ma aban tagùng, ta axêh, lùa, lŏcđa, ƀo xam ƀài trìu: kô èh loh ka dài kàn. 4 Mahaq Chuaq Jêhowa lah đòeq ngè da mangai Isorali ma ban khoe ka ngè da mangai Êdip, ngè da mangai Isorali aban yac ka moeq toq dua ùh cachìt. 5 Chuaq Jêhowa pajaq dèh jò qmang kô: Trùh sroq èh Chuaq Jêhowa hi broq yiniq aih tacô. 6 Bu qngah sroq atìq, Chuaq Jêhowa hi broq bìac aih, ƀài ngè da mangai Êdip ma ban dìq cachìt; yàng da mangai Isorali, ùh cachìt qmòeq moeq toq. 7 Phara-ôn thê mangai lam ngan, hnoq da mangai Isorali ùh lòm cachìt qmòeq moeq toq. Mahaq Phara-ôn cadoq manoh, ùh caqnaih mangai Isorali lam.

8 Chuaq Jêhowa doe ka Môise xam Arôn: Hacom yŏc blo ta tanùh bình ta tì chôp, khoe èh ajang ngèa ka Phara-ôn, Môise hi rai blo aih ta trŏc. 9 haq hi wìa blo habuàt qyêq jàp gùng Êdip, èh hi wìh wìa ƀài kan rahenh talêh plôh đùh tachac mangai xam ƀài ngè wì ma ban jàp jìa Êdip. 10 Qmang aih, wa hacom blo ta tanùh, yòng enh ngèa ka Phara-ôn, Môise hi rai blo aih ta trŏc, aih haq hi wìa loh ƀài kan rahenh talêh plôh đùh tachac mangai xam ngè wì ma ban. 11 Ƀài pajàu blàih blŏng yòng enh ngèa Môise pi jah, majah qmang aih kan talêh rahenh khoe plôh tachac wì haq qmang ka da rìm ngai Êdip. 12 Chuaq Jêhowa broq ka Phara-ôn cadoq manoh, ùh tamàng bàu wa Môise wa Arôn yac ka toq xit hnha, tìah ka bàu Chuaq Jêhowa khoe doe ka Môise.

13 Khoe aih Chuaq Jêhowa doe ka Môise rameh: Ìh rìu sroeh lam glàm Phara-ôn doe ka haq qmang kô: Jêhowa aih la Boc Plình da mangai Hêbru doe: Caqnaih mangai da au lam đòeq wì haq hu patìh ka au; 14 majah qmang aih yàng kô au caqnìh ƀài kan ranàc ta ìh, ta ƀài cwan da ìh xam managai da ìh, dôq ìh loq jàp crŏng taneh kô ùh i cabô ma dàng au. 15 Tàng manòeq kô au khoe dèch tì baxa ìh xi kan dài, qmang aih ìh xam mangai da ìh dìq khoe lùch ta crŏng taneh kô. 16 Mahaq taiq kô raq au majah khoe dèch paqnàng ìh, aih la đòeq ìh hnoq kan cwìang itai da au, đòeq yiniq au jah anoe jàp ta phù cròng. 17 Tàng joq ìh oe tàt padràng, ùh caqnaih mangai da au loh lam, 18 aih èh hì da èh wop jò kô, au broq moeq kan mè dêh clìh preo kàn, jaq ta diac Êdip patep enh jò baxèm trùh manòeq qnhòq i yàng leq mè dêh qmang aih. 19 Manòeq kô, ìh thê wì tiaq ahlài dŏng ƀài ngè aban tagùng, đòeq jah claih kan hamoq aih, majah qmang aih preo kàn clìh cachìt dŏng xam mangai xam ngè aban ma oe raq tagùng.

20 Ƀài cwan da Phara-ôn ma i manoh yùq crè ka bàu Jêhowa, drah huiq haiq tiaq ahlài dèh ƀài hapŏng xam ngè wì ban tagùng. 21 Ƀài mangai ma ùh waq tamàng bàu Jêhowa, aih wì đòeq dèh ƀài hapŏng xam ƀài ngè wì ma ban oe tagùng.

22 Chuaq Jêhowa thê Môise rameh: Dèch tì ìh ta trŏc, broq mè preo clìh ta jàp tagùng Êdip, tachac mangai, ngè aban, xam ta cachiq nhat tagùng. 23 Môise dèch dèh long dùi ta trŏc, Chuaq Jêhowa broq trŏc cađah camlet, clìh preo ùnh cheo ta taneh. Qmang aih, Chuaq Jêhowa broq ka mè preo clìh tagùng Êdip. 24 preo clìh pajùm xam ùnh cheo rênh hi haraya, jaq enh jò baxèm broq diac Êdip trùh manòeq, qnhòq lah i qmang aih. 25 Qmang aih, jàp tagùng Êdip, preo broq kan haƀo ka rìm yiniq tagùng, enh mangai trùh ngè aban, trùh cachiq, broq tagoh trùh bài long. 26 Toq ta Gôsen, aih nòe mangai Isorali oe, ùh hìaq clìh preo.

27 Phara-ôn thê creo ka Môise xam Arôn rai doe: Yàng kô au khoe broq yiniq lui; Chuaq Jêhowa aih troq; au xam mangai da au aih la ƀài mangai khoe broq yiniq lui. 28 Drah waiq khàn ka Chuaq Jêhowa, đòeq pi hìaq cađah xam mè preo; khoe èh au hi caqnaih pì lam, pi patrò hòm. 29 Môise tèu: Jò au buloh enh kô, au dèch tì ta Chuaq Jêhowa, cađah camlet xam mè preo hi dìq, đòeq bùa loq rameh: taneh kô da Chuaq Jêhowa. 30 Mahaq au loq bùa xam ƀài cwan qnhòq iu yùq ka Jêhowa Boc Plình. 31 (Jò aih qmau mat qnhòq sròc, briang qnang riang, dài qmau xam briang pòh hech dŏng; 32 qmau mì xam qmau tìuh mat yeo clòe qnhòq sròc dài majah ùh hìaq pòh) 33 Qmang aih Môise loh khoe ka Phara-ôn, loh enh gùng ka than phôq, dèch dèh tì ta Chuaq Jêhowa, camlet cađah, preo hi atàt, mè hadai rangep ta taneh. 34 Jò Phara-ôn hnoq mè, camlet cađah, preo khoe prang, cla haq xam ƀài cwan loh ka cadoq hòm manoh, broq hòm yiniq lui. 35 Qmang aih Phara-ôn cadoq manoh, ùh caqnaih mangai Isorali lam, wop qmang ka bàu Chuaq Jêhowa khoe doe ajang nòe Môise.