1 Chuaq Jêhowa doe ka Môise rameh: Drah lam glàm Phara-ôn, majah qmang aih au khoe broq cadoq manoh haq xam manoh ƀài cwan, dôq ƀài kan halac au jah patô qnoh taqne wì haq. 2 đòeq ìh hu anoe hlài dèh ka ƀài kon, ka ƀài xau ƀài bìac kàn kaiq au khoe broq ka mangai Êdip, ƀài kan halac au khoe broq taqne wì haq aih đòeq pì hu loq Au kô raq Chuaq Jêhowa. 3 Môise xam Arôn lam ta Phara-ôn, wa doe: Jêhowa aih la Boc Plình da mangai Hêbru i doe qmang kô: Ìh ùh qnoh rađeh haqneq enh ngèa au trùh jò leq hòm? Drah caqnaih mangai da au lam đòeq wì haq patìh ka au. 4 Tàng ìh ùh waq caqnaih mangai da au lam, ngan kô, hì da èh au thê ƀài lìp trùh ta taneh diac ìh; 5 haq apùq xìa ta taneh, pi cabô oe hnoq taneh hòm, haq kap kaq dŏng ƀài cleq ma oe rah, aih la ƀài cleq mè preo ma rong hlài, haq hadai kap dŏng ƀài long ma hon da pì taruàng. 6 mùt bình tahnim bùa tahnim ƀài cwan xam tahnim mangai Êdip: Aih la bìac enh kan cadraq pì, trùh ta wì craq dùnh calah nèh qnhòq lah hnoq pang jò wì haq i mat ta taneh trùh ta manòeq. Khoe aih Môise tawìh loh khoe ka Phara-ôn. 7 Ƀài cwan da Phara-ôn doe ka haq: Trùh jò leq mangai kô men hêq ka bet ka bèn jroh?.

8 Wì thê creo ka wa Môise wa Arôn mùt hlài ta Phara-ôn, haq doe ka wa: Lam patìh ka Jêhowa Boc Plình pì beq. Dìq dŏng ƀài cabô ma ep lam? 9 Môise padreo bàu: Nhèn lam rai qnong dŏng dèh mangai craq xam mangai qyoh xam ƀài trìu ƀo lam tiaq, majah qmang aih cla nhèn kô, aih raq ramènh da Chuaq Jêhowa. 10 Phara-ôn doe: Chuaq Jêhowa oe ti pì. Aih hlàu cleq au ma am pì xam ƀài kon pì lam dŏng qmòh? Ùh, joq ùh qmòe blinh, majah qmang aih pì i manoh dù. 11 Ùh jah qmang aih taleq, toq pì gucalô raq ep lam patìh ka Jêhowa, aih la trong pì ma khoe bòch. Khoe aih wì hi hnan qnoh đac wa Môise wa Arôn loh khoe ka mat Phara-ôn.

12 Chuaq Jêhowa doe ka Môise: Dèch tì ìh qmat enh qnhèq ka gùng Êdip, đòeq broq ka ƀài lìp prai xìa xep ta aih, dôq haq kap kaq dŏng cachiq nhat xam rìm yiniq cleq mè preo ma oe rong đòeq. 13 Qmang aih Môise dèch dèh long dùi enh qnhèq ka gùng Êdip, èh Chuaq Jêhowa qnong cayeo enh ƀè mat mahì loh hlui tagùng aih xèq ka hì xam mang aih; trùh sroq atìq cayeo enh ƀè mat mahì loh khoe aràng ƀài lìp trùh. 14 Lìp prai jàp tagùng Êdip, pan loh jràp hi raya rayùc ta taneh ta aih. Enh calah nèh qnhòq hmaq bàc diang aih, trùh atìq kô hanoh ùh bàc qmang aih. 15 Lìp cato xìa ka taneh da gùng aih, gùng aih loh ka clam cluiq, kap kaq dŏng ƀài cachiq nhat xam ƀài plì long jò mè preo ma oe rong đòeq, dìq dŏng tagùng Êdip pi i toq xit jang leq ma oe nget, patep enh long trùh ta cachiq nhat taruàng.

16 Phara-ôn drah creo ka Môise xam Arôn rai anoe: Au kô khoe broq yiniq lui ka Chuaq Jêhowa Boc Plình pì hloe xam ka cla pì. 17 Mahaq manòeq cađac da au yiniq lui yàng kô; waiq khàn ƀiaq ka Jêhowa Boc Plình pì, đòeq haq broq hangai ka au kan ranàc cachìt kô. 18 Môise hi wia khoe ka Phara-ôn, waiq dang ka Chuaq Jêhowa. 19 Chuaq Jêhowa qnung cayeo enh ƀè mahì clìh trùh dêh pi cajaq, cayeo aih hlui qnìh dŏng bài lìp tadiac raxìq Gòh. 20 Mahaq Chuaq Jêhowa broq ka Phara-ôn cadoq manoh; haq ùh caqnaih mangai Isorali loh lam.

21 Chuaq Jêhowa doe ka Môise: Dèch tì ìh ta trŏc, dôq ta Êdip i kan clam cluiq habàu habùt jaq wì mech jah bèq. 22 Qmang aih, Môise dèch dèh tì ta trŏc, aih hi i kan clam habàu habùt piq hì tagùng Êdip. 23 ta piq hì aih ùh cabô xau hnoq dabau, ùh i ka cabô jah axìt khoe dèh ka nòe. Mahaq nòe da mangai Isorali ma oe, aih i kan qngah ka wì haq.

24 Phara-ôn creo doe ka Môise: Drah lam beq hu patìh ka Chuaq Jêhowa; qnung xam ƀài kon qyoh diq; toq ƀài calùh trìu xam calùh ƀo aih ma ep đòeq tacô. 25 Mahaq Môise doe: Cla bùa raq ma ep am ƀài ngè xam hang cleq đòeq nhèn broq ramènh bùh đòeq hu dèch ka Jêhowa Boc Plình nhèn. 26 Ƀài ngè da nhèn ma aban ep tiaq cla nhèn, ùh rong đòeq yac ka mòeq toq cachop jo, majah qmang aih ƀài ngè aih raq nhèn đòeq patìh ka Jêhowa Boc Plình nhèn, jò leq nhèn trùh nòe, aih èh nhèn men loq yŏc ma leq đòeq kùh waiq Chuaq Jêhowa. 27 Mahaq Chuaq Jêhowa broq ka Phara-ôn cadoq manoh ùh caqnaih mangai Isorali lam. 28 Phara-ôn doe: Drah wia khoe ka au dôq pi hìaq tawac! ep wèq rađeh ja cajoq pi jah hnoq mat au hòm, majah qmang aih hì leq ìh oe hnoq hadrò au, hì aih èh ìh ep cachìt! 29 Môise padreo bàu: Bùa anoe joq khoe troq; au pi oe hnoq hadrò bùa hòm.