1 Chuaq Jêhowa doe ka Môise rameh: Au caqnìh ka Phara-ôn xam gùng Êdip mòeq kan ranàc hòm; khoe aih haq hi caqnaih pì loh lam enh kô. Jò haq khoe caqnaih pì aih èh hi caqnaih lam ka lem khoe ka gùng kô. 2 Qmang aih, thê doe ka mangai Isorali rai tanap ka rìm ngai yac ka gucalô yac ka gucadrì ep bòch dèh mangai ma haten hatìa ƀài dahwèq broq xi ƀac xi wang. 3 Chuaq Jêhowa broq ka mangai Isorali jah màiq enh ngèa mangai Êdip; Môise hadai jah bàc ngai tagùng Êdip ngan haq haqnhèq, enh ngèa ƀài cwan da Phara-ôn xam mangai gùng aih.

4 Môise doe: Chuaq Jêhowa doe qmang kô: Qnah taqne mang au lam dudan gùng Êdip 5 Dìq dŏng kon calô ramua tagùng Êdip hi cachìt, enh kon calô da Phara-ôn ma haqngui dèh tagèq bùa, trùh ta kon ramua da mangai hapŏng dìc oe enh rù ka apau, xam kon ramua da ƀài ngè wì ma aban. 6 Jàp tagùng Êdip i bàu breo hmoe tagruàng tagràt, jaq ka enh calah trùh ta atìq dua ùh i qmang aih. 7 Mahaq tanòe mangai Isorali oe, ùh i mòeq toq koq ma ko cabô qnì, ko ngè ma ban qnì; aih đòeq pì hu loq Chuaq Jêhowa lah đòeq dèh crài mangai Isorali khoe ka mangai Êdip dàng leq cadèh. 8 Kô èh, ƀài cwan da bùa hi trùh ta au, bla-op rađeh haqneq enh ngèa ka au đòeq doe: Ìh xam ƀài mangai malam tiaq ìh drah lam beq! Khoe ka èh aih au hi lam. Môise loh khoe Phara-ôn, loh qmòe rai nòeh raya.

9 Chuaq Jêhowa doe ka Môise: Phara-ôn ùh tamàng bàu ìh taleq, aih la đòeq ƀài kan halac da au jah broq tam tagùng Êdip. Môise xam Arôn broq ƀài teo halac enh ngèa Phara-ôn; mahaq Chuaq Jêhowa broq ka Phara-ôn cadoq manoh, dài aih haq majah ùh caqnaih mangai Isorali loh khoe dèh gùng.