1 Tagùng Êdip, Chuaq Jêhowa doe ka Môise xam Arôn rameh: 2 Khê kô đòeq broq ka pì khê gàu hanam, aih la khê mòeq ta hanam.

3 Anoe ka dìq dŏng mangai Isorali qmang kô: Trùh hì mòeq jàt khê kô, rìm ngai ma broq gàu cadraq, tiaq dèh tahnim bèn ep rùp moèq toq trìu kon. 4 Tàng joq hnim ƀiaq ngai kaq ùh dìq mòeq toq trìu, ep pajùm ka mangai haten hatìa, mac ka mangai bàc ƀiaq; èh tình ngan toq leq ngai ma dìq kaq mòeq toq trìu kon. 5 Pì ep rùp dèh ta calùh trìu ùh ta calùh bubi, kon trìu calô ùh kon bubi calô, khoe jap mòeq hanam, ùh i ka xìt habau, 6 khoe aih đòeq palauq trùh hì mòeq jàt pôn khê kô; khoe aih dìq dŏng mangai Isorali hi jêh haq, jò trŏc ten xèq clam. 7 Wì hi yŏc mahim aràng xùt ta jrang qmang xam radua qmang hnim leq ma kaq jam kon trìu aih. 8 Mang aih, wì kaq jam kon trìu cwài xam ƀênh ùh wàt blo xam cachiq xang. 9 Paq kaq jam qne chìn qne adrìh, tàng ùh meh lùac tadiac, mahaq ep bùh ta-ùnh xam gàu xam jo, xam pù cliac. 10 Pì apaq đòeq cleq oe rah trùh sroq èh; tàng loq oe rah, ep bùh đac. 11 Pì acaq jam aih qmang kô: Xi caqnam kàt, jènh tŏc jai, tì cadop long dùi, kaq huiq haiq; aih raq ramènh Pancwa da Chuaq Jêhowa.

12 Mang aih au lam pagat cwa gùng Êdip, tabroq ka rìm toq kon ramua da Êdip, enh mangai trùh ngè aban; au tah hadrah ka ƀài kiac da Êdip; au kô raq Chuaq Jêhowa. 13 Mahim xùt tahnim pì oe, đòeq broq teo hadro, jò au tabroq ka mangai Êdip, hnoq mahim aih au hi pancwa, ùh hìaq i kan ranàc jêh đac pì.

14 Pì ep achìh đòeq hì aih đòeq broq bahmàng; enh qnhòng kô trùh qnhòng tau ep wèq broq ramènh ka Chuaq Jêhowa; aih ramènh au broq mòeq đòe. 15 Ta tapèh hì ep kaq ƀênh ùh wàt blo: bu trùh hì ma baxèm, ep don dŏng blo loh khoe ka hnim pì, majah qmang aih cabô kaq ƀênh i blo enh hì baxèm trùh hì tapèh, haq aih èh ep qnoh đac khoe ka Isorali. 16 Hì baxèm i mòeq kan tagop hadròeh; trùh hì tapèh pì hadai ep i mòeq kan tagop hadròeh hòm. Ƀài hì aih ùh khòh broq cleq, toq ti padon đòeq dahwèq acaq ka tang ngai. 17 Qmang aih! Pì ep wèq ramènh ƀênh ùh wàt blo, majah qmang aih hì aih raq au doeh ƀài lình pì loh khoe ka gùng Êdip; dài aih raq rìm qnhòng ep wèq hì aih qmang ka ramènh mòeq đòe. 18 Hì mòeq jàt pôn khê mòeq, jò dixèq pì acaq ƀênh ùh wàt blo trùh hì baiq jàt mòeq khê aih. 19 Ta tapèh hì ùh khòh oe hnoq blo tahnim pì; majah qmang aih yac ka mangai diac wì yac ka mangai gùng cla, waq toq cabô acaq ƀênh i blo, aih èh ep hnan qnoh đac enh gùng ka tagop da mangai Isorali. 20 Ùh khòh acaq ƀênh i blo; rìm nòe pì oe dìq ep kaq ƀênh ùh i ka blo.

21 Qmang aih Môise creo tagop dìq dŏng ka ƀài gucraq Isorali haq doe qmang kô: Drah ràih yŏc mòeq toq enh cadrong pì am ka rìm ngai tahnim pì, khoe èh jêh trìu aih đòeq broq ramènh pancwa. 22 Khoe aih yŏc mòeq hamenh cachiq xônh, tàm ta cathau mahim, xùt ta radua qmang xam baiq toq jrang qmang, khoe aih, dìq ka pì ùh cabô jah loh enh gùng ka qmang hnim cla trùh qngah sroq atìq. 23 Chuaq Jêhowa hi lam pagat gùng Êdip đòeq hu tabroq ka wì haq; jò hnoq mahim jang radua qmang xam baiq toq jrang qmang, aih haq hi pancwa, ùh lòh mangai jêh đac mùt tahnim haq aih đòeq hu tabroq. 24 Ep wèq ramènh kô qmang ka ranenh mòeq đòe am ka pì xam kon xau pì. 25 Jò leq pì mùt tagùng Chuaq Jêhowa ma padon am ka pì qmang ka bàu haq khoe doe, aih èh ep wèq ramènh kô. 26 Jò kon xau bòch ìh qmang kô: Ramènh kô aih qmang leq? 27 aih ep anoe ka wì haq: Aih la ngè tadreo ramènh pancwa da Chuaq Jêhowa, mangai ma khoe pancwa hnim da mangai Isorali oe tagùng Êdip jò haq tabroq ka mangai Êdip. Haq khoe rong đòeq hnim bèn. Khoe aih pì hacùn cràng kùh waiq. 28 Mangai Isorali broq wop tiaq bàu Chuaq Jêhowa khoe thê Môise xam Arôn.

29 Jò qne mang Chuaq Jêhowa tabroq ka rìm ngai kon ramua tagùng Êdip, enh kon calô da Phara-ôn ma haqngui tagèq bùa trùh kon ramua da mangai ma oe tù, xam dìq dŏng kon ramua da ƀài ngè wì ma aban. 30 Jò damang, Phara-ôn, ƀài cwan xam rìm dŏng mangai Êdip dìq padinh yòng, i bàu breo tagruàng tagùng Êdip, majah qmang aih ùh i hnim leq ma ùh i ka mangai cachìt. 31 Mang aih raq Phara-ôn creo ka Môise xam Arôn rai doe rameh: Chôp xam dìq dŏng mangai Isorali yòng beq, drah loh ma khoe ka mangai da au đòeq lam kùh waiq Chuaq Jêhowa, qmang ka pì ma xan bòch. 32 Qnung hloe ƀài calùh ƀo xam trìu, troeq bàu pì khoe doe, èh waiq sôq ramot ka au diq. 33 Mangai Êdip toq bahuiq mangai Isorali drah rênh rênh loh khoe dèh gùng, majah qmang aih wì doe: Dìq ka bèn kô èh cachìt.

34 Qmang aih mangai Isorali dìq wê dàc khoe jàn mahaq qnhòq wàt blo, rai xùi ajang plêh ƀài atong đòeq jràu dàc ma khoe caxop xi eo tòe. 35 Mangai Isorali broq tiaq qmang ka bàu Môise khoe tanap, bòch da mangai Êdip ƀài ngè broq xi wang xi ƀac hloe xam ƀài eo yôh. 36 Chuaq Jêhowa broq ka wì haq jah màiq enh ngèa mangai Êdip, dài wì majah lem bùi ka am, mangai Isorali lôq hreo hrua mangai Êdip qmang aih.

37 Mangai Isorali lam enh Ramse trùh ta Sucôt, ùh rènh xam ƀài kon yoh, aih jah qnah ta tadràu jàt muàn mangai gucalô lam jènh. 38 Èh hadai i bàc raya mangai diac wì hadai tiaq lam pajùm, hloe xam trìu ƀo, ngè aban maqnoeq joq ma bàc. 39 Wì àp dèh ƀênh ùh i tah blo broq enh dàc wì haq khoe wê dèh enh gùng Êdip; dàc ùh tah blo, majah qmang aih mangai Êdip hnan qnoh wì haq huiq haiq hrìn, ùh jah patrò, èh hadai ùh tem palauq dahwèq acaq cleq majah. 40 Qmang aih mangai Isorali rìh oe ta Êdip jah pôn hrinh piq jàt hanam. 41 Jò khoe dìq ka pôn hrin piq jàt hanam, wop hì aih raq, ƀài lình da Chuaq Jêhowa loh khoe ka gùng Êdip. 42 Aih la mòeq mang wì ep wèq ka Chuaq Jêhowa, majah qmang aih haq doeh qnoh mangai Isorali loh khoe ka gùng Êdip. Enh qnhòng kô tùh qnhòng tau, dìq dŏng mangai Isorali ep wèq mang aih đòeq ta-iu ka Chuaq Jêhowa. 43 Chuaq Jêhowa doe ka Môise xam Arôn rameh: Kô ranenh da ramènh Pancwa: Mangai diac wì ùh jah acaq ramènh aih. 44 Ƀài mangai hapŏng, pì qnoh ƀac rot, ìh ep broq ranenh kat akia am ka wì, aih èh men jah acaq. 45 Mangai diac wì xam mangai patìh kaq kùng hadai ùh jah acaq ramènh aih. 46 Ramènh aih đòeq toq ka hnim cla, ìh apaq qnoh jam loh enh gùng, hadai apaq broq tagoh moeq toq caxènh leq. 47 Dìq dŏng mangai ih Isorali ep wèq ramènh Pancwa. 48 Jò mangai diac wì oe tahnim pì, enh wèq ramènh Pancwa da Chuaq Jêhowa, mangai gucalô da wì haq ep broq ranenh kat akia; aih èh wì haq men jah trùh haten ka ramènh kô, men jah ngan tìah ka mangai ha-uang tagùng cla. Mahaq cabô ùh waq broq ranenh kat akia, aih ùh jah kaq. 49 Hadai pajùm moeq ranenh aih am ka mangai ha-uang tagùng xam ka mangai diac wì trùh oe taqne pì.

50 Rìm ngai Isorali dìq broq qmang ka bàu Chuaq Jêhowa khoe tanap ka Môise xam Arôn. Hadai ta hì aih Chuaq Jêhowa qnoh mangai Isorali, tiaq dèh tang ƀình lình loh khoe gùng Êdip.