1 Chuaq Jêhowa doe ka Môise rameh: 2 Taqne mangai Isorali yac ka mangai yac ka ngè pì aban, ep lah đòeq crài da au rìm toq kon ma ramua; majah qmang aih rìm toq kon ramua aih dìq da au.

3 Môise doe ka mangai Isorali qmang kô: Ep broq ranenh bahmàng hlài ka hì kô, majah qmang aih aih la hì Chuaq Jêhowa yŏc dèh tì icwìang itai qnoh pì loh enh gùng Êdip, aih la loh khoe ka hnim dìc, dài majah apaq cabô kaq ƀênh i blo. 4 Hì kô wop khê qmau sròc, pì loh lam. 5 Qmang aih jò leq Chuaq Jêhowa khoe qnung pì mùt ta acang da magai Cana-an, mangai Hêtit, mangai Amôrit, mangai Hêwit, xam mangai Jêƀusit, aih la gùng clàng toq sùa xam diac xùt, aih la gùng haq khoe hapah ti kan cadraq pì đòeq tèu am ka pì, qmang aih hi trùh khê kô pì ep wèq ramènh hadròeh aih. 6 Ta tapèh hì ep kaq ƀênh ùh wàt blo, trùh hì tapèh ep wèq mòeq ramènh ka Chuaq Jêhowa. 7 Ep acaq ƀênh ùh i ka blo ta tapèh hì, jàp ka gùng pì ùh hnoq ƀênh i blo, yac ka qne pì hadai. 8 Ta hì aih èh ep hnài dôq kon pì loq rameh: Aih la bìac Chuaq Jêhowa broq am ka bèn, jò bèn loh khoe ka gùng Êdip 9 Yiniq aih èh đòeq broq teo nòe tì ìh, broq kan bahmàng jang ngòng oe taqne baiq toq mat ìh, đòeq ranenh da Chuaq Jêhowa jah oe ta hacùng bàu ìh, majah qmang aih Chuaq Jêhowa khoe yŏc tì cwìang itai qnoh pì loh enh gùng Êdip. 10 Rìm hanam, trùh dèh jò ep wèq ramènh kô.

11 Jò Chuaq Jêhowa khoe qmùt ìh mùt tagùng Cana-an, qmang ka bàu haq khoe hapah ka ìh, xam kan cadraq ìh, jò haq khoe am gùng aih ka ìh, 12 aih ep dèch ka Chuaq Jêhowa ƀài kon calô ramua xam ƀài ramua calô da ngè ìh ma aban, majah qmang aih wì haq aih dìq da Chuaq Jêhowa. 13 Mahaq rìm toq kon lùa ma ramua, ìh ep rùp kon trìu tàng ùh kon bubi đòeq hu baxon hlài; tàng ùh qmang aih, ìh ep wech ranŏng kon lùa aih. Ìh hadai ep baxon hlài rìm toq ramua calô ta ƀài kon calô ìh. l 14 Bla èh, bla tau kon calô ìh bòch: Bìac aih ìq qmang leq? Aih tèu rameh: Aih pàng Chuaq Jêhowa khoe yŏc tì kŏng icwìang itai đòeq qnoh bèn loh khoe ka gùng Êdip, aih la hnim dìc; 15 èh jò Phara-ôn cadoq manoh ùh caqnaih bèn lam, Chuaq Jêhowa jêh dŏng ƀài kon calô tagùng aih, enh kon calô da mangai trùh ta ramua da ƀài ngè ma aban. Taiq qmang aih, au dèch ramènh ka Chuaq Jêhowa rìm toq ramua ma calô, au hadai baxon yŏc hlài dèh kon calô ramua, ta ƀài kon calô da au. 16 Aih èh đòeq broq teo nòe tì kŏng ìh, rai broq pateo taqne ngòng oe taqne baiq toq mat ìh; đòeq bahmàng ka ìh qmang kô: Chuaq Jêhowa khoe yŏc tì kŏng cwìang itai đòeq qnoh bèn loh khoe ka gùng Êdip.

17 Jò Phara-ôn caqnaih mangai Isorali loh lam, Boc Plình ùh qnung wì haq lam trong hlài tagùng Philitin, aih trong ma yeo haten dŏng, majah qmang aih haq doe: Yùq jò hnoq kan tajêh tablah, èh manoh wì kô loq tawìh hlài ta Êdip qmòh? 18 Dài Chuaq Jêhowa majah qnung wì haq rawech tiaq trong đùng hawit, tangèa qnah ta diac Raxìq Gòh. Mangai Isorali wê ranac loh khoe ka gùng Êdip. 19 Môise qnhac qnung hanang Jôsep tiaq wì haq, majah qmang aih Jôsep khoe panan thê mangai Isorali ep i bàu hapah cajap. Haq doe: Joq qnàng kô èh Boc Plình trùh wiang ti oh daq, aih èh pì ep qnung wê caxènh au tiaq pì loh ma khoe ka gùng kô. 20 Jò lam khoe ka Sucôt, wì broq traiq ta Êtam, tanòe haqmai lùch da gàu đùng hawit. 21 Chuaq Jêhowa lam adroe ka mangai Isorali, dahì oe ta jrang yùc, đòeq ajèn trong, damang oe ta jrang ùnh đòeq sreo qngah ka wì, dôq wì jah lam hloe xam dahì xam damang. 22 Dahì jrang yùc ùh hangai ka wì, damang jrang ùnh hanoh qmang aih.