1 Chuaq Jêhowa doe ka Môise rameh: 2 Drah thê mangai Isorali tawìh hlài broq traiq enh ngèa ka Phiha Hirôt, ta adreo wa Mitđôn wa diac raxìq. Pì broq traiq ten diac raxìq tajang ka Ƀa-an Sêphôn. 3 Joq qnàng kô èh Phara-ôn hèm trùh mangai Isorali, haq doe: Wì aih khoe lac trong qnang glàm kan nan tađùng hawit. 4 Au broq ka Phara-ôn cadoq manoh, haq hi hnan tiaq mangai Isorali. Mahaq taiq Phara-ôn xam ƀài lình haq aih raq, yiniq au aih èh jah qngah qngai; mangai Êdip jah loq Au kô raq Chuaq Jêhowa. Mangai Isorali broq tiaq qmang aih.

5 Wì doe hlài ka bùa Êdip loq mangai Hêbru khoe loh lam. Phara-ôn xam ƀài cwan hi tablòq manoh ka mangai Isorali, wì doe: Bèn khoe broq cleq qmang aih, caqnaih mangai Isorali loh lam đòeq wì haq pi patìh ka bèn hòm qmòh? 6 Phara-ôn palauq deh xê axêh rai qnung dèh ƀình lình. 7 Haq aràng tiaq rađeh tadràu hrinh toq xê ma yeo lem dŏng xam dìq dŏng ƀài xê tagùng Êdip, rìm toq xê dìq i lình. 8 Chuaq Jêhowa broq ka Phara-ôn, bùa Êdip cadoq manoh, hnan tiaq mangai Isorali; mahaq mangai Isorali loh lam qmòe ka hagau hagình. 9 Mangai Êdip xam xê, xam lình kòe axêh xam lình da Phara-ôn dìq hnan tiaq mangai Isorali, glàm wì aih qnang broq traiq kênh diac raxìq, ten ka Phiha Hirôt, tangèa ka Ƀa-an Sêphôn. 10 Jò Phara-ôn trùh khoe ten, mangai Isorali qngoc ngan hnoq mangai Êdip hnan tiaq, hi loh ka tarìt tariang, creo dang ka Chuaq Jêhowa. 11 Wì haq trùh anoe ka Môise: Gùng Êdip ma ùh i nòe catùh hanang, dài ìh ma qnung nhèn mùt tanòe đùng hawit kô đòeq hu cachìt qmòh? Ìh qnoh nhèn loh khoe ka gùng Êdip hu broq cleq? 12 Ùh xài tagùng Êdip nhèn khoe doe ka ìh qmang kô: Dôq da nhèn patìh ka mangai Êdip, majah qmang aih patìh ka mangai Êdip ma yi ùh hnau ka cachìt tagùng hawit kô? 13 Môise padreo bàu ka mangai Isorali: Apaq yùq cleq, pì oe taqmat raq, hì da èh pì jah hnoq kan paclaih Chuaq Jêhowa broq am ka pì; majah qmang aih mangai Êdip pì ma ngan hnoq hì kô, pi jò leq oe hnoq hòm, 14 i Chuaq Jêhowa tajêh am, pì toq oe ma hatinh raq.

15 Khoe aih Chuaq Jêhowa doe ka Môise: Gleq ìh majah creo dang au? Thê mangai Isorali lam beq; 16 ìh dèch deh long dùi ta haqnhèq, hnhu tì enh qnhèq ka diac raxìq, đòeq lah diac broq baiq, aih èh mangai Isorali hi loh tadiac raxìq, cadiang lam qmang ka taneh go. 17 Au kô èh broq ka mangai Êdip cadoq manoh qnat tiaq mangai Isorali loh tadiac, khoe aih èh yiniq au jah qngah qngai taiq Phara-ôn xam dìq dŏng ƀình lình, xê axêh xam lình kòe axêh da haq. 18 Mangai Êdip hi jah loq joq qnàng Au kô raq Chuaq Jêhowa, jò au jah kan ranhòm taiq Phara-ôn xam xê axêh xam lình da haq. 19 Atìq ka aih, ƀình plình da Boc plình ma khoe lam enh ngèa traiq lình Isorali wìh hlài lam atìq, jrang yùc ma xan lam enh ngèa traiq lình hanoh wìh loh yòng enh rù wì haq. 20 Jrang yùc yòng ta adreo traiq da mangai Êdip xam traiq da mangai Isorali, yùc broq kan clam cluiq ka pah kô, damang sreo qngah ka pah tau; dài qngah ka mang baiq traiq ùh jah thia ten ka dabau.

21 Khoe aih Môise hnhu tì tadiac raxìq, Chuaq Jêhowa qnong cayeo enh ƀè mahì loh hlui dêh qngah ka mang glua hacom diac qngah ka mang aih; Haq cwaih diac raxìq loh moeq trong taneh croh, diac lah baiq ƀè. 22 Mangai Isorali loh tadiac raxìq lam tìah ka ta taneh go, diac yòng tìah ka panàt enh apah qngeo xam apah qma. 23 Mangai Êdip hnan tiaq; ƀài axêh, ƀài xê axêh xam ƀài lình kòe axêh da Phara-ôn dìq tiaq loh qne diac raxìq. 24 Meh oq! trùh ten qngah, Chuaq Jêhowa oe enh dalam ka jrang yùc xam ùnh, ngan hnoq traiq lình Êdip, hi broq ka wì loh ka manhài. 25 Haq toeh da wì ƀlênh xê, broq ka wì tìc xê qmòe ka xa. Mangai Êdip doe ka dabau: Bèn ep cadàu ma khoe ka mangai Isorali beq, majah qmang aih Chuaq Jêhowa taƀlêq ka bèn am ka wì aih.

26 Chuaq Jêhowa doe ka Môise qmang kô: Dèch da ìh tì enh qnhèq ka diac raxìq, diac hu ta-ùc glàp dŏng mangai Êdip, xê axêh xam lình kòe axêh da wì haq, 27 Môise dèch dèh tì enh qnhèq diac raxìq, trùh qngah sroq èh diac hi ta-ùc bình hlài tadiac raxìq, mangai Êdip ma cadàu amot, aih diac tàt hlài wì; qmang aih Chuaq Jêhowa caqnhùt qnìh wì haq qne diac raxìq. 28 Qmang aih diac wìh ta-ùc hlài làp dŏng ƀài xê, ƀài lình kòe axêh ƀài lình da Phara-ôn ma khoe hnan tiaq mangai Isorli loh tadiac raxìq, pi srong qmòe moeq ngai. 29 Mahaq mangai Isorali lam qne diac raxìq tìah qmòe ka lam tago; diac broq wìa panàt pah qma xam pah qngeo. 30 Ta hì aih, Chuaq Jêhowa dèch mangai Isorali claih enh tì kŏng mangai Êdip, wì aih hnoq mangai Êdip cachìt tabraih diac raxìq. 31 Mangai Isorali hnoq bìac kàn kaiq Chuaq Jêhowa broq ka mangai Êdip, dài maloh ka iu yùq ka haq, lùi haq xam Môise aih la hapŏng haq.