1 Khoe aih Môise xam mangai Isorali calêu ƀoe kô ka Chuaq Jêhowa, rameh:

Au calêu manè apôi ka Chuaq Jêhowa, majah qmang aih haq dìq jaq ranhòm,

Haq khoe caqnìh tadiac raxìq axêh xam mangai kòe axêh.

2 Chuaq Jêhowa aih la kan dêh xam ƀoe calêu da au

Haq khoe wìa Mangai dèch au,

Haq la Boc Plình au, au manè apôi ìh,

Boc Plình da kan cadraq au, au ta-iu deh ìh.

3 Chuaq Jêhowa aih mangai lình.

Yiniq haq la Jêhowa.

4 Haq khoe tèm caqnìh tadiac raxìq ƀài xê da Phara-ôn xam ƀài lình haq.

Ƀài cwan haq ma ràih khoe cram tadiac Raxìq Gòh,

5 Ƀài lai laq diac khoe glàp catùh wì haq,

Wì cram trùh taqneq diac raxìq tìah ka cato hmo.

6 Tì pah qma da ìh Chuaq Jêhowa, i padren dêh ranhòm qnàng.

Tì pah qma da ìh Chuaq Jêhowa, broq ka mangai tagit ka ìh haprah hnhung.

7 Ta kan ranhòm dìq jaq da ìh,

Ìh khwênh caqnìh mangai ma tablêq ka ìh.

Ìh plôh nòe ta tagèn

Bùh cheo wì haq tìah ka hri qmau.

8 Mùh ìh hlui qnoh dèh hi hèm, diac hi qnìc hlài

Lai laq diac canua yòng tìah qmòe ka panàt,

Diac jrùq catŏng hlài nòe clŏc diac raxìq

9 Lình tablêq catèh, wì doe: Au hnan tiaq, au hnan tem,

Au jah axong kùng hang khoe blah yŏc.

Mahua yiang đeh kô èh jah da-òeh nòe wì haq,

Au hroe qnoh chang, tì au jêh đac wì haq.

10 Mahaq Ìh khoe hlui qnoh dèh hihèm,

Diac raxìq glàp dŏng ƀài lình ma tablêq ka ìh.

Wì haq cram tìah ka tanàm

Ta caqnàm diac jrùq.

11 Taqne ƀài kiac, cabô leq tìah ka ìh, Chuaq Jêhowa?

Ta kan hadròeh, cabô jah ranhòm qmang ka ìh?

Khòh yùq, khòh manè.

Xan broq yôt kan halac?

12 Ìh khoe hnhu dèh kŏng pah qma,

Taneh khoe lonh wì haq.

13 Ta kan loq waq ùh tablòq ìh tìc qnung,

Mangai da ìh ma khoe baxon hlài dèh,

Ta padren dêh da ìh, ìh aràng wì hlài nòe oe hadròeh da ìh.

14 Rìm diac jah hìa loq bìac kô, dìq yùq crè,

Kan ramòt canàt rùp mangai Philitin.

15 Ƀài gàu gùc da Êđôm loh ka crè crep,

kan tarìt khech rùp ƀài cla craq da Mô-ap,

Dìq ka mangai Cana-an pi i dŏng ka mahua.

16 Kan hlè hlauq ramòt ta-ùc ka wì haq,

Chuaq Jêhowa ôi, enh nòe tì kŏng cwìang itai ìh,

Wì loh dŏng ka làu troeq hmo,

Trùh jò mangai da ìh lam khoe xot,

Trùh jò mangai da ìh ma khoe baxon yŏc dèh lam khoe catech.

17 Ìh aràng wì mùt rai pìt wì haq tabui wang kùng hang ìh,

Chuaq Jêhowa ôi, aih la nòe ìh khoe padon đòeq ka rađeh oe,

Aih raq nòe hadròeh tì cla ìh ma broq.

18 Chuaq Jêhowa wèq cwìang mòeq đòe moeq tui.

19 Majah qmang aih Phara-ôn xam ƀài axêh haq,

Xê axêh xam lình kòe axêh, khoe loh ta diac raxìq

Chuaq Jêhowa khoe làp diac raxìq enh qnhèq,

Mahaq mangai Isorali lam taqne diac raxìq qmang ka lam tago.

20 Khoe aih, Miri-am la mangai pajàu, daq cadrì da Arôn tì haq wê padau, ƀài mangai cadrì dìq loh tiaq, wê padau rai muaq.

21 Miri-am calêu hatèu ka wì haq:

Drah calêu ka Chuaq Jêhowa, majah qmang aih haq dìq jaq ranhòm,

Haq khoe qnìh tadiac raxìq axêh xam mangai kòe axêh.

22 Khoe aih Môise qnung mangai Isorali lam khoe ka diac Raxìq Gòh, trùh tađùng hawit Suro; wop piq hì lam tađùng hawit, chaq ùh hnoq qmòe taleq i diac. 23 Tìa aih trùh tagùng Mara, mahaq diac ta aih xang ôq ùh jah, dài majah creo ka nòe aih la Mara. 24 Mangai Isorali badrùt mamùc ka Môise, wì doe: Nhèn yŏc cleq đòeq ôq kô èh? 25 Môise creo dang Chuaq Jêhowa; Haq hi patô ka Môise moeq catoch long, Môise yŏc long aih tèm caqnìh tadiac, diac aih hi wìh loh ka nhim.

Ta aih Chuaq Jêhowa qnoh ranenh xam bàu patô hnài ka wì, èh hadai ta aih raq haq qnhro manoh wì. 26 Haq doe: Tàng joq ìh panim ka tamàng bàu da Chuaq Jêhowa Boc Plình ìh, broq trong ma troq enh ngèa haq, tàng joq ìh hadràng don tamàng bàu hnài rai wèq dŏng ranenh da haq, aih èh Au ùh caqnìh ka ìh mòeq kan yinìq cleq ta ƀài kan yinìq au ma khoe caqnìh ka gùng Êdip; majah qmang aih Au kô raq Chuaq Jêhowa, Mangai broq brêh kan yinìq da pì.

27 Khoe aih mangai Isorali lam trùh ta Êlim, nòe aih i mòeq jàt baiq toq thòng diac kon xam tapèh jàt toq long rêq; mangai Isorali broq traiq ta aih, ten ka thòng diac kon.