1 Wop hì mòeq jàt padam khê baiq, atìq ka jò khoe loh khoe enh Êdip, mangai Isorali enh Êlim lam trùh tađùng hawit Sin, oe ta adreo wa Êlim wa Sina-i. 2 Tanòe đùng hawit, dìq ka mangai Isorali mamùc trech wa Môise wa Arôn, 3 wì doe ka wa rameh: Xan nhèn ma cachìt ka tì kŏng Chuaq Jêhowa tagùng Êdip, jò oe raq jah haqngui tìa gŏc jam rai jah kaq ƀênh camech catàu! Majah qmang aih chôp qnung nhèn mùt tanòe hawit kô đòeq broq dìq ka mangai bàc qmang kô cachìt dŏng ka hrah.

4 Chuaq Jêhowa doe ka Môise qmang kô: Kô, au oe ta trŏc haqnhèq broq mè ƀênh qnoh ka pì. Mangai pì loh toch ƀênh, hì leq toch qnang lem ka hì meh, aih đòeq au qnhro ngan wì haq i lam tiaq ranenh au loq ùh?. 5 Trùh hì tadràu, wì haq padon đòeq ngè đeh khoe gop, wì jah toch yeo bàc ka hì qnoeq baiq phàn

6 Wa Môise wa Arôn doe ka mangai Isorali rameh: Xèq kô èh pì jah canau loq aih raq Chuaq Jêhowa khoe qnoh pì loh khoe ka gùng ka Êdip, 7 èh sroq èh jah hnoq kan ranhòm da Chuaq Jêhowa, majah qmang aih haq khoe tàng bàu pì mamùc taƀlêq ka haq. Qnah hòm, ma kô ìq cabô pì ma nòeh trech ma? 8 Môise doe: Xèq kô Chuaq Jêhowa am jam ka pì kaq, trùh qngah sroq èh ƀênh bàc ùh dìq ùh dài, majah qmang aih haq khoe tàng bàu pì mamùc taƀlêq ka haq.

9 Khoe aih Môise doe ka Arôn: Anoe dìq ka mangai Isorali qmang kô: Pì drah thia enh ngèa Chuaq Jêhowa, majah qmang aih bàu pì mamùc taƀlêq haq khoe tàng. 10 Jò Arôn qnang anoe dìq dŏng ka mangai Isorali, wì haq hwi ngan qnah tađùng hawit, hnoq kan ranhòm da Chuaq Jêhowa mahnu loh enh yùc. 11 Chuaq Jêhowa doe ka Môise: 12 Au khoe tàng bàu mamùc taƀlêq da mangai Isorali. Aih, ìh doe ka wì haq qmang kô: Qnah ta dixèq èh pì hi acaq jam; sroq èh hi jah acaq ƀênh ka panàc, aih èh pì hi jah loq au kô raq Chuaq Jêhowa Boc Plình pì.

13 Xèq aih, i chìm broch pan xìa ta traiq; trùh qngah sroq èh i mòeq lòp rangom oe dudan ka traiq. 14 lòp diac ngom aih hi hnhung; tađùng hawit hnoq i cleq qyêq, tagon, tìah ka pliang diac ngom catàc ta taneh. 15 Jò mangai Isorali hnoq, wì bòch dabau: Cleq kô ìq? Majah qmang aih wì ùh qnì aih ìq cleq. Môise doe ka wì: Qmat raq ƀênh Chuaq Jêhowa am ka pì broq dahwèq acaq.

16 Kô bàu da Chuaq Jêhowa khoe tanap thê: Tiaq deh padren cabô hlàt acaq pang leq, rai tiaq toq leq ngai ta traiq đòeq toch ka mòeq ngai mòeq ôme.

17 Mangai Isorali broq tiaq qmang aih, qnah ngai toch bàc, qnah ngai toch toq ƀiaq. 18 tŏng xi ôme, cabô toch bàc dua ùh i yeo loe, cabô toch biaq dua ùh i capòch, rìm ngai toch bu qnang lem ka đeh acaq. 19 Môise doe ka wì: Apaq cabô đòeq rah trùh sroq èh. 20 Mahaq mangai Isorali ùh tamàng tiaq bàu Môise, i ƀiaq ngai đòeq rah trùh qngah sroq èh, aih loh hrai enh dalam, loh ka xua qmèq. Môise loh nòeh qmòe ka wì. 21 Qmang aih, rìm sroq mangai Isorali loh toch bu qnang lem ka padren đeh acaq; jò mahì hi tôq cleq aih hi hnhung.

22 Trùh hì tadràu, wì loh toch dahwèq acaq loe baiq phàn; mòeq ngai jah baiq ôme. Ƀài gucraq lam anoe hlài ka Môise loq. 23 Haq padreo bàu: Aih raq bàu Chuaq Jêhowa khoe anoe: Hì da èh aih hì padài, aih raq hì Sabat hadròeh ka Chuaq Jêhowa, bùh phiang dahwèq leq pì enh bùh phiang, pai cleq pì ma enh pai, loq oe i rah, đòeq atech trùh sroq èh. 24 Qmang aih wì hi đòeq atech trùh sroq èh, troeq bàu Môise khoe thê; dahwèq aih ùh hìaq loh ka xua om èh hadai ùh hìaq loh hrai enh trom.

25 Môise doe: Hì kô acaq dahwèq aih beq, majah qmang aih hì kô aih la hì Sabat ka Chuaq Jêhowa; hì kô pì chaq ƀài ngè aih tađùng pi hnoq. 26 Pì toch ta tadràu hì, mahaq trùh hì tapèh aih la hì Sabat, hi pi i.

27 Hì tapèh i biaq ngai loh đòeq hu chaq toch, mahaq chaq ùh lòm hnoq qmòe cleq. 28 Chuaq Jêhowa doe ka Môise: Pì oe raq ùh iu tiaq ranenh xam bàu au hnài trùh jò leq hòm?. 29 Drah hèm qmang kô: Chuaq Jêhowa khoe am ka pì hì Sabat; dài aih trùh hì tadràu haq majah am pì toch ƀênh kaq tàu ka baiq hì. Ta hì tapèh, rìm ngai ep oe dèh anòe, ùh dùh loh enh gùng ka hnim. 30 Qmang aih hì tapèh mangai Isorali dìq padài.

31 Mangai Isorali yiniq ka ƀênh aih la mana, haq tìah ka clong cachiq ngo, jìang tìah ka ƀênh i tah diac xùt. 32 Môise doe: Bàu Chuaq Jêhowa khoe thê qmang kô: Drah ùc bình mòeq ôme mana, hu đòeq hlài ka ƀài qnhòng ta atìq, đòeq phù cròng hnoq ƀênh au khoe am ka pì acaq tanòe đùng hawit jò au qnoh pì loh khoe ka gùng Êdip. 33 Môise anoe ka Arôn: Drah yŏc mòeq toq abôq èh tah bình mòeq ôme mana ta aih, khoe èh đòeq abôq aih enh ngèa Chuaq Jêhowa, hu đòeq hlài ka bài qnhòng atìq. 34 Arôn hi đòeq abôq aih enh ngèa ka Hom Tajao, đòeq jah wèq hlài ka qnhòng atìq, wop qmang ka bàu Chuaq Jêhowa khoe thê Môise.

35 Mangai Isorali acaq mana ta pôn jàt hanam, trùh jò mùt ta Cana-an, aih la nòe i mangai oe.

36 (Mòeq ôme aih la mòeq phàn mòeq jàt da Êpha.)