1 Dìq dŏng mangai Isorali loh lam enh đùng hawit Sin, lam enh nòe kô trùh nòe tau, tiaq qmang ka bàu Chuaq Jêhowa thê. Wì broq traiq ta Rêphiđim; ta aih ùh i ka diac đòeq wì haq ôq. 2 Wì haq chaq nen rahen ka Môise, wì doe rameh: Am ka nhèn diac ôq. Môise tèu bàu: Gleq pì majah chaq nen rahen ka au? Gleq majah qnhro Chuaq Jêhowa qmang qmat?. 3 Mangai Isorali oe ta aih ùh i ka diac, croh ranŏng dài wì haq toq mamùc ka Môise. Wì doe: Hagleq ìh majah qnoh dèh ka nhèn loh khoe gùng Êdip broq ka nhèn xam ƀài kon qyoh hloe xam ƀài ngè aban da nhèn ep cachìt ka croh ranŏng qmang kô? 4 Môise hi creo dang ka Chuaq Jêhowa: Au ep broq qmang leq ka ka ƀài mangai kô? Wì haq oe toq ma hi bùq au xi hmo!

5 Chuaq Jêhowa padreo bàu ka Môise: Wê da ìh long dùi ma khoe blai tadiac Nin, qnung tiaq ìh ƀài gucraq, khoe aih lam enh ngèa mangai Isorali. 6 Kô èh au yòng enh ngèa ka ìh, enh crŏng hmo ta Hôrep tau, ìh blai hmo aih, èh hi loh diac ka wì ôq. Môise hi broq qmang aih enh ngèa ka ƀài gucraq Isorali. 7 Haq yiniq ka jang aih la Masa xam Mêriba. Nen haq taiq kan rahen da mangai Isorali ma chaq yiniq ka haq, èh taiq wì khoe qnhro Chuaq Jêhowa jò wì haq doe: Ajoq i Chuaq Jêhowa oe taqne bèn lòq ùh?

8 Jò aih, mangai Amalet trùh canàt jêh mangai Isorali ta Rêphiđim. 9 Môise doe ka Jôsuê: Drah ràih yŏc ƀài mangai da bèn, èh loh hu tajêh ka mangai Amalet. Hì da-èh au yòng tabui wang xam long dùi da Boc Plình ta tì au.

10 Qmang aih Jôsuê broq wop qmang ka bàu Môise thê đòeq hu taƀlêq ka mangai Amalet, èh Môise, Arôn xam Huro tŏc tabui wang. 11 Waq toq Môise dèch dèh tì, aih mangai Isorali hi ƀlêq; mahaq jò haq caqnìh dèh tì, aih èh mangai Amalet hi ƀlêq. 12 Tì Môise tagah, Arôn xam Huro yŏc hmo roh ka haq haqngui, khoe aih wa oe baiq pah dèch da haq tì, tì haq ùh dalàc trùh mahì clìh. 13 Jôsuê jêh ƀlêq lình Amalet xi chang. 14 Chuaq Jêhowa doe ka Môise: Drah achìh bìac kô ta hset đòeq broq kan bahmàng, èh anoe ka Jôsuê loq kô èh au xùt hreo dŏng yiniq da Amalet enh qneq ka caqnàm plình. 15 Môise broq mòeq toq prang tadreo, haq creo bàu dêh: Jêhowa hla kò da au. 16 Haq doe: Pàng Amalet i dèch kŏng tablêq ka gèq Chuaq Jêhowa dài Chuaq Jêhowa majah taƀlêq ka Amalet enh qnhòng kô trùh qnhòng tau.