1 Jêtrô mangaih pajàu ramènh gùng Mađi-an, baq mai da Môise, hìa tàng rìm yiniq Boc Plình khoe broq ka Môise xam Isorali, aih la mangai da haq èh haq khoe qnoh wì aih loh khoe ka gùng Êdip qmang leq. 2 Jêtrô hi qnung Đêbora, cadrì Môise, khoe am hlài dèh tahnim baq, 3 xam baiq toq kon calô, mòeq aih Getsôn, majah qmang aih Môise khoe doe: Au kô rìh oe đeh tadiac wì, 4 mòeq aih Êli-êse, majaq qmang aih haq i doe tam: Boc Plình da kan cadraq au khoe wiang ti au rai dèch au claih enh pla chang da Phara-ôn, 5 Qmang aih Jêtrô, baq mai da Môise lam ti wa baiq ngai kon calô xam mai Môise, hmàih ka haq tađùng hawit, nòe broq traiq haten ka wang da Boc Plình. 6 Jêtrô gòe bàu ka haq rameh: Au kô Jêtrô, baq mai da kon, au xam mai kon hloe xam baiq toq kon calô kon trùh hmàih ka kon.

7 Môise loh đìh deh boc, hacùn cràng rai hìp haq, bòch hmàih da bau, khoe aih mùt ta traiq. 8 Môise hi anoe hlài deh ka boc loq rìm yiniq Chuaq Jêhowa khoe tabroq ka Phara-ôn xam mangai Êdip thai ka mangai Isorali, rìm kan nanxa khoe trùh ka wì haq roc trong, èh Chuaq Jêhowa khoe paclaih mangai Isorali qmang leq. 9 Jêtrô lem bùi raya ka ƀài kan tamèt da Chuaq Jêhowa khoe broq ka Isorali, paclaih wì aih khoe ka tì kŏng mangai Êdip. 10 Jêtrô doe: Joq khòh manè Chuaq Jêhowa qnàng! Haq la Mangai paclaih pì khoe ka tì mangai Êdip xam tì Phara-ôn, rai doeh mangai da haq loh khoe ka cwìang da mangai Êdip. 11 Manòeq au loq Chuaq Jêhowa yeo kàn dìq dŏng ka ƀài kan kiac, majah qmang aih haq khoe broq trong kô ka ƀài mangai khoe tabroq ka Isorali xi manoh catèh ka rađeh. 12 Jêtrô, baq mai da Môise, padon qnoh mòeq ramènh bùh hloe xam ƀài ramènh dèch ka Boc Plình; Khoe aih Arôn xam ƀài gucraq Isorali trùh acaq ti baq mai Môise, enh ngèa Boc Plình.

13 Trùh sroq èh, Môise haqngui hadrah mangai Isorali, wì aih yòng hàu enh ngèa haq enh sroeh sroq trùh xèq. 14 Baq mai haq hnoq rìm yiniq haq broq ka wì, hi bòch: Kon broq cleq ka wì qmang qmat? Hagleq kon majah haqngui mòeq ngai, èh dìq dŏng ka wì yòng hàu enh buqngah trùh xèq qmang qmat? 15 Môise padreo bàu: Aih wì haq trùh ta au đòeq bòch manoh Boc Plình. 16 Jò wì i yiniq cleq, aih wì trùh ta au, au hadrah mangai kô xam mangai tau, rai am wì haq loq ƀài bàu xam ranenh da Boc Plình. 17 Baq mai da Môise tèu: Trong kon qnang broq qmat ùh lem. 18 Joq qnàng kon xam wì haq dìq loh ka hlat hlinh, majah qmang aih ƀài yiniq aih trap hrìn ka padren kon, kon pòq mòeq ngai ùh hlàt. 19 Manòeq kô tamàng boc anoe ka kon mòeq nà bàu, Waiq Chuaq Jêhowa wiang ti kon. Da cla kon aih broq mangai thai ka wì haq enh ngèa Boc Plình, dèch anoe rìm yiniq ka haq loq. 20 Drah yŏc bàu xam ranenh haq thê đòeq hnài wì, patô ka wì trong ep lam xam yiniq leq wì ep broq. 21 Mahaq taqne wì, kon ep ràih yŏc ƀài mangai i kan rabiaq, loq ta-iu yùq ka Boc Plình, hnhoh jang, git trong daiq plai, dèch wì haq oe enh qnhèq ka mangai Isorali, broq gàu wèq muàn mangai, hrinh mangai, padam jàt ngai, èh mòeq jàt ngai. 22 Đòeq broq mangai hadrah rìm hì. Tàng loq i bìac cleq ma kàn aih wì lam anoe ka kon, ƀài yiniq ma qyoh, cla wì haq hadrah đeh. Drah lah axong kan trap dôq jah hèu; đòeq wì wiang pòq ti kon. 23 Tàng kon broq bìac kô èh Boc Plình thê, qmang aih kon jah qnhrang, èh dìq ka mangai Isorali jah trùh dèh tanòe ka catèm.

24 Môise iu tiaq bàu dèh boc, broq rìm yiniq wop qmang ka bàu haq khoe hnài. 25 Qmang aih Môise hi ràih ta mangai Isorali ƀài mangai ma i kan rabiaq, dèch ƀài aih enh qnhèq ka ƀài mangai Isorali, broq gàu wèq muàn mangai, ùh meh hrinh ngai, ùh meh padam jàt ngai ùh meh mòeq jàt ngai; 26 Wì aih hadrah rìm hì. Yiniq cleq ma xa wì dèch aràng ka Môise, mahaq cla wì hadrah trong ma qyoh. 27 Khoe aih, Môise dôq dèh boc wìh hài deh gùng.