1 Hì moeq da khê ma piq, atìq ka loh enh Êdip hì aih mangai Isorali trùh đùng hawit Sina-i. 2 Atìq ka loh lam enh Rêphiđim, wì mùt đùng hawit Sina-i, èh mangai Isorali broq traiq ƀè ngèa ka wang.

3 Khoe aih Môise hi tŏc ta Boc Plình, Chuaq Jêhowa oe tawang creo doe ka haq qmang kô: Ìh drah anoe qmang kô ka hnim Jacôp, rai patô yiniq kô ka mangai Isorali: 4 Pì khoe hnoq bìac au broq ka mangai Êdip, au chò pì ta panan cliang kàn qmang leq, rai qnung pì trùh ti au qmang leq. 5 Qmang aih, manòeq kô, tàng joq pì iu bàu au ka gêh geo rai wèq tajao da au, aih èh ta dìq dŏng rìm diac, pì jah wìa hang canaq da au, majah qmang aih crŏng taneh kô dìq da au. 6 Pì jah wìh wìa mòeq diac pajàu, moeq nang noe hadròeh ka au. Toq aih nà bàu ìh hu anoe hlài ka mangai Isorali. 7 Môise loh creo ka ƀài gucraq ta Isorali, taqmon hlài rìm nà bàu Chuaq Jêhowa ma khoe tanap thê rađeh anoe hlài. 8 Rìm ngai dìq mòeq bàu tèu rameh: Nhèn broq tiaq rìm yiniq Chuaq Jêhowa khoe thê. Môise yŏc bàu wì khoe tèu aih anoe hlài ka Chuaq Jêhowa.

9 Chuaq Jêhowa doe: Kô èh, au oe ta cato yùc ma habàu habùt tau đòeq lam trùh ti ìh, dôq jò leq au capoch ka ìh, aih èh mangai Isorli dìq tàng rai lùi ìh hloe hloe. Khoe aih Môise anoe hlài ka Chuaq Jêhowa bàu wì ma khoe anoe.

10 Chuaq Jêhowa doe ka Môise qmang kô: Drah lam doe ka mangai Isorali, thê wì haq wèq rađeh ka sròeh hì kô xam hì da-èh, thê wì haq rùh deh eo cwàn. 11 Trùh hì piq wì haq ep padon đòeq, majah qmang aih hì aih Chuaq Jêhowa loh tawang Sina-i enh ngèa dìq dŏng wì haq. 12 Ìh ep acang đòeq pajaq ka wì haq oe dudan ka wang, rai tanap ka wì: Ep wèq rađeh apaq thia ten tawang, hadai apaq ti rawò bèq jènh wang; waq toq cabô rawò bèq mangai aih èh ep jêh đac ka cachìt. 13 Hadai paq i cabô poh tachac mangai aih, mahaq mangai aih ep đàp xi hmo tàng ùh pênh xi rang panenh; yac ka ngè ma aban yac ka mangai, dìq ùh rong rìh. Jò ken jah hlui, aih èh wì jah thia haten ka wang. 14 Môise loh enh wang trùh ta mangai Isorali, thê wì haq wèq rađeh ka sròeh, rai rùh deh eo cwàn. 15 Haq tanap ka wì ta piq hì thê chônh padon đòeq, paq thia ten gucadrì.

16 Trùh sroq hì piq, i camlet cađah, mòeq cato yùc habàu habùt oe tawang, xam bàu ken hlui dìq jaq tagrùng tagràt; dìq ka mangai ta traiq lình tarìt tariang đeh hra. 17 Môise thê wì haq loh khoe ka traiq lình đòeq đìh Boc Plình; wì haq yòng tanòe jènh wang. 18 Jò meh, jàp jìa tawang Sina-i dìq loh nhòe, majah qmang aih Chuaq Jêhowa oe taqne ùnh loh ta aih; nhòe loh enh aih tìah qmang ka nhòe da tanùh ùnh kàn, èh dìq ka bui wang loh kan ralàng dêh raya. 19 Jò bàu ken rai èh rai dêh; Môise capoch, Chuaq Jêhowa tèu bàu haq. 20 Chuaq Jêhowa loh tabui wang Sina-i rai thê Môise tŏc tabui wang. Aih Môise hi tŏc.

21 Chuaq Jêhowa doe: Drah loh tàt wì apaq àu tamùa thia haten ka Chuaq Jêhowa đòeq hu ngan, èh loq i bàc ngai ta wì haq ep cachìt. 22 Yac ka ƀài pạjàu thia haten ka Chuaq Jêhowa hadai ep wèq rađeh ka sròeh, ùh meh haq loq jêh đac wì haq. 23 Môise anoe ka Chuaq Jêhowa rameh: Mangai Isorali ùh jah tŏc tawang Sina-i, majah qmang aih cla ìh khoe ùh lòh nhèn qmang kô: Drah acang pajaq dudan ka wang, rai lah đòeq crài apah aih la nòe taneh hadroèh. 24 Chuaq Jêhowa doe: Drah loh beq, khoe aih aràng Arôn tŏc ti ìh, mahaq ƀài pajàu xam mangai Isorali apaq tamùa clàm tŏc haten ka Chuaq Jêhowa, èh haq loq haƀo đac ka wì. 25 Qmang aih Môise hiloh doe ka wì tàng.