1 Boc Plình doe ƀài bàu kô: 2 Au kô raq Jêhowa Boc Plình ìh, khoe doeh qnoh ìh loh khoe ka Êdip, aih la hnim dìc hapŏng.

3 Enh ngèa au, ìh ùh jah i ƀài kiac qnoeq.

4 Ìh apaq broq ka rađeh radua qmù kiac, tiaq dua qmù ƀài ngè ma oe ta trŏc haqnhèq, yac ka ta taneh haqneq kô, yac ka tadiac. 5 Ìh apaq hacùn cràng kùh waiq ƀài radua qmù kiac aih, èh hadai apaq patìh ka wì haq; majah qmang aih au kô raq Jêhowa Boc Plình ìh, aih la Boc Plình git ka kan dù, waq toq cabô git ka au, au yŏc yiniq lui da kan cadraq đòeq baxa hlài kon xau trùh piq pôn qnhòng. 6 mahaq paqnoh kan loq waq trùh bình ka muàn qnhòng ka ƀài mangai leq loq waq ka au rai wèq ranenh au.

7 Ìh paq yŏc yiniq Jêhowa Boc Plình ìh đòeq hu racaih, majah qmang aih Jêhowa ùh ngan mangai racaih ka yiniq haq aih la ùh i ka yiniq lui cleq.

8 Ep hmàng hì padài rai wèq broq hì hadròeh. 9 Ìh ep gêh dŏng deh yiniq broq ta tadràu hì. 10 mahaq hì tapèh aih la hì padài da Jêhowa Boc Plình ìh; tahì aih, ìh, kon calô, kon cadrì, hapŏng calô hapŏng cadrì, ƀài ngè ìh aban, yac ka tamoe oe hnim ìh, dìq dŏng paq abroq qmòe cleq. 11 majah qmang aih ta tadràu hì Jêhowa Boc Plình khoe broq plình, taneh, diac raxìq xam rìm yiniq oe ta aih,

12 Ep i manoh loq ta-iu ka baq miq ìh, dôq ìh jah rìh halình ta taneh Jêhowa Boc Plình ìh ma khoe am.

13 Ìh apaq jêh đac mangai.

14 Ìh apaq tango.

15 Ìh apaq atùng

16 Ìh paq yòng capoch bàu panhìn qnùt ka mangai ten tìa ka ìh.

17 Ìh apaq ònh ka hnim mangai haten hatìa ka ìh, hadai apaq ònh da haq ka mai, yac ka hapŏng calô hapŏng cadrì, ƀo, lùa, yac ka yiniq cleq da mangai ma haten hatìa kìh.

18 Jò dìq dŏng ka mangai Isorali tàng bàu hilùng, bàu ken hlui, hnoq kan camlet, hnoq wang loh nhòe, aih wì tarìt tariang rai yòng qmòe enh hangai. 19 Wì doe ka Môise: Cla ìh anoe ka nhèn. Aih èh brì ka nhèn tàng; mahaq joq cali calo ka Boc Plình apaq capoch ka nhèn, èh trùh nhèn ma ep cachìt đeh qmòh. 20 Môise doe: Ùh dùh yùq cleq, majah qmang aih Boc Plình loh enh qnhèq đòeq qnhro pì, đòeq kan ta-iu yùq ka haq oe enh ngèa pì dôq pì ùh hìaq broq yiniq lui. 21 Qmang aih wì yòng đeh enh hangai, èh Môise thia haten ka cato yùc habàu habùt i Boc Plình oe ta dalam.

22 Chuaq Jêhowa doe ka Môise rameh: Ìh doe ka mangai Isorali qmang kô: Cla pì khoe hnoq au capoch qnoh ka pì enh plình: 23 qmang aih apaq broq radua qmù kiac xi ƀac, xi wang đòeq hu tawêh ka au. 24 Ìh broq ka au prang tadreo xi taneh, ta aih ep dèch ramènh bùh, xam ramènh apôi da ìh, trìu qnì ƀo qnì. Waq toq tanòe leq i padèch yiniq au, au trùh đòeq am xôq ramot ka ìh ta aih. 25 Tàng ìh broq prang tadreo xi hmo, aih paq yŏc hmo achìh, majah qmang aih tàng joq ìh yŏc ranac hu achìh, aih ìh broq ka hmo aih loh kan amùa. 26 Ìh apaq cadiang tang cadiang tŏc ta prang tadreo au, đòeq ùh hìaq hnoq kan rahòng ìh.