1 Kô raq ƀài ranenh ì ep hnài mangai Isorli:

2 Tàng ìh rot mòeq ngai hapŏng Hêbru, aih èh haq patìh ka ìh tadràu hanam; mahaq trùh ta hanam tapèh, aih haq jah caqnaih, ùh ep padreo hlài bac. 3 Tàng joq haq mùt đeh moeq ngai, aih hadai loh đeh moeq ngai; tàng i mai, aih loh deh ti mai. 4 Tàng wì craq hnim aih ban ka haq mai, èh tàng joq mai haq ha-uang kon calô qnì cadrì qnì, aih èh haq loh đeh mòeq ngai, mai xam kon haq aih jah da wì craq hnim. 5 Tàng mangai hapŏng aih doe: Au ha-och deh ka wì craq, deh ka mai xam kon au, ùh enh claih toq ka rađeh. 6 qmang aih cla wì craq aràng haq enh ngèa Boc Plình, thê lam ten ka qmang tàng ùh long jrang, khoe aih yŏc jùi pàc don; haq hi patìh ka wì craq aih lùch dèh ka qnhòng.

7 Tàng cabô tech deh kon cadrì broq hapŏng, mangai kon cadrì aih ùh jah loh tìah ka ƀài hapŏng calô tau. 8 Tàng cla wì craq adroe aih khoe yŏc mangai hapŏng cadrì kô broq yang, yàng èh khoe ka aih pi enh hòm, aih èh cla wì craq ep thê wì baxon yŏc hlài, ùh jah qnùt khoe aih aràng tech haq ka mangai diac wì. 9 Mahaq tàng cla wì craq enh taqmroq dèh ka kon calô aih ep ngan haq tìah dèh ka kon cadrì. 10 Tàng cla wì craq loq yŏc mangai qnoeq, mahaq ti mangai ma adroe kô dua ùh jah palùa da haq dahwèq acaq, dahwèq atàc xam manoh ŏng mai yac ka bu toq biaq. 11 Tàng cla wì craq ùh broq tiaq piq trong kô, mangai cadrì jah loh dech, ùh ep padreo hlài ƀac.

12 Cabô jêh cachìt moeq ngai, haq aih ep jêh đac ka cachìt. 13 Yàng tàng ùh xài haq to chaq trong jêh, mahaq pàng Boc Plình khoe hataq mangai ƀìq jêh cachìt aih ta tì kŏng haq, haq aih ep cadàu trùh tanòe au patô hu hanình. 14 Mahaq tàng cabô yòng tablêq deh ka mangai haten hatìa đòeq qnac chaq trong jêh đac, mangai aih yac ka haq amot taprang tadreo au, dua ìh ep rùp qnoh đòeq jêh đac.

15 Cabô jêh dèh baq qnì, miq qnì, mangai aih ep cachìt.

16 Cabô rùp atùng mangai yac ka khoe aràng tech, yac ka oe raq ta tì kŏng haq, haq aih ep cachìt.

17 Cabô ra-òh hamaiq deh ka baq ka miq mangai aih ep cachìt.

18 Tàng baiq ngai talech èh mangai kô jêh mangai tau xi hmu qnì xi tì qnì, loh ka habau ep kùi moeq nòe mahaq ùh hìaq cachìt, 19 tàng oe jah canhra loh enh gùng, mangai ma jêh aih ùh hìaq ep pòq yiniq lui. Mahaq ep clìh ƀac jèn huđèn hlài kan haƀo ka mangai ma ƀìq tau toq leq hì haq ma padài, èh ep ban trùh jò tadêh halài.

20 Jò cla wì craq yŏc long jêh deh hapŏng calô qnì hapŏng cadrì qnì, tàng cachìt hloe draq drình, aih èh ùh claih ka kan baxa 21 Mahaq tàng mangai hapŏng calô hapŏng cadrì aih oe rìh moeq baiq hì, cla wì craq ùh hìaq pòq yiniq lui cleq, majah qmang aih haq aih la kùng hang da cla wì craq.

22 Tàng baiq ngai qnang tajêh, troq ataq mòeq ngai gucdrì wê cliac, broq haq loh ka ha-uang sroeh, ùh hìaq i cleq qnoeq ma yeo hamoq, mangai ma troq jêh aih èh ep clìh ƀac tiaq bàu ŏng haq pajaq, caqnaih ƀac enh ngèa ka cwan hadrah.

23 Tàng loq i cleq hamoq, aih èh ìh ep yŏc caxènh clìh caxènh. 24 Yŏc mat clìh ka mat, yŏc hanenh clìh ka hanenh, yŏc tì clìh ka tì, yŏc jènh clìh ka jènh, 25 yŏc padŏc clìh ka padŏc, yŏc pràm clìh ka pràm, yŏc habau clìh ka habau.

26 Tàng cla wì craq jêh troq mat dèh hapŏng, yac ka hapŏng calô hapŏng cadrì, broq mat aih loh ka lua, aih èh ep caqnaih haq claih ka broq hapŏng, đòeq đèn da haq mat. 27 Tàng cla wì craq broq tagoh mòeq pliang hanenh dèh hapŏng calô hapŏng cadrì, aih ep caqnaih haq claih ka broq hapŏng, majah qmang aih khoe hnhung moèq pliang hanenh.

28 Tàng mòeq toq ƀo jàu troq mòeq ngai gucalô qnì mangai cadrì qnì loh ka cachìt, ƀo aih ep yŏc hmo đàp ka cachìt, wì ùh khòh kaq ƀo aih; cla wì ma i ƀo aih ùh ep pòq yiniq lui cleq. 29 Mahaq tàng enh adroe dua ƀo aih loq jàu èh cla mangai i ƀo khoe lah tàng anoe yôt, mahaq ùh kàt ùh clêh, đòeq ƀo jàu cachìt mòeq ngai calô mangai cadrì qnì, ƀo aih ep yŏc hmo đàp ka cachìt, èh cla mangai i ƀo hadai ep cachìt. 30 Mahaq tàng wì qnoh jaq ka mangai i ƀo đòeq haq baxon hlài deh caxènh, cla mangai i ƀo ep baxon rađeh wop troeq jaq wì panoh. 31 Tàng ƀo jàu troq mòeq ngai qyoh calô qnì cadrì qnì, pì hadai ep tiaq ranenh kô. 32 Ƀo jàu troq mòeq ngai hapŏng calô qnì cadrì qnì, cla mangai i ƀo ep clìh piq jàt siaclo ƀac ka wì craq da hapŏng aih; khoe aih èh ƀo aih ep yŏc hmo đàp ka cachìt.

33 Tàng cabô pèch ngah ralŏc, chìa hàm mahaq ùh gùp hlài, tàng loq i ƀo qnì lùa qnì clìh ta aih, 34 Cla wì craq hàm aih ep đèn ƀac ka cla wì craq ma i ngè aih, mahaq ngè cachìt aih jah rađeh. 35 Tàng ƀo cabô jàu troq ƀo wì haten hatìa ka rađeh loh ka cachìt, wa aih ep tech ƀo rìh aih, ta-axong ƀac èh ta-axong hloe ƀo cachìt. 36 Mahaq tàng cla mangai i ƀo khoe loq dèh ƀo rađeh kô loq jàu, yàng dua ùh waq ka clêh ùh waq kàt đòeq, cla mangai i ƀo ep yŏc ƀo clìh ka ƀo, èh ƀo cachìt aih đòeq ka haq.