1 Cabô atùng ƀo qnì loq trìu qnì, khoe aih bùh jam tech qnì, aih èh haq ep am hlài padam toq ƀo ka moèq toq ƀo, èh pôn toq trìu ka mòeq toq.

2 Tàng mangai atùng qnang àu qmang èh wì jah rùp rai jêh đac ka cachìt, mangai ma jêh aih ùh hìaq pòq tuiq jêh đac mangai.

3 Mahaq jêh ka cachìt jò mahì khoe tŏc, aih pòq tuiq jêh đac mangai. Mangai ma atùng ep padreo hlài, tàng ùh i cleq hu qnoh hlài, aih èh wì ep tech cla haq ka tuiq atùng. 4 Mahaq yiniq cleq mangai atùng ma khoe yŏc, yac ka ƀo, ka trìu, ka lùa, hnoq oe raq rìh jang tì kŏng haq, aih èh mangai ma atùng ep đèn hlài loh baiq phàn.

5 Tàng cabô broq kan haƀo ka ruàng qnì, wuàn nho qnì, caqnaih dèh ngè đeh ma aban mùt kaq taruàng mangai qnoeq, mangai aih ep yŏc dahwèq ma yeo lem dŏng deh enh ruàng, tàng ùh meh enh wuàn nho da cla đòeq hu pachàuq hlài da wì.

6 Tàng ùnh khàng cheo trùh xèm yila èh cheo hlàng trùh ta qmau neo gat, qmau qnhòq gat, dìq ka ruàng, mangai bùh ùnh aih ep am hlài rìm yiniq ma khoe cheo.

7 Jò i cabô jao deh ƀac jèn loq dahwèq cleq ka mangai haten hatìa don wèq, tàng beq ƀài ngè kô hnhung tahnim mangai ten tìa aih, tàng khoe jah rùp mangai atùng, mangai atùng aih ep đèn hlài loh baiq. 8 Tàng mangai atùng aih ùh jah rùp, aih èh ep aràng cla craq hnim ma am wì gòe lam trùh enh ngèa ƀài hadrah, đòeq hapah tì rađeh joq ùh i bèq ta dahwèq da mangai haten hatìa.

9 Tarìm trong wì ma tarahen trùh dahwèq leq aih, yac ka mòeq toq ƀo, lùa, eo cwàn tàng ùh meh yac ka cleq ma khoe hnhung, yàng èh i mangai doe: Kô da au, aih èh dìq baiq ka wa ep aràng ngè aih trùh enh ngèa ƀài hadrah, mangai leq ƀài hadrah ma doe haq i tuiq, haq aih ep đèn loh baiq am deh ka mangai haten hatìa.

10 Tàng i cabô jao deh lùa, ƀo, trìu, ùh meh ngè aban qnoeq ka mangai haten hatìa rađeh wèq ngan, yàng èh ngè aih cachìt, loh ka habau, tàng ùh meh hnhung lac, ùh i cabô hnoq.

11 Aih èh dìq baiq ka wa ep yŏc yiniq Chuaq Jêhowa đòeq hapah, đòeq jah loq mangai ma wèq ngan aih i poh tì ta kùng hang da mangai haten tìa đeh loq ùh. Cla mangai ma i dèh ƀài ngè aih ep dì bàu hapah aih, qmang aih èh mangai tau ùh hìaq ep đèn cleq.

12 Mahaq tàng ngè aih hnhung ka wì atùng, aih èh mangai ma chìuq wèq ngan ep đèn hlài da cla mangai ma i dèh ngè aih. 13 Tàng joq ngè aban aih cachìt ka ngè tarôm kap cachìt, mangai ma ngan ep ahlài hanang haq đòeq panhìn, aih èh haq ùh hìaq ep đèn ngè aih.

14 Tàng cabô muàn baha da mangai haten hatìa rađeh mòeq toq kon cleq aih, yàng èh haq tagoh mòeq toq jo, ùh meh cachìt, mahaq ùh i ka mat cla wì, aih èh mangai aih ep đèn hlài da wì. 15 Tàng i mat cla wì ta aih, aih ùh ep đèn. Tàng joq ngè aih khoe am muàn kaq baha, kùng ma baha aih broq ƀac đèn.

16 Tàng cabô padô kùi ti mòeq ngai adrùh sriu qnhòq capoch am ka cabô, mangai aih èh clìh ƀac pachàuq rai yŏc haq broq mai.

17 Tàng baq haq blinh ùh caqnaih deh kon, mangai aih ep clìh ka ƀac troq jaq ƀac pachàuq ka mangai adrùh sriu. 18 Ìh apaq rong ƀài gucadrì rìh ka patìh abroq ka pajàu kiac.

19 Mangai leq tango ka ngè aban, mangai aih èh ep jêh đac cachìt.

20 Mangai leq dèch ramènh tadreo ka kiac qnoeq enh gùng ka moeq ngai Chuaq Jêhowa, mangai aih ep cachìt.

21 Pì ùh khòh tabroq ùh loh cleq ka mangai diac wì hanoh ùh khòh loq làn wì haq, majah qmang aih pì hadai khoe broq tamoe rìh đeh ta Êdip.

22 Pì ùh khòh loq glua yac ka mangai cadrì hadrô qnì, yac ka mangai lac qnì.

23 Tàng loq làn wì, èh wì haq creo dang au, joq qnàng aih èh au tamàng bàu wì haq. 24 Kan tôq da au plôh tŏc, èh au yŏc chang jêh đac pì, aih èh mai pì hadai loh ka hadrô, èh kon pì hadai wìa qyoh lac.

25 Taqne ƀài mangai da au, i mangai pa oe ti pì, tàng pì am haq muàn ƀac, apaq broq tìah ka mangai am lình, hadai paq panan haq ep pòq ƀac goe.

26 Tàng pì i wê yŏc eo da mangai haten hatìa đòeq panan haq baxon hlài, aih ep padreo da haq adroe ka mat mahì clìh; 27 majah qmang aih, dìq dèh toq aih raq dahwèq đòeq taqmàn deh chac, aih eo đòeq taqmàn deh akia; haq yŏc cleq đòeq kùi? Tàng haq creo dang ka au, joq qnàng aih èh au tamàng bàu haq, majah qmang aih au kô mangai loq ha-och.

28 Ìh ùh khòh capoch ùh hòq ka Boc Plình, hadai paq ra-òh hamaiq ka bài bùa ka bài cla craq da mangai da ìh. 29 Ìh apaq trò đòeq dèch ka au ramènh riang plì gàu mùa da ìh ma don đòeq ta hapom, xam alac hoch loh enh cabong padit. Ìh hanoh ep dèch ka au kon calô ramua ìh.

30 Yac ka trìu bo ìh hanoh broq qmang aih; ta tapèh hì baxèm, kon ma ramua oe deh ti kan, trùh hì rahem ìh ep dèch haq ka au. 31 Pì jah broq mangai hadròeh da au, apaq acaq jam cleq ngè rôm ma hit tagùng, drah khwênh am koq kaq.