1 Ìh apaq lam anoe bàu lìq, paq wiang ti mangai broq yiniq lui đòeq qnoh bàu panhìn qnùt.

2 Ìh paq tiaq mangai bàc đòeq hu broq hwang; jò ìh yòng panhìn ka trong tah hadrah, apaq cro tiaq pah bàc ngai đòeq broq raliang trong taq atoq.

3 Ìh apaq loq gen kan ka mangai pa jò hadrah.

4 Tàng ìh loq hnoq ƀo qnì lùa qnì da mangai ma git ka ìh ep tiaq ahlài da cla wì.

5 Tàng ìh loq hnoq lùa da mangai ma git ka ìh pòq trap hrìn loh qmòe ka tacro, paq broq đeh ùh hnoq, ep dang dôq haq jah yeo đeh ka trap

6 Jò qnang tah hadrah paq cwaih đac bìac troq da mangai pa oe taqne ìh. 7 Ìh ep wia ka hangai bài bàu capoch dech, paq jêh đac mangai ùh i đeh yiniq lui xam mangai broq troq, majaq qmang aih au blinh ùh cađac ka mangai broq dù. 8 Ìh apaq yŏc ngè wì rot manoh, majah qmang aih ngè aih broq ka mat mangai qngah loh ka pùa, rai broq ka tagùt bàu da mangai hnhuh jang.

9 Ìh paq tacaq ka mòeq ngai diac wì, pì khoe loq manoh mangai oe đeh diac wì aih qmang leq, majah qmang aih pì hadai khoe broq mangai oe đeh diac wì ta Êdip.

10 Ta tadràu hanam pì rai deh adrech tađùng, trùh jò hi gat yŏc. 11 mahaq trùh hanam tapèh, ep đòeq taneh oe clui đòeq haq jah padài; dôq mangai pa taqne pì jah canòm đeh riang plì da taneh aih, loq oe rah bàc ƀiaq ƀài ngè rìh tagùng go jah acaq đeh. Hanoh broq qmang aih ka wuàn nho xam long ôliu.

12 Hloe ta tadràu hì pì broq gêh deh ka bìac, mahaq trùh hì tapèh ep padài, đòeq ka ƀo xam lùa da ìh jah padài; hloe xam ƀài kon calô da hapŏng cadrì ìh xam mangai diac wì jah padài đòeq yŏc hlài padren.

13 Ep wèq dŏng rìm bàu au thê ìh ma rabiaq haq. Ùh jah creo dang yiniq da ƀài kiac qnoeq. Apaq dôq ƀài yiniq aih jah tàng ràu loh enh hacùng bàu ìh.

14 Mòeq hanam piq yàng ìh ep wèq ramènh đòeq ta-iu ka au. 15 Ìh ep wèq ramènh ƀênh ùh tah blo; ta tapèh hì ep kaq bênh ùh tah blo, tiaq bàu au khoe tanap thê. Ramènh kô ep wèq troq deh jò ma khoe pajaq aih la khê Awip, majah qmang aih khê aih ìh loh khoe ka Êdip. Èh apaq cabô lam tì dech thia enh ngèa au. 16 Ìh ep wèq ramènh jò gat, xi riang plì ma ramung da padren hiwa ìh tiaq adrech ìh ma khoe rai tađùng; rai wèq ramènh gat ta cloh hanam, Jò pì khoe gat dèh riang plì da padren hiwa rađeh tađùng. 17 Moeq hanam piq yàng ƀài mangai calô ep trùh enh ngèa Chuaq, aih la Chuaq Jêhowa.

18 Ìh paq dèch mahim da ngè tadreo au pajùm ti cleq ma i tah blo; bòq da ngè tadreo ta ƀài hì ramènh au, ùh jah đòeq trùh sroq atìq.

19 Ƀài riang plì ramung gàu mùa da taneh, ìh ep aràng trùh tahnim Jêhowa Boc Plình ìh.

Ìh apaq pai bubi kon ta diac tôh kan haq.

20 Ngan kô! Au thê mòeq ƀình plình lam adroe ka ìh, đòeq wiang ti ìh jò lam trong, rai qmùt ìh tanòe au khoe palauq đòeq. 21 Enh ngèa haq, ìh ep wèq rađeh, ep iu tiaq bàu haq, ùh dùh àu tablêq ka haq, majah qmang aih haq ùh cađac da ìh yiniq lui, pàng yiniq au oe enh dalam haq. 22 Mahaq tàng ìh panim ka tamàng bàu haq, rai broq tiaq rìm nà au thê, aih èh au tablêq ka mangai ma tablêq ka ìh, chàt mangai ma chàt ìh. 23 Majah qmang aih ƀình plình da au lam adroe, qmùt ìh tagùng da mangai Amôrit, mangai Hêtit, mangai Phêrêsit, mangai Cana-an, mangai Hêwit xam mangai Jêbusit khoe aih au hi palùng wì haq.

24 Ìh apaq hacùn cràng kùh waiq rai patìh ka ƀài kiac da wì haq, paq top dua yiniq broq wì haq, mahaq ep palùng dŏng ƀài kiac aih rai tùq bahech radua qmù kiac wì haq. 25 Ìh ep kùh waiq Chuaq Jêhowa Boc Plình ìh; Haq jah am xôq ramot ta dahwèq acaq ôq ìh, rai dŏng đac ƀài kan yinìq tôq taqne ìh. 26 Tagùng ìh ùh i ka gucadrì ralòeh, gucadrì xon. Au am ìh jah halình. 27 Au thê deh kan ramòt lam adroe, waq toq ìh trùh ta mangai gùng leq, au broq ka wì ta aih prah priang cadàu lac trong, rai broq ka mangai ma git ka ìh tawìh crŏng enh ngèa ìh. 28 Au thê ong chìa lam adroe hnan jêh mangai Hêwit, mangai Cana-an, mangai Hêtit khoe ka mat ìh 29 Mahaq au ùh hnan wì haq cadàu dŏng ta mòeq hanam, yùq èh ta aih loq loh ka hawit, èh ngè gùng rôm loq xêh bàc, ti haƀo đac ka mangai; 30 mahaq au hnan wì haq cadàu loh yen yen khoe ka mat ìh, trùh jò leq mangai da ìh jah bình bauq hlàt blah yŏc gùng aih broq kùng hang.

31 Au acang pajaq taneh diac ka ìh enh diac raxìq gòh trùh raxìq Philitin, enh đùng hawit trùh cròng diac Ophorat, au jao mangai gùng aih mùt ta tì kŏng ìh, èh ìh hi hnan wì aih khoe ka mat rađeh. 32 Ìh paq broq tajao cleq ka wì haq, hloe xam ƀài kiac da wì haq. 33 Wì haq ùh jah oe gùng da ìh, yùq èh wì haq loq patùt ìh loh yiniq lui ka au đòeq kùh waiq kiac da wì haq qmòh; trong aih loq wìa jroh hlàp ka ìh.