1 Boc Plình doe ka Môise rameh: Ìh xam Arôn, Nađap xam Abihu xam tapèh jàt ngai gucraq Isorali drah tŏc tanòe au oe rai kùh waiq au enh hangai. 2 Mòeq ngai Môise raq majah thia haten ka Chuaq Jêhowa, wì tau ùh jah thia haten, mangai Isorali hanoh ùh jah tŏc taq haq.

3 Môise lam anoe hlài ka Isorali rìm nà bàu da Chuaq Jêhowa xam ƀài ranenh, aih dìq ka wì mòeq bàu ti dabau tèu haq: Nhèn broq tiaq rìm nà Chuaq Jêhowa thê. 4 Môise achìh dŏng rìm bàu da Chuaq Jêhowa, khoe aih rìu sroeh tàc broq mòeq toq prang tadreo ta jènh wang, dèch paqnàng moeq jàt baiq toq jrang bahìan ka mòeq jàt baiq xinoe Isorali. 5 Haq thê ƀài guradam da Isorali trùh dèch ramènh bùh xam ramènh waiq kan catèm ka Chuaq Jêhowa xi ƀo bu caqmon radam. 6 Môise yŏc moeq qne mahim tah ta doe hilùq, oe moeq qne aih pùc ta prang tadreo. 7 Khoe ka aih, haq wê hset tajao đŏc ka mangai Isorali tamàng, aih wì hi doe: Nhèn broq rai iu tiaq rìm bàu da Chuaq Jêhowa thê. 8 Môise yŏc mahim da arat tachac wì rai doe: Kô Mahim Tajao da Boc Plình khoe broq ti pì tiaq wop qmang ka bài bàu kô.

9 Môise xam Arôn, Nađap xam Abihu hloe xam tapèh jàt ngai gucraq Isorali dìq tŏc tawang. 10 ngan hnoq Boc Plình da Isorali; nòe jènh haq i cleq meh tìah qmòe ka hmu ngŏc saphia, hliang tìah qngah trŏc ca-ah ca-iang. 11 Mahaq Boc Plình ùh dèch tì tabroq ka ƀài gucraq da mangai Isorali; wì haq hnoq Boc Plình, èh wì haq hi acaq ôq.

12 Chuaq Jêhowa doe ka Môise: Drah tŏc tawang, trùh ta au èh oe tacô, au hi am ka ìh capiac hmo ranenh xam bàu hnài, au khoe achìh đòeq hnài Isorali. 13 Môise padinh yòng xam Jôsuê mangai patìh cajènh catì rađeh, khoe aih Môise hi tŏc tawang da BocPlình. 14 Haq doe ka ƀài gucraq: Pì gòm ma tacô trùh jò ma wìh hlài ta pì. Arôn xam Huro oe tacô ti pì, cabô loq i yiniq cleq lam bòch wa aih.

15 Qmang aih Môise tŏc tawang, yùc glàp dŏng wang. 16 Kan ranhòm da Chuaq Jêhowa oe tawang Sina-i; ta tadràu hì yùc glàp dŏng wang, trùh tahì tapèh Chuaq Jêhowa oe ta yùc creo ka Môise. 17 Kan ranhòm da Chuaq Jêhowa nòe bui wang, enh ngèa mangai Isorali hnoq tìah qmòe ka ùnh ma adrènh qngah. 18 Môise mùt taqne yùc, tŏc tawang, oe ta-aih pôn jàt hì pôn jàt mang.